Һәптилик хәвәрләр (16-февралдин 22-февралғичә)

Мухбиримиз әзиз
2019-02-22
Елхәт
Пикир
Share
Принт
Долқун әйса вә өмәр қанат әпәндиләр америка хәлқаралиқ диний ишлар баш әлчиси сам бровнбәк әпәндим билән биргә. 2019-Йили 15-феврал. Вашингтон, америка.
Долқун әйса вә өмәр қанат әпәндиләр америка хәлқаралиқ диний ишлар баш әлчиси сам бровнбәк әпәндим билән биргә. 2019-Йили 15-феврал. Вашингтон, америка.
RFA

Бир қисим уйғур тутқунларниң ички моңғулдики түрмиләргә йөткәлгәнлики дәлилләнди

«Зимистан» тори йеқинда уйғур дияридин зор сандики мәһбусларниң хитай өлкилиридики түрмиләргә йөткәлгәнликини хәвәр қилған иди. Мухбиримизниң бу һәқтики әһвал ениқлиши давамида буниңдин бирнәччә ай илгири бир түркүм уйғур мәһбусларниң ички моңғулдики түрмиләргә йөткәп келингәнлики ашкариланди.

Алақидар хадимларниң билдүрүшичә, ички моңғулға йөткәлгән бу уйғур мәһбусларниң ташқи дунядикиләр билән алақә қилиши мәни қилинған болуп, уларни башқуруш ишлири «дөләт мәхпийәтлики» қатарида бир яқлиқ қилинмақта икән.

«Интил» мәктипиниң қурғучиси абләт абдулланиң тутулғанлиқи илгири сүрүлмәктә

Уйғур диярида барғансери юқири пәллигә чиқиватқан зор тутқунда әлгә тонулған сахавәтчиләрниң бири, «интил» мәктипиниң қурғучиси абләт абдулланиңму лагерға елип кетилгәнлики алға сүрүлмәктә.

Бу йил 32 яшқа киргән абләт абдулла өз алдиға игилик тикләп бай болғандин кейин 70 нәччә мунтизим оқутқучиси болған «интил» кәспий техника мәктипи ечип, бир қисим намрат уйғур оқуғучиларни һәқсиз маарип билән тәмин етип кәлгән икән.

Анализчилар «абләт абдуллаға охшаш хитай һөкүмитиниң тәқдирлишигә муйәссәр болған бир сахавәтчиниңму лагерға солиниши лагерларниң һәқиқий характерини йәнә бир қетим ениқ көрситип бериду,» деди.

Ишқияр абдуреһимниң баянлири уйғурларниң һазирқи әһвалини әкс әттүрмәктә

Уйғур җәмийити дуч келиватқан мислисиз бастурушниң уйғур аилилирини қанчилик ханивәйран қиливатқанлиқи ишқияр абдуреһимниң баянлирида йәнә бир қетим типик һалда әкс әтти.

Һазир түркийәдә яшаватқан ишқияр абдуреһимниң аилә әзалири 1997-йилидики ғулҗа «5-феврал паҗиәси» мәзгилидила қамаққа һөкүм қилинған. Йеқинда у қериндашлири вә биваситә туғқанлиридин 35 кишиниң лагерда вә түрмидә икәнликини ениқлап чиққан.

Мәлум болушичә, ишқияр абдуреһимниң аилиси изчил «нуқтилиқ аилә» болуп кәлгән болуп, нөвәттики бастурушта бу хил аилиләр еғир бәдәлләрни төлимәктә икән.

Хитай һөкүмитиниң канадада уйғурлар мәсилисигә қол тиқиши зор ғулғула қозғиди

Өткән һәптә канададики уйғур паалийәтчи руқийә турдушниң мәк-мастер университетида уйғурлар мәсилиси һәққидә лексийә бериш паалийити хитай оқуғучиларниң қаршилиқи вә өктәмлик қилишиға дуч кәлгән иди.

Кейинчә бу ишларға канададики хитай әлчиханисиниң биваситә арилашқанлиқи вә оқуғучиларға бу һәқтә қандақ көрсәтмә бәргәнлики ашкара болди.

Вәқәдин кейин бу әһвал америка вә явропадики чоң ахбарат васитилиридә мәхсус хәвәр қилинип, хитай һөкүмитиниң хитай оқуғучилар арқилиқ чәтәлләрдики уйғур давасиға қандақ қол тиқиватқанлиқи һәққидә чоң ғулғула қозғалди.

Д у қ рәһбәрлири вашингтонда муһим учришишларда болди

Алдинқи һәптидә америкиға хизмәт зиярити үчүн кәлгән д у қ ниң рәиси долқун әйса вашингтон шәһиридә америка һөкүмитиниң бир қисим юқири дәриҗилик хадимлири билән учрашқан һәмдә уйғурлар мәсилиси тоғрилиқ пикир алмаштурған.

Бу қетимлиқ учришишта д у қ рәһбәрлири америка дөләт мәҗлисидә тонуштурулмақчи болған уйғурларға даир икки қанун лайиһәсигә мунасивәтлик ишларни тәпсилий музакирә қилған.

Мәлум болушичә, бу қетимқи учришиштин башқа д у қ рәһбәрлири йәнә вашингтон шәһиридики ахбарат васитилири вә илмий тәшкилатлар биләнму учришип, уйғурлар мәсилисиниң һазирқи әһвалини тонуштурған.

Америка алий мәктәплиридә уйғурлар мәсилиси көпләп тонуштурулди

Уйғурлар дуч келиватқан сиясий бастурушлар һәққидә алий билим юртлиридики оқуғучи вә оқутқучиларға мәлумат бериш мәқситидә мушу һәптә ичидә америкидики индияна университети вә пенсилванийә университетида мәхсус муһакимә йиғинлири өткүзүлди.

Индияна университетида өткүзүлгән «тәрбийәләш лагеридики уйғурлар» темисидики йиғинда уйғурлар дияриниң һазирқи вәзийити, лагерларда немиләр болуватқанлиқи һәмдә уйғурлар үчүн немиләрни қилиш мумкинлики қатарлиқ мәсилиләр муһакимә қилинди.

Пенсилванийә университетида өткүзүлгән бир күнлүк мәхсус йиғинда хитайниң өткән оттуз йил мабәйнидә инсан һәқлирини қайси дәриҗидә аяқ-асти қилип кәлгәнлики, бу җәрянда уйғурларниң қандақ бәдәл төлигәнлики һәм төләватқанлиқи тәпсилий музакирә қилинди.

Пикирләр (0)
Share
Толуқ бәт