"Zimistan" tori xitay ölkiliride Uyghurlarning nazaret qilish nishani boluwatqanliqini xewer qildi

Muxbirimiz irade
2019-04-08
Élxet
Pikir
Share
Print

"Zimistan" tori 8-aprél künidiki xewiride bayan qilishiche, ular yéqinda xénen ölkilik jama'et xewpsizlik idarisining "Ikki qurultay" rohini öginish yighinida térrorluqqa qarshi turush heqqide qilin'ghan muzakire pilanining mezmunigha érishken.

Pilanda körsitilishiche, uningda herqandaq bir kishining Uyghur millitidin bolghan birini bayqap qalsa, uni derhal "Térrorluqqa qarshi turush" ishxanisigha xewer qilishi we Uyghurlarni nazaret qilish xizmetlirini yaxshi orunlashturush yolyoruqi bérilgen.

Pilandin yene, Uyghurlarning pa'aliyet-heriketliri heqqide uchur toplash, ularning pulini nege ishlitiwatqanliqi, néme sétiwalghanliqi, tor alaqiliri, dini pa'aliyetliri we uning mezmunlirining éniq bolushi dégenlermu orun alghan iken.

Bundin bashqa yene, fuyang shehiridiki méhmanxanilar we torxanilarghimu Uyghurlarni körse melum qilish heqqidiki uqturushlar chüshürülgen bolup, xilapliq qilghanlarning "Térrorluqqa qarshi turush qanuni" boyiche jazalinidighanliqi agahlandurulghan.

"Zimistan" tori yene xébéy ölkilik partkom teripidin élan qilin'ghan yuqiridikige oxshash uqturushni körgen bolup, uningda Uyghurlar "Xeterlik unsurlar" dep körsitilgen.

Xitay hökümitining pütkül bir milletni "Térrorluq" "Radikalliq" nami bilen qarilap, 800 mingdin 2 milyon'ghiche kishini lagérgha qamighanliqi dunyada qattiq naraziliq peyda qiliwatqan bir peytte özining "Yershari waqti géziti" ge oxshash hökümet metbu'atida Uyghur élining chéchek peslide sayahetchi jelp qilip, yerliklerge nahayiti zor kirim menbesi yaratqanliqinimu xewer qilghan.

Toluq bet