Heptilik xewerler (26-öktebirdin 1-noyabirghiche)

Muxbirimiz eziz
2019-11-01
Élxet
Pikir
Share
Print
hepte-tor-maqale.jpg
hepte-tor-maqale.jpg
Photo: RFA

Amérika awam palatasi tashqi ishlar komitéti "Uyghur kishilik hoquq qanun layihesi" ni maqullidi

Amérika dölet mejliside muzakire qiliniwatqan "Uyghur kishilik hoquq qanun layihesi" 30-öktebir küni amérika awam palatasi tashqi ishlar komitéti chaqirghan mexsus yighinida mutleq üstünlük bilen maqullandi.

Yighinda palata ezaliri we komitét re'isi ayrim-ayrim söz qilip, Uyghurlar duch kéliwatqan zulumgha qarita tézdin tedbir qollanmighanda tarixtiki paji'elerning qayta yüz béridighanliqini alahide tekitlidi.

Mezkur qanun layihesi amérika kéngesh palatasida maqulluqtin ötken bolup, emdilikte uning awam palatasidiki eng yuqiri derijilik komitétta maqullinishi uning resmiy qanun bolup maqullinishidiki bir muhim qedem, dep qaralmaqta iken.  

Amérika we en'gliye qatarliq 23 dölet b d t da Uyghurlar heqqide ortaq bayanat élan qildi

Birleshken döletler teshkilati (b d t) da échiliwatqan irqiy ayrimichiliqqa qarshi turush témisidiki mexsus yighinda amérika, en'gliye, gérmaniye qatarliq 23 dölet Uyghurlar heqqide birleshme bayanat berdi.

Birleshme bayanatta Uyghur diyaridiki siyasiy basturush herikiti keskin eyiblendi hemde Uyghur diyarigha musteqil tekshürüsh guruppisi ewetishke yol qoyush telep qilindi.

Bu yil yazda 22 gherb döliti xitay hökümitining Uyghurlarni basturushini ortaq eyibligen bolup, bu qétimqi birleshme bayanat herqaysi sahelerning qizghin alqishigha érishti.  

Kuchadiki bir lagérdila 150 tin artuq kishining ölüp ketkenliki ashkarilandi

Yéqinda kucha nahiyesidiki bir lagérning özidila alte ay ichide 150 tin artuq kishining ölüp ketkenliki ashkarilandi.

Muxbirimizning ehwal éniqlishi jeryanida yerlik saqchilardin biri özi körgen ehwallargha asasen bu heqtiki so'allargha jawab berdi. Emma bularning qanchilikining qiynaq yaki késel sewebidin ölüp ketkenlikini dep bérelmidi.

Lagérlardin qutulup chiqqan shahitlarning bayanliridimu lagérlardiki ölüm-yitim hadisilirining éghirliqi alahide orun igileydighan bolup, xitay hökümitining uchurlarni qattiq kontrol qiliwélishi sewebidin bu heqte yenila köpligen sirlar mewjut bolmaqta.

Amérikadiki waskétbol heweskarliri Uyghur mesilisini NBA musabiqe meydanigha élip kirdi

Amérika waskétbol birleshmisi (NBA) ning washin'gton shehiridiki "Kapital bir" tenterbiye sariyida ötküzülgen musabiqiside bir guruppa Uyghur yashliri Uyghurlar we xongkonggha erkinlik telep qilish pa'aliyiti uyushturdi.

Özgiche teshkillen'gen bu pa'aliyette Uyghur yashliri maykilirigha bésilghan in'glizche xetlerdin "Gugul Uyghur" dégen jümlini hasil qilip, musabiqe ehlige Uyghurlar we xongkongluqlar duch kéliwatqan siyasiy basturushni yene bir qétim esletti.

Amérika waskétbol birleshmisi xongkongni qollash mesiliside xitaygha tiz pükkenlikte eyibliniwatqan bolup, yéqindin buyan bu xildiki naraziliq pa'aliyetliri köp qétim otturigha chiqqan.

Tursunjan emetning tutqun qilinishidiki sewebler  otturigha qoyuldi


2001-Yili Uyghur diyarida zor tesir qozghighan "Tembür weqesi" diki asasliq shexslerdin bolghan sha'ir tursunjan emetning tutqun qilin'ghanliqi hemde buninggha munasiwetlik ehwallar melum boldi.

Tursunjan emetning türkiyediki küy'oghli doghan erdoghan qéyin'atisining 18 yil burunqi bir parche shé'ir we qizini chet'ellikke yatliq qilghanliqi sewebidin tutqun qilin'ghanliqini algha sürdi.

Melum bolushiche, hazir tursunjan emet we uning ikki qizi lagérda bolup, doghan erdoghan ularning térrorluq bilen qilchilikmu alaqisi yoqluqini alahide eskertti.

Qazaqistanliq Uyghur tenheriketchi enwer di'as yene bir qétim dunya chémpiyoni boldi

Qazaqistandiki Uyghur ösmürliridin enwer di'as yéqinda ereb birleshme xelipilikide ötküzülgen braziliyeche erkin chélishish türide yene bir qétim dunya chimpyoni boldi.

Melum bolushiche, bu qétimliq musabiqige 22 memlikettin kelgen 600 din artuq tenheriketchi qatnashqan bolup, Uyghur mahirlar chélishish we bashqa tenterbiye türliride dunya chémpiyonluqini qolgha keltürgen.

Qazaqistandiki Uyghur ösmürliri hökümetning iqtisadiy yardimi bolmighan ehwalda ata-aniliri we bir qisim saxawetchilerning qollishi bilen meshiqni dawam qildurmaqta iken. Ata-anilarmu balilardin téximu zor ümidlerni kütmekte iken.

Pikirler (0)
Share
Toluq bet