Heptilik xewerler (11-maydin 17-mayghiche)

Muxbirimiz eziz
2019-05-17
Élxet
Pikir
Share
Print
.
.
forward.com

Lagér shahiti gülzire awulqanqizi lagérdiki bir qisim wehshiliklerni ashkarilidi

Ghulja nahiyesidiki ayallar lagérigha ikki yildin artuq qamalghan gülzire awulqanqizi lagérdin chiqqandin kéyin özi körgen bir qisim réyalliqni tashqi dunyagha ashkarilidi.

Gülzire özige eng tesir qilghan ishlar qatarida bir qisim ayal tutqunlarning yérim kéchide élip chiqip kétilgenche ghayib bolup kétidighanliqini, éghir turmush we atalmish öginish bésimliri, mejburiy choshqa göshi yégüzüsh, tekshürüsh ömekliri kelgendiki aldamchiliq qilmishliri qatarliqlarni ashkarilidi.

Gülzirening bu qétimqi guwahliq bayanliri xitay hökümitining lagérlar heqqidiki yalghanlirining epti-beshirisini yene bir qétim échip tashlidi.

Amérika tashqi ishlar ministirliqi: " Amérika hökümiti Uyghurlarning yénida!"

Amérikaning mu'awin yardemchi tashqi ishlar ministiri skot busby yéqinda radiyomiz ziyaritini qobul qilip, amérika hökümiti we xelqning Uyghurlarning yénida ikenlikini bildürdi.

Skot busby amérika tashqi ishlar ministirliqining démokratiye, kishilik hoquq we emgek byurosining mes'ul rehbiri bolup, u ilgiri Uyghur weziyiti heqqide dölet mejliside guwahliq bergen. U shu qétim 800 mingdin 2 milyon'ghiche ademning xitay Uyghur rayonida qurghan lagérlargha qamalghanliqini tunji qétim otturigha qoyghan idi.

Söhbet jeryanida skot busbiy amérika hökümitining Uyghur diyaridiki siyasiy basturush heriketliri we lagérlar mesilisi boyiche némilerni qiliwatqanliqi toghrisida melumatlar berdi.

Bu yilliq "Anilar bayrimi" muhajirettiki Uyghurlar üchün qayghuluq bir kün boldi

Her yili 12-may küni dunya boyiche ötküzülidighan "Anilar bayrimi" muhajirettiki Uyghurlar üchün tolimu qayghuluq bir kün boldi. Chünki ata-anisining lagérlargha qamalghanliqi muhajirettiki köpligen Uyghurlargha ortaq bir qismet bolmaqta idi.

Bir qisim Uyghur yashliri bu munasiwet bilen munasiwetlik torlarda öz yazmilirini élan qilsa, yene beziler öz anilirining erkinlikke chiqishi üchün dawamliq küresh qilidighanliqini bildürdi.  

Melum bolushiche, nöwette muhajirettiki köp qisim Uyghurlar ata-aniliri bilen hetta téléfonda sözlishish imkanighimu ige emes bolup, beziler buni "21-Esirdiki chékige yetken milliy zulumning bir türlük inkasi," dep qarimaqta iken.  

Erwine tursunning guwahliqi norwégiye taratqulirida diqqet qozghidi

Yéqinda norwégiyede oquwatqan Uyghur yashliridin merwine tursunning lagérgha qamalghan anisi we taghisi heqqidiki guwahliqi norwégiye döletlik radiyosi we bir qisim yerlik gézitlerde élan qilindi.

Melum bolushiche, merwinening apisi we taghisi deslep maytagh shehiridiki lagérgha élip kétilgen, kéyinche ulargha qamaq jazasi bérilip türmige yötkelgen.  

Merwine öz kechürmishlirige birleshtürgen halda muhajirettiki Uyghurlarning xitay lagérlirigha qamalghan uruq-tughqanliri mesiliside süküt qilmasliqini, eksiche bu zulumlarni tashqi dunyagha ashkarilashning zörür ikenlikini alahide tekitlidi.

Xitayning "Asiya medeniyetler diyalogi" yighini chaqirishi tenqidke duch keldi

Mushu heptide xitay re'isi shi jinpingning teshebbusi bilen chaqirilghan "Asiya medeniyetler diyalogi" yighini béyjingda ötküzüldi.

Yighinda shi jinping medeniyetlerning köp xilliqi hörmetleshni tekitlep, "Bashqa medeniyetlerni özgertishke yaki uning ornigha bashqa bir medeniyetni dessitishke urunush idrak jehettin exmiqanilik, usul jehettin apet xaraktérliktur," dégen.

Halbuki, xitay hökümiti Uyghur diyarida ijra qiliwatqan siyasiy basturushta Uyghurlarni xitaylashturush, Uyghurlarning tili we medeniyitini pütünley yoqitishni nishan qiliniwatqanliqi melum. Analizchilar bu heqte pikir qilip, "Bu xitay hökümitining qilidighanni qilip bolup, özlirini aliyjanab qilip körsitishidin bashqa nerse emes," dédi.  

Yehudiy teshkilatliri Uyghurlar üchün dawamliq pa'aliyet ötküzmekte

Öz tarixida irqiy qirghinchiliqni bashtin kechürüp baqqan yehudiylarning herqaysiy jaylardiki teshkilatliri Uyghurlar duch kéliwatqan milliy paji'elerni tashqi dunyagha anglitishni dawam qilmaqta.

En'gliyening london shehiridiki yehudiy kishilik hoquq teshkilatliridin "Renié kassén teshkilati" mexsus muhakime yighini chaqirip, Uyghurlarning hazirqi ehwali heqqide doklat bergen. Doklatqa bir qisim dölet erbabliri, muxbirlar we bashqa sahelerdin kelgenler qatnashqan.

Amérikadiki yehudiylarning eng uzun tarixqa ige "Algha" tor zhurnili, "Dunya yehudiy közitish teshkilati" qatarliqlarmu Uyghurlar heqqide mexsus témidiki maqalilerni élan qilish arqiliq dunyani Uyghurlargha köngül bölüshke chaqiriq qildi.

Toluq bet