Amérikidiki Uyghur jama'iti washin'gtonda jem bolup 2016 - yilliq qurban héytni kütiwaldi

Essalamu eleykum, eziz wetendashlar!

Bügün amérikidiki Uyghur jama'iti bir yerge jem bolup 2016 - yilliq qurban héytni kütiwaldi.

Amérika paytexti washin'gton we uninggha qoshna wirjiniye we marilan ishtatliridin yighilghan yüzligen Uyghur jama'iti feyrfaks rayonidiki türk jamesige jem bolup qurban héyt namizini birlikte oqudi.

Jama'et nurdun hajimning imametchilikide tegbir éytip meschitke qedem basti. Jama'et chongqur ixlas bilen héyt namizigha teyyarlandi.

Namazdin burun nurdun hajim wez éytip, hejning musulmanlar üchün perz qilin'ghanliqi, qurban heyt namizini oqush bilen qurbanliq qilishning wajib qilin'ghanliqi heqqide chüshenche berdi.

U yene “Qur'an kerim” we “Hedis” lerdin neqiller keltürüp musulmanlar üchün qurban héytning eng ulugh kün ikenliki we qurbanliq késishning xasiyiti heqqide izahat berdi.

Bu qétimliq qurban héyt namizida amérika we pütün dunyadiki Uyghurlarning birlik - ittipaqliqi we qérindashliq rishtisi alahide tekitlendi.

Qurban héyt namizi oqulup bolun'ghandin kéyin jama'et nurdun hajimning yétekchilikide du'agha qol kötürdi.

Héyt namizidin kéyinki du'ada yene Uyghurlar wetini üchün, Uyghurlarning milliy we diniy heq - hoquqliri üchün jénini qurban qilghan shéhitlarning rohigha atap du'a - tilawetler oquldi. Xitayning qarangghu zindanlirida yétiwatqan qiz - oghullar we ularning a'ile tawabi'atlirigha allahdin gheyret - jasaret hem sebir tilidi.

Amérika Uyghur birleshmisining re'isi ilshat hesen ependi ziyaritimizni qobul qilip munularni bildürdi.

Amérika Uyghur birleshmisining hey'et ezaliridin doktor jür'et obul ependimu ziyaritimizni qobul qilip, meyli amérikida bolsun yaki dunyaning jay - jaylirida bolsun, muhajirette yashawatqan Uyghurlar üchün jama'etlishishning hemmidin muhimliqini tekitlidi. U yilda ikki qétim kélidighan héyt namizi we bashqa milliy hem diniy pa'aliyetlerning muhajirettiki Uyghurlarni bir jaygha jem qilidighan, ittipaqlashturidighan shundaqla milliy uyushushning küch - qudritini tonutidighan qimmetlik purset ikenlikini ilgiri sürdi.

Tepsilatini awaz ulinishtin anglighaysiz.