En'gliye parlaméntidiki iptarliq ziyapette Uyghur qirghinchiliqi tonushturulghan

En'gliye parlaméntining iptar ziyapitige qatnashqan abdulhakim idris, roshen abbas we rehime mahmutlar parlamént mu'awin bashliqi nusret gheni we baronas sayyed warsi bilen bille. 2025-Yili 4-mart, london.

4-Mart küni en'gliye paytexti londonda ötküzülgen en'gliye parlaméntining iptar ziyapitige Uyghurlarmu teklip bilen qatnashqan. Bu pa'aliyetke en'gliye bash weziri sir kiyer starmér ependi qatniship, ramizanliq tebrik sözi sözligen.

U sözide “Bügün biz bu yerde birlikning hemkarliqning küchini körüwatimiz, dep oylaymen. Elwette, buning üchün en'gliye parlaménti musulmanlar guruppisigha rehmet éytimen. Bunche köp insanning simwolluq shekilde, simwolluq bir yerge jem bolushi bir ewzelliktur. Men dunya musulmanlirining mubarek ramizan éyini tebrikleymen! bu munasiwet bilen barliq insanlarning tinch, barawer yashash hoquqigha érishishini, islam düshmenlikige birlikte qarshi turushni, barliq dinlargha hörmet qilishni, hemme insanlarning öz étiqadini erkin yashashqa hoquqluq ikenlikini tekitleymen!”.

RFA/Hebibulla Izchi

Bu ziyapetke nöwette en'gliyede pa'aliyet élip bériwatqan dunya Uyghur qurultiyi ijra'iye komitétining re'isi, Uyghur herikiti teshkilatining bashliqi roshen abbas, merkizi amérikadiki Uyghur tetqiqat institutining diréktori abdulhakim idris, en'gliyediki “Uyghur qirghinchiliqini toxtat” teshkilatining re'isi rehime mahmut qatarliqlar teklip bilen qatnashqan. Ular bu iptarliq pa'aliyitide en'gliye parlamént ezaliri bilen her qaysi musulman teshkilatlarning wekillirige Uyghur irqiy qirghinchiliqini tonushturush pursitige érishken.

---

Munasiwetlik xewerler

En'gliye parlaméntida en'gliye hökümiti Uyghur irqiy qirghinchiliqini étirap qilishqa chaqirildi

En'gliye parlaménti Uyghur diyaridiki mejburiy emgek heqqide doklat élan qildi

En'gliye parlaménti küntaxta mehsulatlirigha “Qul emgiki” arilashmighan bolushini telep qildi

---

Nöwette en'gliyede pa'aliyet élip bériwatqan Uyghur tetqiqat institutining diréktori abdulhakim idris bu heqtiki tepsilatlarni radiyomiz arqiliq anglarmenler bilen ortaqlashti.

Roshen abbas xanimmu, en'gliye parlamént ezalirigha xitayning keng kölemde tetür teshwiqat élip bérip Uyghur qirghinchiliqini yoshurushqa we xelq'araning közini boyashqa urunuwatqanliqini, hedisi doxtur gülshen abbasningmu hazirmu türmide ikenlikini anglatqan. U, xitayning bu qirghinchiliqning dunyaning közi aldida élip bériliwatqan bir ré'alliq ikenlikini tekitligen.

RFA/Hebibulla Izchi

En'gliyediki “Uyghur qirghinchiliqini toxtat” teshkilatining diréktori rehime mahmut xanimmu radiyomizning ziyaritini qobul qilip, “Bundaq bir pa'aliyette siyasetchilerge Uyghur mesilisini anglitishning muhim ikenliki” ni tekitlep ötti.

Abdulhakimning bildürüshiche, ular iptar ziyapitidin burun en'gliyediki “Uyghurlar üchün des tur” dégen teshkilatning mes'ulliri bilen körüshüp, Uyghur irqiy qirghinchiliqi heqqide söhbet élip barghan.

En'gliyediki musulman jama'iti we her qaysi islam döletlirining elchilirige bérilidighan iptarliq ziyapet en'gliye parlaménti teripidin yilda bir ötküzülidighan bolup, bu qétimqi iptarliq ziyapitige en'gliye bash weziri sir kéyer starmér, parlamént ezaliridin jon maykfal, linsay hoyle, tariq ehmed, baronés seyyid warsi, nusret gheni qatarliqlarmu qatnashqan.

Iptar ziyapiti jeryanida abdulhakim idris, roshen abbas, rehime mahmut qatarliqlar parlamént ezaliri bilen ayrim uchrishish élip bérip, Uyghur irqiy qirghinchiliqini anglatqan, shundaqla Uyghur mesilisining nöwettiki dunya weziyitidiki jiddiychilik sewebidin herqaysi tereplerning diqqet nuqtisidin chette qéliwatqanliqini tekitligen.