Heptilik xewerler (8-iyundin 14-iyun'ghiche)

Muxbirimiz eziz
2019-06-14
Élxet
Pikir
Share
Print
"Amérika dölet mejlisi Uyghurlarni basturushqa qatnashqan xitay shirketlirini tekshürmekte" namliq maqalidin süretke élin'ghan.
"Amérika dölet mejlisi Uyghurlarni basturushqa qatnashqan xitay shirketlirini tekshürmekte" namliq maqalidin süretke élin'ghan.
buzzfeednews.com

Yazghuchi nurmuhemmet toxti lagérdin chiqip jan üzgen

Yéqinda Uyghur diyaridiki el söygen yazghuchilardin nurmuhemmet toxtining bir mezgil lagérgha qamalghanliqi we lagérdin chiqip bir aygha qalmay jan üzgenliki heqqide uchurlar tarqaldi.

Merhumning muhajirettiki perzentliri bu heqte melumat bérip, éghir derijidiki di'abit (shéker) késili bar bolghan yazghuchining yérim yilche lagérgha qamalghanliqini, uning bu yil mart éyining axiri lagérdin chiqip uzun ötmeyla wapat bolghanliqini bildürgen.

Melum bolushiche, nurmuhemmet toxti 1949-yili tughulghan bolup, özining köpligen nadir eserliri bilen Uyghur kitabxanlirining yüksek hörmitige érishken iken.

Lagér mehbuslirining balisi suda tunjuqup ölüp qaldi

Ötken ayda ijtima'iy taratqularda xotendiki melum bir östengge chüshüp ölüp ketken bir balini tonuwélish heqqide süretlik élan tarqalghan idi. Muxbirimizning bu heqte élip barghan éniqlashliri dawamida balining ölüm uchurining toghriliqi delillendi.

Yerlik saqchilardin biri bu weqening rast ikenlikini éytqan bolsimu, buning tepsilatidin xewersizlikini bildürdi. Bu balining ata-anisining qeyerde ikenliki namelum bolup, bir qisim kishiler ularni xotendiki lagérlarning biride bolushi mumkin, dep qarimaqta iken.

Ötken yilimu guma nahiyeside mushuninggha oxshash ata-anisi lagérgha qamalghan birnechche gödekning échinishliq halda ölüp ketkenliki melum bolghan idi.

Qelbinur xitaylar tartqan widiyodin anisini tonuwaldi

Muhajirettiki Uyghurlarning wetendiki uruq-tughqanliri bilen alaqisi pütünley üzüwétilgen ehwalda amérikadiki qelbinur xanim tasadipiy halda xitay sayahetchiler tartqan widiyolarning biridin anisini tonuwalghan.

Bu körünüshlerning biride uning anisi xitay sayahetchilerge polu étiwatqan bolup, "Erlerning hemmisi lagérda, tijaret qilghanlarning hemmisi ayallar iken" dégen témida tarqitilghan iken. Emma qelbinur anisining sodiger emeslikini, eksiche lagérdin chiqqandin kéyin öz hoylisida xitaylargha polu étishke mejbur bolghanliqini bildürgen.

Ehwaldin xewerdar kishilerning bildürüshiche, nöwette xitay hökümiti Uyghur diyarining "Tinch" we "Awat" ikenlikini teshwiq qilish üchün mushuninggha oxshash türlük wasitilerni qollanmaqta iken.

Bélgiye elchixanisidin qayturulghan Uyghurlar iz-déreksiz ghayib boldi

Hazir bélgiyede yashawatqan Uyghur muhajirliridin ablimit tursun yéqinda ayali we perzentlirini bélgiyege kélishke teklip qilghan. Emma uning a'ilisidikiler béyjingdiki bélgiye elchixanisigha köchmenler wizisi iltimas qilish üchün barghandin kéyin xitay saqchiliri ürümchige qayturup ketken we iz-déreksiz ghayib bolghan.

Ablimit tursunning bildürüshiche, bélgiye elchixanisi uning ayali we perzentlirining elchixanida qoghdinish telipini ret qilghan hemde xitay saqchilirigha xewer qilghan.

Béyjing shehiri we bélgiye tashqi ishlar ministirliqidiki alaqidar xadimlar bu mesililerge éniq jawab bermeywatqan bolup, nöwette bu kishilerning a'ile boyiche tutqun qilin'ghanliqi algha sürülmekte.

Amérika dölet mejlisi Uyghurlarni basturushqa qatnashqan xitay shirketlirini tekshürmekte

Yéqinda amérikadiki bir qisim aliy mektepler we fondi jem'iyetlirining Uyghur diyaridiki siyasiy basturushlargha biwasite yaki wasitilik halda hemdem boluwatqan xitay téxnologiye shirketlirige meblegh salghanliqi ashkara bolghan idi.

Bu munasiwet bilen amérika dölet mejlisidiki bir qisim palata ezaliri bu heqtiki alaqidar hemkarliq munasiwetlirini tekshürüsh teklipini otturigha qoyghan. Shundaqla "Buninggha tézdin xatime bérish lazim" dep körsetken.

Melum bolushiche, amérika-xitay soda urushining yuqiri pellige chiqishigha egiship, amérikadiki bir qisim shirketler xitay terep bilen bolghan bu xil hemkarliq munasiwetlirini üzüshke bashlighan.

Awstraliyediki Uyghurlar kolléktip guwahliq berdi

Mushu heptide awstraliyening adélayd shehiridiki Uyghurlar awstraliyening eng chong téléwiziyesi bolghan ABC téléwiziyesige kolléktip guwahliq bergen. Shu jaydiki 200 dek Uyghur bu pa'aliyetke qatnashqan.

Awstraliyediki Uyghurlar özlirining lagérgha we türmige qamalghan uruq-tughqanlirining resimlirini kötürüp, özlirige melumluq paji'elerni ixcham shekilde bayan qilghan.

Melum bolushiche, bu xildiki guwahliq bérish pa'aliyetliri arqiliq Uyghur diyaridiki zulumni tashqi dunyagha janliq anglatqili, shuningdek Uyghur dawasini téximu zor qollashqa ige qilghili bolidiken.

Toluq bet