"Zimistan" : "Xitayning ichkiri ölkiliridiki Uyghur oqughuchilar ramzanda choshqa göshi yéyishke mejburlan'ghan"

Muxbirimiz erkin
2020-05-18
Share

Italiyediki "Zimistan" namliq diniy erkinlik tor békiti 18-may küni xewer bérip, xitay da'irilirining ichkiri ölkilerdiki Uyghur oqughuchilirining ramzan éyida roza tutushini chekligenliki, ularni choshqa göshi yéyishke mejburlighanliqini bildürdi. Xewerde bildürülüshiche, shendungdiki bir toluq ottura mektepning oqutquchisi ularning mektipidiki barliq Uyghur oqughuchilarning ramzan éyida choqum tamaq yéyishi kérekliki, ularning xitay oqughuchilar bilen birge choqum choshqa göshi yéyishke mejbur ikenliki, roza tutushigha yol qoyulmaydighanliqini bildürgen.

Xitay hökümiti uzundin béri Uyghurlarning roza tutushini cheklep, her yili ramzanda Uyghurlarni etigenlik nashtiliqqa yaki chüshlük tamaqqa orunlashturup kelgen. Tamaq yéyishni ret qilghanlarni "Esebiylik idiyesi" bar, dégen seweb bilen yighiwélish lagérlirigha yaki qamaqqa höküm qilghan. Yéqinda radiyomiz bu yilliq ramzan éyida da'irilerning Uyghurlarni qoshna-qulumlirining roza tutqan-tutmighanliqini nazaret qilishqa salghanliqini ashkarilighanidi.

"Zimistan" torining xewiride shendungdiki Uyghurlar oquwatqan toluq ottura mektep we uning oqutquchisining ismi tilgha élin'ghan.

Lékin, xewerde bildürülüshiche, shendungdiki yuqiriqi toluq ottura mektepning oqutquchisi, Uyghur oqughuchilarning diniy pa'aliyet bilen shughullinishigha yol qoyulmaydighanliqi, ularning namaz oqughanliqi bayqilip qalsa, jazalinidighanliqi yaki shinjanggha qayturulidighanliqini bildürgen. Mezkur oqutquchi bundaq qilishtiki seweb heqqide toxtilip, "Bundaq qilishtiki muddi'a ularni xitaylashturush, mana bu ma'arip terbiyesining axirqi meqsiti" dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet