Һәптилик хәвәрләр (1-июндин 7-июнғичә)

Мухбиримиз сада
2019-06-07
Елхәт
Пикир
Share
Принт
Д у қ рәиси долқун әйса әпәнди д у қ ға тәқдим қилинған «демократийә мукапати» ни тапшуруп алғандин кейин, мухбирниң зияритини қобул қилмақта. 2019-Йили 4-июн, вашингтон.
Д у қ рәиси долқун әйса әпәнди д у қ ға тәқдим қилинған «демократийә мукапати» ни тапшуруп алғандин кейин, мухбирниң зияритини қобул қилмақта. 2019-Йили 4-июн, вашингтон.
RFA

Демократийәни илгири сүрүш фондиниң 2019-йиллиқ «демократийә мукапати» д у қ ға берилди

Демократийәни илгири сүрүш фондиниң йиллардин бери тарқитип келиватқан «демократийә мукапати» 2019-йили дуня уйғур қурултийи, хитайға ярдәм тәшкилати, тибәт һәрикити институти қатарлиқ үч тәшкилатқа берилди.

Бу йиллиқ мукапат тарқитиш мурасими 4-июн күни америка дөләт мәҗлисидә өткүзүлди. Мурасимға америка авам палатасиниң рәиси, америка сиясий сәһнисидики үчинчи номурлуқ шәхс нәнсий пелоси, америка дөләт мәҗлиси әзалиридин елизабет ченей, җакуин кастро, майк мәккаул, җим мәкговерин қатарлиқлар қатнашти вә муһим сөз қилди.

Бу йиллиқ «демократийә мукапати» ни тапшурувалған дуня уйғур қурултийиниң рәиси долқун әйса әпәнди сөз қилип, «бу мукапатниң бизгә берилиши уйғурларни хәлқараға изчил ‹террорчи' дәп тәшвиқ қиливатқан хитай һөкүмитигә берилгән бир җаваб,» деди.

Нәнсий пелуси: «уларниң уйғурларға йүргүзүватқини мәдәнийәтлик инсанлар қилидиған иш әмәс»

4-Июн америка дөләт мәҗлисидә «тийәнәнменниң 30-йили: хитайдики бастурушниң тәдриҗий тәрәққиятини қайта баһалаш» намлиқ бир гуваһлиқ бериш йиғини ечилди.

Йиғинға қатнашқан америкадики нопузлуқ әрбаблардин йиғин риясәтчиси җеймис микговерн, кеңәш палатаси әзаси марко робийо вә томас соузи, авам палатаси әзаси кристофер симит қатарлиқлар хитайниң нөвәттә уйғурларға йүргүзүватқан еғир зулум сияситини арқа-арқидин оттуриға қойди.

Мәзкур йиғинға йәнә америка авам палатасиниң рәиси нәнсий пелуси ханимму гуваһлиқ бәргүчи сүпитидә қатнашти. У баянлирида хитайниң уйғурларға қаратқан бастуруш сиясәтлирини тилға елип, «уларниң нөвәттә уйғурларға йүргүзүватқини мәдәнийәтлик инсанлар қилидиған иш әмәс,» деди.

Дуняниң һәрқайсий җайлиридики уйғурлар бирликтә бу йиллиқ роза һейтни тәбриклиди

Нөвәттә уйғурларниң диний әркинлики еғир зиянкәшликкә учраватқан бир мәзгилдә муһаҗирәттики уйғур җамаити бу йиллиқ роза һейтни еғир қайғу ичидә күтүвалди.

4-Июн америка уйғур бирләшмиси тәрипидин тәшкилләнгән роза һейт намизиға вашингтон шәһири, вирҗинийә вә марийланд шитатлиридики бир қисим уйғурлар қатнашти. Җамаәт һейт хутбисидин кейин бирликтә вәтәндики лагерларға қамалған кишиләргә әркинлик вә һөрлүк тиләп дуаға қол көтүрди.

Америкадин башқа йәнә түркийә, қазақистан, қирғизистан, германийә, шиветсийә, голландийә, австиралийә, канада қатарлиқ дөләтләрдики уйғур җамаитиму бир йәргә йиғилип, бирликтә һейт намизи оқуди вә өз-ара һейтлишип, уйғурларниң миллий өрп-адитини толуқ намаян қилди.

Америка хәлқара диний әркинлик алаһидә әлчиси сам бровнбәк: «хәлқара җәмийәтниң уйғур мәсилиси үчүн һәрикәткә өтидиған вақти кәлди»

Америка хәлқара диний әркинлик алаһидә әлчиси сам бровнбәк роза һейт күни радийомиз зияритини қобул қилип, хитайни уйғур дияридики диний етиқади сәвәблик тутқун қилиниватқан уйғурлани қоюп беришкә вә хәлқара җәмийәтни уйғур мәсилиси үчүн һәрикәткә өтүшкә чақиридиғанлиқини билдүрди.

Сам бровнбәк сөзидә нөвәттә «сақчи дөлити» дә яшаватқан уйғур хәлқиниң чоқум үмидвар болишини, америка һөкүмитиниң даим уларниң йенида туридиғанлиқини тәкитләп өтти. У йәнә уйғурларниң вәзийитигә инкассиз туруватқан мусулман әллирини уйғурларниң диний әркинлики үчүн көкрәк керип оттуриға чиқишқа чақирди.

«Уйғур һәптилики» муһакимә йиғининиң ечилиш мурасими америка дөләт мәҗлисидә өткүзүлди

Дуня уйғур қурултийи саһибханилиқидики «хитайдики явузлуқларға қарши турайли: уйғурлар учраватқан боһранға дуняниң инкаси» темисидики илмий муһакимә йиғининиң ечилиш мурасими 6-июн күни америка дөләт мәҗлисидә өткүзүлди.

Мәзкур йиғинға америка дөләт мудапийә министирлиқниң һинди-тинч окян бихәтәрлик ишлириға мәсул ярдәмчи министири рандал шрайвер, америкиниң хәлқара диний әркинлик баш әлчиси сам бровнбәк, америка авам палатасиниң әзаси кристофер симис вә демократийәни илгири сүрүш фондиниң рәиси карл гершман қатарлиқлар алаһидә тәклип билән қатнашти вә уйғурларниң нөвәттики вәзийити һәққидә муһим сөз қилди.

Бу һәптә дуня уйғур қурултийи америка пайтәхти вашингтонда «уйғур һәптилики» паалийитини өткүзгән болуп, бу қетимлиқ илмий муһакимә йиғини буниң муһим мәзмунлириниң бири икән.

Толуқ бәт