Һәптилик хәвәрләр (22-28 - январ)


2005-01-28
Share

Америка хитайниң рабийә қадирни қоюп беришини тәләп қилди

Чаршәнбә йәни 26- январ күни америка дөләт мәҗлисидә өткүзүлгән рабийә қадирға рафто мукапатини тапшуруш мурасимиға қатнишип, сөз қилған америка ташқи ишлар министирликиниң шәрқий асия ишлириға мәсул муавин ярдәмчи ташқи ишлар министири ранди шрәвд &# xFEE9;р әпәнди мундақ деди;

"Америка рабийә қадир мәсилиси шундақла башқа кишилик һоқуқ мәсилилирини хитай һөкүмитигә давамлиқ әскәртип туриду. Чүнки, кишилик һоқуқ хитай-америка мунасивәтлиридики муһим мәсилиләрниң бири".

Бу мурасимда сөз қилған америка авам палата әзаси франк волф буш һөкүмитиниң рабийә қадир мәсилисигә көңүл бөлүшиниң йетәрлик болмайватқанлиқини тәкитләш билән биргә америкиниң йеңи ташқи ишлар министири кондализа райис шундақла приздент бушқа хәт йезип, уларниң хитай һөкүмитини рабийә қадирни қоюп беришкә қистишини тәләп қилишни оттуриға қойди.

Бу мурасимда йәнә хәлқара кәчүрүм тәшкилати вашингтон ишханисиниң башлиқи т. Кумар "приздент бушниң рабийә қадир мәсилисигә көңүл бөлүш мәҗбурийити бар, чүнки рабийә қадир 1999-йили 8-айда үрүмчини зиярәт қилишқа барған америка дөләт мәҗлисиниң вәкиллири билән көрүшкили кетиватқанда қолға елинған " деди.

Рафто мукапатини тапшуруш мурасими өткүзилди

Америка дөләт мәҗлисидики бу қетимлиқ мурасим норвегийидики рафто фонди җәмийити, америка демократийини илгири сүрүш фонди вә америка уйғурлири бирлики қатарлиқ органлар тәрипидин уюштурулған болуп, буниңға америкиниң сиясәт вә инсан һоқуқи саһәсидики әрбаблар, дөләт рәһбири хадимлири, профессорлар һәм башқилар қатнашти.

Мурасим наһайити дағдуғилиқ вә тәсирлик өткән болуп, рафто фонди җәмийитиниң мәсули, рабийә қадирниң паалийәтлири һәққидә тохталди шуниңдәк йәнә атақлиқ уйғур шаири абдуреһим өткүрниң "из " намлиқ шеиридин мисал кәлтүрүп, уни уйғурларниң һаятиға тәдбиқлиди.

Мурасим йиғинида юқирида исми аталған кишиләрдин башқа йәнә америка ташқи ишлар министирликиниң демократийә ишлириға мәсул ярдәмчи ташқи ишлар министири лорн крайнер вә башқа икки нәпәр дө &# xFEDF;әт мәҗлиси әзаси, чех җумһурийитиниң әлчиси вә башқилар сөз қилди.

Бу мурасимда рабийә қадирға берилгән мукапатни тапшурувалған сидиқ һаҗи рози әпәндиму сөз қилип, америка һәм норвигийә һөкүмәтлиригә рәһмитини билдүрди.

Рафто фонди җәмийитиниң рәһбәрлири әркин асия радиосида

Рабийә қадир ханимға берилгән рафто мукапатини тапшуруш үчүн мурасим өткүзүш мәқситидә америкиға кәлгән рафто фонди җәмийитиниң 6 кишилик вәкилләр өмики чаршәнбә күни чүштә әркин асия радио истансисиға келип, мунасивәтлик рәһбәрләр вә уйғур бөлүми хадимлири билән сөһбәтләшти.

Рафто фонди җәмийитиниң рәиси арний лиңар әпәнди мундақ деди;

" Биз рафто мукапатини тарқитиш мурасимини америка дөләт мәҗлисидә өткүзүш пурситигә игә болғинимизға интайин хушал болдуқ, биз өткән йили ноябирда норвигийигә берип, рабийә қадир ханимға вакалитән мукапат тапшуруп елишқа униң йолдиши сидиқ һаҗи рози әпәндини тәклип қилған идуқ. Бирақ, шараит яр бәрмигәнликтин, бу әмәлгә ашмиди. Шуңа биз америка уйғурлири бирлики вә америка дөләтлик демократийини илгири сүрүш фондиниң ярдими билән америка дөләт мәҗлисидә рабийә қадир ханимға рафто мукапатини тарқитиш мурасимини қайта өткүзмәкчи болдуқ. Җәмийитимиз мукапат бериш биләнла чәклинип қалмайду, бу бир башлиниш, биз давамлиқ түрдә уйғур дәвасини илгири сүрүш үчүн тиришчанлиқ көрситимиз".

Рафто фонди җәмийитиниң рәһбәрлири йәнә мәзкур җәмийәтниң нобел мукапатини елиштиму муһим рол ойнайдиғанлиқини билдүрди.

Бейҗиң вашиңтонниң чақириқини рәт қилди

Хитай һөкүмити пәйшәнбә күни баянат елан қилип, америкиниң демократийини илгири сүрүш вә кишилик һоқуқ вәзийитини яхшилаш һәққидики чақириқини рәт қилди.

Америка призденти җорҗи буш чаршәнбә күни хитай рәһбәрлирини кишилик һоқуқ вәзийитини яхшилашқа чақирған иди.

Америка ташқи ишлар миниситирлиқиму өткән һәптидә кишилик һоқуқ мәсилисиниң америка-хитай мунасивитидики бир тосалғу икәнликини тәкитләп, хитайниң демократийини йолға қоюп, кишилик һоқуқни һөрмәт қилмиғичә америкиниң йеқин иттипақдеши болалмайдиғанлиқини көрсәткән.

Б д т оттура асияниң бихәтәрлик мәсилилирини музакирә қилди

Бирләшкән дөләтләр тәшкилатиниң террорчилиққа қарши туруш комитети өткән һәптә қазақистанда йиғин ечип, бихәтәрлик вәзийитини музакирә қилди.

Хәвәрләргә қариғанда террорчилиққа қарши туруш мәсилиси оттура асия мәмликәтлиридики муһим нуқтилиқ мәсилә дәп қаралмақта.

Хәвәрләргә қариғанда шаңхәй һәмкарлиқ тәшкилати билән оттура асиядики коллектип бихәтәрлик келишими тәшкилати бирлишип, оттура бир қисим террорлуқ тәшкилатлириниң тизимликини турғузған. (Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт