"зимистан" : "хитайниң ичкири өлкилиридики уйғур оқуғучилар рамзанда чошқа гөши йейишкә мәҗбурланған"

Мухбиримиз әркин
2020-05-18
Share

Италийәдики "зимистан" намлиқ диний әркинлик тор бекити 18-май күни хәвәр берип, хитай даирилириниң ичкири өлкиләрдики уйғур оқуғучилириниң рамзан ейида роза тутушини чәклигәнлики, уларни чошқа гөши йейишкә мәҗбурлиғанлиқини билдүрди. Хәвәрдә билдүрүлүшичә, шәндуңдики бир толуқ оттура мәктәпниң оқутқучиси уларниң мәктипидики барлиқ уйғур оқуғучиларниң рамзан ейида чоқум тамақ йейиши керәклики, уларниң хитай оқуғучилар билән биргә чоқум чошқа гөши йейишкә мәҗбур икәнлики, роза тутушиға йол қоюлмайдиғанлиқини билдүргән.

Хитай һөкүмити узундин бери уйғурларниң роза тутушини чәкләп, һәр йили рамзанда уйғурларни әтигәнлик наштилиққа яки чүшлүк тамаққа орунлаштуруп кәлгән. Тамақ йейишни рәт қилғанларни "әсәбийлик идийәси" бар, дегән сәвәб билән йиғивелиш лагерлириға яки қамаққа һөкүм қилған. Йеқинда радийомиз бу йиллиқ рамзан ейида даириләрниң уйғурларни қошна-қулумлириниң роза тутқан-тутмиғанлиқини назарәт қилишқа салғанлиқини ашкарилиғаниди.

"зимистан" ториниң хәвиридә шәндуңдики уйғурлар оқуватқан толуқ оттура мәктәп вә униң оқутқучисиниң исми тилға елинған.

Лекин, хәвәрдә билдүрүлүшичә, шәндуңдики юқириқи толуқ оттура мәктәпниң оқутқучиси, уйғур оқуғучиларниң диний паалийәт билән шуғуллинишиға йол қоюлмайдиғанлиқи, уларниң намаз оқуғанлиқи байқилип қалса, җазалинидиғанлиқи яки шинҗаңға қайтурулидиғанлиқини билдүргән. Мәзкур оқутқучи бундақ қилиштики сәвәб һәққидә тохтилип, "бундақ қилиштики муддиа уларни хитайлаштуруш, мана бу маарип тәрбийәсиниң ахирқи мәқсити" дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт