Türkiyening qeyseri, enqere we bashqa sheherliridiki Uyghurlar qurban héytni xushal - xuram ötküzmekte

Bügün, islam dunyasining eng chong héytliridin biri bolghan qurban héytning birinchi küni.

Türkiyede bu yil qurban héyti namizi bügün, yeni 9 - ayning 12 - küni oquldi. Türkiye hökümiti bu yil héytta 9 kün tetil qoyup bérilgenlikini jakarlidi. Türkiyede milyonlighan kishiler öz yurtlirigha qaytip uruq - tughqanliri bilen jem bolup, héyt namizi oqup, alemdin ötken yéqinlirining qebrisi béshida du'a qilip, qurbanliq qoylarni soyuwatqan shu peytlerde, türkiyediki Uyghurlar qandaq héyt ötküzüwatidu?

Biz türkiyening enqere, qeyseri we bashqa sheherliride yashawatqan bir qisim Uyghurlar bilen söhbet élip bérip, ularning héyt ötküzüsh ehwalini igiliduq.

Qeyseride pa'aliyet élip bériwatqan sherqiy türkistan medeniyet we hemkarliq jemiyiti re'isi séyit tümtürk ependi, burun kelgen Uyghurlar bilen 2014 - 2015 - yilliri tayland we malayshiya arqiliq kelgen Uyghurlar bir yerge jem bolup, héyt namizi oqughanliqi, namazdin kéyin hal - ehwali yaxshi Uyghurlarning qurbanliq qoylirini soyuwatqanliqi, namrat Uyghurlargha bashqa Uyghurlarning we türklerning yardem qolini sunidighanliqini bayan qildi.

Séyit tümtürk ependi qeyseride hazir ikki chong Uyghur mehellisining barliqini, Uyghurlarning birlik we ittipaqliq ichide, Uyghurlarning en'enisi boyiche qurban héyt ötküzüwatqanliqini bayan qilip ötti.

Biz bügün, yeni héytning birinchi küni musapir Uyghurlarning héyt ehwali toghrisida melumat igilesh üchün Uyghur musapirlar bilenmu téléfon söhbiti élip barduq. Ular erkin dunyada qurban héytni yaxshi ötküzüwatqanliqini, emma yüreklirining wetendiki uruq - tughqanlirini séghinish otida köyüwatqanliqini, köngüllirining nahayiti yérim ikenlikini tekitleshti.

Türkiyening qeyseri shehride hazir ikki Uyghur mehellisi bar bolup, bularning biri 1964 - yili türkiyening qeyseri shehiri exmet yesewiy mehellisige jaylashturulghan Uyghurlardin terkip tapqan mehelle, yene biri bolsa 2013 - 2014 yillirida malayshiya we tayland arqiliq kelgen Uyghurlar turushluq belsin dölet qorusidur. Bu yerdiki Uyghurlarning sani hazir 2 mingdin éship ketken.

Qurban héyt 20 - sintebir küni axirlishidu.