Heptilik xewerler (30-marttin 5-aprélghiche)

Muxbirimiz eziz
2019-04-05
Élxet
Pikir
Share
Print
Heptilik xewerler (30-marttin 5-aprélghiche)
Heptilik xewerler (30-marttin 5-aprélghiche)
Photo: RFA

Dawut ablet jemetidin 44 kishining tutqunda ikenliki delillendi

Yéqinda dörbiljindiki jama'et erbabi dawut abletning lagérgha élip kétilgenliki, shu qatarda uning jemetidin 44 kishining tutqunda ikenliki ashkara boldi.

Dawut abletning awstraliyediki oghli abdul'ehed dawut bu heqte melumat bérip, dadisining ötken yili bir qétim lagérdin doxturxanigha élip bérilghanliqini hemde dawalashtin kéyin yene lagérgha élip kétilgenlikini bildürdi.

Melum bolushiche, dawut ablet ilgiri dörbiljin bazarliq hökümet sheher qurulush ishxanisining sabiq mudiri bolup ishligen bolup, shu jaydiki köpchilikning hörmitige érishken jama'et erbabi iken.

Almas nizamidinning qamaqtiki anisi we ayalining uchuri melum boldi

Awstraliyediki Uyghur muhajirliridin almas nizamidin köp qétim awstraliyediki munasiwetlik hökümet tarmaqlirigha tutqun qilin'ghan uruq-tughqanlirining mesilisini yetküzgendin kéyin yéqinda bu heqte yéngi xewerge ige bolghan.

Awstraliye tashqi ishlar ministirliqi almas nizamidinning köp qétimliq telipi boyiche xitay hökümiti bilen alaqileshken hemde xitay hökümitining jawabini almasqa yetküzgen.

Uningda éytilishiche, almasning ayali buzeynep abdurishit "Topliship jama'et tertipini buzush jinayiti" bilen eyiblinip yette yilliq qamaqqa höküm qilin'ghan. Almasning anisimu amérikadin tughqan yoqlash üchün ürümchige qaytqinida kélinige oxshash jinayet bilen eyiblinip qolgha élin'ghan.

Mariye muhemmetning jemetidin 60 tin artuq kishi tutqun qilin'ghan

Amérikaning boston shehiride olturushluq mariye muhemmed yéqinda radiyomiz ziyaritini qobul qilip, atushtiki uruq-tughqanliridin 60 nechche kishining tutqun qilin'ghanliqini bildürdi.

Mariye xanimning éytishiche, uning atushta qaranchuqsiz qalghan 90 yashliq anisi yéqinda ündidar arqiliq uninggha lagérgha we türmige élip kétilgen uruq-tughqanliri heqqide xewer bergen. Shundaqla "Öyde menla qaldim. Ölüp qalsam méni yerlikke qoyghudek tughqanlarmu qalmidi" dégen.

Melum bolushiche, mariye muhemmedning jemetidikiler "Qur'an kerim" ni Uyghur tiligha terjime qilghan merhum muhemmed salih damollamning yéqin tughqanliridin iken.

D u q hey'itining kanadadiki ziyariti ghelibilik ayaghlashti

D u q ning re'isi dolqun eysa bashchiliqidiki hey'et guruppisining kanadadiki ikki heptilik xizmet ziyariti ghelibilik ayaghlashti.

Hey'et ezaliri bu qétim kanadadiki sherqiy türkistan ammiwi teshkilatliri bilen uchrashti shuningdek kanada hökümiti, köchmenler ministirliqi we kanada parlaméntidiki mes'ul kishiler bilen söhbette bolup Uyghurlarning teleplirini yetküzdi.

Bu jeryanda ular yene bir qisim aliy mekteplerde doklat bérip Uyghurlarning nöwettiki ehwali heqqide her sahe kishilirige melumat berdi.

Uyghur yash-ösmür tenheriketchiliri taylandtin dunya chémpiyoni bolup qaytti

Yéqinda tayland paytexti bangkok shehiride ayaghlashqan erkin mushtlishish dunya musabiqiside qazaqistanliq Uyghur mahirlar birnechche altun médalni qolgha keltürdi.

Almuta wilayitidin musabiqige barghan Uyghur mahirlardin sohrab hashimjanow yashlar komandisi boyiche altun médalgha érishken.

Mahirlarning yene biri bu yil 7-sinipta oquwatqan shakichik elishir sultan xojayéw bolup, bu qétim uning tunji qétim dunya chémpiyoni bolushi iken. Bu mahirlar buningdin ilgirimu yawropa we asiya rayonida köp qétim musabiqilerge qatniship yaxshi netijilerni qolgha keltürgen iken.

Musulmanlar jama'itige Uyghurlar mesilisi pa'al anglitilmaqta

Uyghur jem'iyiti duch kéliwatqan éghir siyasiy basturush herikitini herqaysi jaylardiki musulmanlar jama'itige bildürüsh üchün muhajirettiki Uyghurlar pa'al heriketlerde bolmaqta.

Yéqinda ténnési shitatining mémfés shehridiki Uyghur muhajirliridin eziz sulayman shu jaydiki "Musulmanlar heptiliki" körgezme zalida Uyghur diyaridiki lagérlar mesilisi eks ettürülgen foto süretler körgezmisi uyushturghan hemde Uyghurlarning hazirqi ehwalini tonushturghan.

Awstraliyediki Uyghur xanimlirimu bu jehette pidakarliq körsitip, sédniy shehiride tunji qétimliq "Uyghur medeniyet küni" pa'aliyitini teshkilligen hemde Uyghur medeniyitining qandaq buzghunchiliqlargha uchrawatqanliqini janliq usulda körsitip bergen.

Amérikadiki Uyghur pa'aliyetchilerning pa'al küch chiqirishi netijiside ehmediyler mezhibining bu yil amérika dölet mejliside ötküzülgen yilliq yighinimu mexsus Uyghurlargha béghishlandi.

Toluq bet