Toqquzaq bulaqsuning yéza bashliqi ablet turghun "Qanat astigha élish jinayiti" bilen 14 yilliq késilgen

Muxbirimiz shöhret hoshur
2021-10-13
Share
Sha'ir we fizik qasim sidiqning Tamliri sim tiken bilen qorshalghan "Kespiy téxnika ma'arip merkizi" dep atalghan xitay lagérining üstige bixeterlik kaméra ornitilghan. 2018-Yili 4-séntebir.
REUTERS

Uyghur rayonida 2017‏-yili bashlan'ghan chong tutqunda nisbeten köp tekrarlan'ghan atalmish jinayet namliridin biri "Qanat astigha élish jinayiti" bolup, bu "Jinayet gumandari" bolup qalghan kishilerge bilip yaki bilmey insandarchiliq nuqtisidin yardem qilip qalghanlar mana mushu qalpaq bilen tutulghan we éghir késiwétilgen. Mana bulardin biri toqquzaq bulaqsuning yéza bashliqi ablet turghun bolup, u 82 yashliq bir sabiq mehbusni "Terbiyelesh" ke apirilidighanlar tizimlikidin chiqiriwetkenliki üchün mezkur qalpaq bilen 14 yilliq késilgen.

Inkas qilinishiche, 82 yashliq kishini "Terbiyelesh" ke élip bérish toqquzaq bulaqsu yézisining yéza bashliqi ablet turghunning idiyesidin ötmigen, u bundaq qilishni bu tutqun namzatining salametliki üchün tehdit depla qarimastin, belki yene özi xizmet qiliwatqan partiye we hökümetning inawiti üchünmu ziyanliq dep qarighan. Emma2017 ‏-yilining axirlirigha kelgende, u mezkur qarari seweplik "Jinayetchini qanat astigha élish" gumani bilen dölet bixterlik saqchiliri teripidin chaqirtilghan we iz-dériki ghayip bolghan.

Toqquzaqliq bir muhajir yollighan bu inkasta diyilishiche, ablet turghun eslide toqquzaqning térim yézisidin bolup, u bulaqsu yézisida yéza bashliqi bolup wezipe ötewatqan mezgilde bu qismetke duch kelgen.

Biz bu ehwal heqqide toqquzaqning térim we bulaqsu yéziliq saqchixaniliridin melumat sürüshte qilduq.

Inkasta déyilishiche, ablet turghun tutqun qilinip bir yérim yildin kéyin, yeni 2018‏-yilning axirigha kelgende, 14 yilliq késilgenliki térimdiki a'ilisige uqturulghan. Uqturushta uning bir mehel opal "Terbiyelesh merkizi" de tutup turulup, uningdin kéyin toqquzaq mushtiki türmige yötkelgenliki qeyt qilin'ghan. Biz bu heqte ilgiri opal "Terbiyelesh merkizi" de ikki yil wezipe ötigen bir saqchi xadimidin melumat soriduq. Biz uningdin özi mes'ul bolghan tutqunlar arisida emeldarlardin kimlerning barliqini sorighinimizda, u "Yéza bashliqi ablet turghun" dep jawap berdi.

Inkasta qeyt qilinishiche, ablet turghun mezkur 82 yashliq kishini "Terbiyelesh obyéktliri" tizimlikidin öchüriwétishni buyrughinida, kent kadirliri mezkur bowayning sabiq mehbus ikenlikini eskertken. Ablet turghun bolsa uning yéshi seweblik qayta jinayet ötküzüsh xewpi yoqluqini bildürüp, qararidin yanmighan iken. Melum bolushiche, u bu "Jahilliqi" seweblik "Ikki yüzlimichilik" bilenmu eyiblen'gen we 14 yilliq késiwétilgen.

Ilgiriki éniqlashlirimizdin melum bolushiche, toqquzaqning bulaqsu we zemin yézisi2017 ‏-yildiki chong tutqun eng téz sür'ette we keng kölemde dawam qilghan jaylar bolup, deslepki 7 aydila bulaqsu boyiche 3514 kishi tutqun qilin'ghan, ahalilerning tutulush nisbiti 15 pirsentke yéqinlashqan.

Inkasta déyilishiche, yéza bashliqi ablet turghun eslide aktip bir partiye ezasi bolup, u tutqunlar tizimlikining bu derijide kéngiyishini yézining ishlepchiqirish we qurulush ishlirigha, shundaqla yuqirining yilliq wezipe körsetküchilirini orundashqa tosalghu peyda qilidu dep oylighan. U bu endishisini alaqidar bir ichkiy yighindimu otturigha qoyghan iken.

Yuqirida 82 yashliq bir sabiq mehbusni "Terbiyeleshke apirilidighanlar tizimliki" din chiqiriwetken yéza bashliqi ablet turghunning 14 yilliq késilgenliki heqqide anglitish berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet