Һәптилик хәвәрләр ( 25 - өктәбирдин 31 - өктәбиргичә )

Мухбиримиз җүмә
2008-10-31
Share

Германийә баш министири меркел ханим бейҗиңда уйғурлар мәсилисини оттуриға қойди

Германийә баш министири меркел ханим, 23 - өктәбир пәйшәнбә күни башлинип, шәнбә күни аяғлашқан 3 күнлүк хитай зиярити җәрянида, тибәт мәсилиси билән биргә йәнә, уйғурларниң кишилик һоқуқ вәзийитиниму алаһидә тилға алған шундақла германийә һөкүмитиниң бу икки районниң кишилик һоқуқ вәзийитигә йеқиндин диққәт қилип келиватқанлиқини әскәрткән.

Бу, германийә баш министириниң тунҗи қетим " уйғур " дегән кәлимини тилға елиши, шундақла хитай билән болған музакириләрдә уйғурларниң кишилик һоқуқ мәсилисини биваситә оттуриға қоюши болуп һесаблиниду.

Түркийә авази радиоси уйғур тилидики аңлитиш башлиди

26 - Өктәбир, түркийә дөләтлик радиоси уйғур тилида аңлитиш беришни башлиған болуп, шуниң билән чәтәлләрдә биваситә уйғур тилида аңлитиш беридиған радио истансилиридин йәнә бири көпәйди.

Мәлум болушичә, мәзкур радиониң уйғур тилидики программиси хәлқара хәвәрләр, түрк дуняси хәвәрлири, тил - мәдәнийәт вә тарих қатарлиқ мәзмунларда һәр күни бир саәттин икки қетим аңлитиш беридикән.

Түркийә авази радиоси түркийә радио - телевизийә идарисиниң қармиқидики түркийә җумһурийитигә вәкиллик қилидиған радио истансиси болуп, нөвәттә 10 миңдин артуқ ишчи - хизмәтчиси бар болған, 30 хил тилда аңлитиш беридиған әң чоң вә муһим ахбарат орнидур.

Уйғур алим әркин сидиқниң аләм техникиси саһәсидики йеңи кәшпияти мукапатқа еришти

Америка дөләтлик авиатсийә вә аләм бошлуқи идарисиниң калифорнийә штатиға җайлашқан бир тәтқиқат орниниң инженери доктур әркин сидиқ, аләм бошлуқидики телескопни йәр шари башқуруш мәркизидә туруп тәңшәштә ишлитидиған бир йеңи техника кәшип қилған болуп, алимниң мәзкур техника нәтиҗиси америка дөләтлик авиатсийә вә аләм бошлуқи идарисиниң алаһидә мукапатиға еришкән.

Игилишимизчә, бу техника техи тунҗи қетим иҗад қилинған болуп, 28 - өктәбир америка дөләтлик авиатсийә һәм аләм бошлуқи идарисиниң " кәшпият вә төһпә башқармиси" алимға, мукапат буюми һәм мукапатқа еришкәнлик шәрәп гуваһнамисини тәқдим қилиш мурасими өткүзгән.

Доктор әркин сидиқниң билдүрүшичә, у пәқәт һазир мукапат алған техникиси биләнла тохтап қалмиған болуп, у йеқинда йәнә өзи кәшип қилған икки хил йеңи техникини елан қилидикән.

Гуантанамодики уйғурларниң адвокати түрмә һәрбий даирилиригә наразилиқ билдүрди

26 ‏ - Өктәбир америкиниң гуантанамодики һәрбий түрмисидә тутуп турулуватқан 17 нәпәр уйғурниң баш адвокати сейбин веллит әпәнди, мәзкур тутқунлар мәсилисиниң америка федерал сотидики тәрәққиятини уйғур тутқунлириға йәткүзүш һәмдә улар билән сөһбәтлишиш үчүн, гуантанамоға кәлгән.

Тәрҗиманлиқ вәзиписини өтәватқан, уйғур америка бирләшмисиниң муавин рәиси, рошән ханимниң билдүрүшичә, гуантанамодики уйғур яшларниң роһи кәйпияти адәм һәйран қалғудәк дәриҗидә юқири болуп, улар әркинликкә еришиш үмидини қилчә йоқатмиған икән.

27 ‏ - Өктәбир мәзкур адвокат сейбин әпәнди, уйғур тутқунларни йәнила кишәнләнгән һалда көрүшни халимай, америка мудапиә министирликидин улар билән зәнҗир вә кишәнсиз әркин һаләттә учришишни тәләп қилған.

Тән җазасиға учриған уйғур сиясий мәһбуслири тоғрисидики доклат б д т ға йолланди

Дуня уйғур қурултийи баш штаби хитай түрмилиридә еғир қийин - қистақ вә тән җазалириға йолуққан уйғур сиясий мәһбуслири тоғрисида, мәхсус бир доклат һазирлап, алдинқи һәптә б д т қийин - қистаққа қарши туруш комитетиға йолланған.

Бу йил 11 - айда б д т қийин - қистаққа қарши туруш комитети җәнвәдә йиғин чақирип, хитайдики тән җазаси мәсилиси тоғрулуқ музакирә елип баридикән.

Мәлум болушичә,, д у қ йәнә бу йил 11 - айда хәлқара тәшкилатлар билән бирлишип, б д т баш шитабида хитайдики қейин - қистақлар һәққидә мәхсус йиғин чақиридикән һәмдә хитай түрмилиридә зулум чәккән уйғурларни тирик шаһидлар сүпитидә мәйданға чиқиридикән.

Хитайда меһманханилар уйғурларни қобул қилғанда дәрһал сақчиға мәлум қилиш буйруқи тапшурувалған

Йеқинда хитайниң бейҗиң шәһири хәйдийән райони тәвәсидики хуаюән йоли сақчиханиси өз районидики меһманхана вә мунча мулазимити билән шуғуллинидиған орунларға қарита бир уқтуруш чиқарған.

Уқтурушта көрситилишичә, хәйдийән районлуқ җамаәт хәвпсизлик тармақ идарисиниң тәлипигә асасән, һазирдин башлап хәйдйән райониға тәвә һәрқайси меһманхана вә ююнуш орунлири уйғур вә тибәт меһманларни қобул қилған болса, уларниң тәпсилий әһвалини дәрһал сақчиға мәлум қилиш вә мәзкур милләткә тәвә меһманларни қобул қилғанда уларниң гуваһнамилирини тәпсилий тәкшүрүш һәмдә "милләт" категорийисини әстайидил толдуруш тәләп қилинған.

Радиомиз игилигән мәлуматларға қариғанда, мәзкур уқтуруш әсли хитай һөкүмитиниң юқири дәриҗилик җ х органлири чүшүргән һөҗҗәтниң роһиға асасән чүшүрүлгән һәмдә бейҗиң шәһиридики һәрқайси меһманхана вә ююнуш мулазимити билән шуғуллинидиған орунларға бирдәк тарқитилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт