Һәптилик хәвәрләр (30-марттин 5-апрелғичә)

Мухбиримиз әзиз
2019-04-05
Елхәт
Пикир
Share
Принт
Һәптилик хәвәрләр (30-марттин 5-апрелғичә)
Һәптилик хәвәрләр (30-марттин 5-апрелғичә)
Photo: RFA

Давут абләт җәмәтидин 44 кишиниң тутқунда икәнлики дәлилләнди

Йеқинда дөрбилҗиндики җамаәт әрбаби давут абләтниң лагерға елип кетилгәнлики, шу қатарда униң җәмәтидин 44 кишиниң тутқунда икәнлики ашкара болди.

Давут абләтниң австралийәдики оғли абдуләһәд давут бу һәқтә мәлумат берип, дадисиниң өткән йили бир қетим лагердин дохтурханиға елип берилғанлиқини һәмдә давалаштин кейин йәнә лагерға елип кетилгәнликини билдүрди.

Мәлум болушичә, давут абләт илгири дөрбилҗин базарлиқ һөкүмәт шәһәр қурулуш ишханисиниң сабиқ мудири болуп ишлигән болуп, шу җайдики көпчиликниң һөрмитигә еришкән җамаәт әрбаби икән.

Алмас низамидинниң қамақтики аниси вә аялиниң учури мәлум болди

Австралийәдики уйғур муһаҗирлиридин алмас низамидин көп қетим австралийәдики мунасивәтлик һөкүмәт тармақлириға тутқун қилинған уруқ-туғқанлириниң мәсилисини йәткүзгәндин кейин йеқинда бу һәқтә йеңи хәвәргә игә болған.

Австралийә ташқи ишлар министирлиқи алмас низамидинниң көп қетимлиқ тәлипи бойичә хитай һөкүмити билән алақиләшкән һәмдә хитай һөкүмитиниң җавабини алмасқа йәткүзгән.

Униңда ейтилишичә, алмасниң аяли бузәйнәп абдуришит «топлишип җамаәт тәртипини бузуш җинайити» билән әйиблинип йәттә йиллиқ қамаққа һөкүм қилинған. Алмасниң анисиму америкадин туғқан йоқлаш үчүн үрүмчигә қайтқинида келинигә охшаш җинайәт билән әйиблинип қолға елинған.

Марийә муһәммәтниң җәмәтидин 60 тин артуқ киши тутқун қилинған

Американиң бостон шәһиридә олтурушлуқ марийә муһәммәд йеқинда радийомиз зияритини қобул қилип, атуштики уруқ-туғқанлиридин 60 нәччә кишиниң тутқун қилинғанлиқини билдүрди.

Марийә ханимниң ейтишичә, униң атушта қаранчуқсиз қалған 90 яшлиқ аниси йеқинда үндидар арқилиқ униңға лагерға вә түрмигә елип кетилгән уруқ-туғқанлири һәққидә хәвәр бәргән. Шундақла «өйдә мәнла қалдим. Өлүп қалсам мени йәрликкә қойғудәк туғқанларму қалмиди» дегән.

Мәлум болушичә, марийә муһәммәдниң җәмәтидикиләр «қуран кәрим» ни уйғур тилиға тәрҗимә қилған мәрһум муһәммәд салиһ дамолламниң йеқин туғқанлиридин икән.

Д у қ һәйитиниң канададики зиярити ғәлибилик аяғлашти

Д у қ ниң рәиси долқун әйса башчилиқидики һәйәт гурупписиниң канададики икки һәптилик хизмәт зиярити ғәлибилик аяғлашти.

Һәйәт әзалири бу қетим канададики шәрқий түркистан аммиви тәшкилатлири билән учрашти шуниңдәк канада һөкүмити, көчмәнләр министирлиқи вә канада парламентидики мәсул кишиләр билән сөһбәттә болуп уйғурларниң тәләплирини йәткүзди.

Бу җәрянда улар йәнә бир қисим алий мәктәпләрдә доклат берип уйғурларниң нөвәттики әһвали һәққидә һәр саһә кишилиригә мәлумат бәрди.

Уйғур яш-өсмүр тәнһәрикәтчилири тайландтин дуня чемпийони болуп қайтти

Йеқинда тайланд пайтәхти баңкок шәһиридә аяғлашқан әркин муштлишиш дуня мусабиқисидә қазақистанлиқ уйғур маһирлар бирнәччә алтун медални қолға кәлтүрди.

Алмута вилайитидин мусабиқигә барған уйғур маһирлардин соһраб һашимҗанов яшлар командиси бойичә алтун медалға еришкән.

Маһирларниң йәнә бири бу йил 7-синипта оқуватқан шакичик әлишир султан хоҗайев болуп, бу қетим униң тунҗи қетим дуня чемпийони болуши икән. Бу маһирлар буниңдин илгириму явропа вә асия районида көп қетим мусабиқиләргә қатнишип яхши нәтиҗиләрни қолға кәлтүргән икән.

Мусулманлар җамаитигә уйғурлар мәсилиси паал аңлитилмақта

Уйғур җәмийити дуч келиватқан еғир сиясий бастуруш һәрикитини һәрқайси җайлардики мусулманлар җамаитигә билдүрүш үчүн муһаҗирәттики уйғурлар паал һәрикәтләрдә болмақта.

Йеқинда теннеси шитатиниң мемфес шәһридики уйғур муһаҗирлиридин әзиз сулайман шу җайдики «мусулманлар һәптилики» көргәзмә залида уйғур дияридики лагерлар мәсилиси әкс әттүрүлгән фото сүрәтләр көргәзмиси уюштурған һәмдә уйғурларниң һазирқи әһвалини тонуштурған.

Австралийәдики уйғур ханимлириму бу җәһәттә пидакарлиқ көрситип, седний шәһиридә тунҗи қетимлиқ «уйғур мәдәнийәт күни» паалийитини тәшкиллигән һәмдә уйғур мәдәнийитиниң қандақ бузғунчилиқларға учраватқанлиқини җанлиқ усулда көрситип бәргән.

Америкадики уйғур паалийәтчиләрниң паал күч чиқириши нәтиҗисидә әһмәдийләр мәзһибиниң бу йил америка дөләт мәҗлисидә өткүзүлгән йиллиқ йиғиниму мәхсус уйғурларға беғишланди.

Толуқ бәт