Heptilik xewerler (6 - dékabirdin 12 - dékabirghiche)

Muxbirimiz ümidwar
2008.12.12

Dunya insan heqliri küni boyiche namayishlar

12 - Ayning 10 - küni dunya insan heqliri xitabnamisining élan qilin'ghanliqining 60 ‏yilliqidur. Bu kün munasiwiti bilen xelq'ara miqyada xatirilesh pa'aliyetliri ötküzüldi.

Xelq'ara insan heqliri küni munasiwiti bilen bir qisim ellerdiki Uyghur teshkilatlirimu xitay elchixaniliri aldida naraziliq namayishliri ötküzüldi.

12 - Ayning 10 - küni istanbulda pa'aliyet élip bériwatqan sherqiy türkistan ijtima'iy teshkilatlardin, sherqiy türkistan ma'arip we hemkarliq jem'iyiti, sherqiy türkistan köchmenler jem'iyiti, sherqiy türkistan yashlar teshkilati qatarliq ammiwi teshkilatlar " sherqiy türkistan insan heqliri munbiri" nam astida bir yerge jem bolup, birlikte istanbuldiki xitay konsulxanisi aldida namayish pa'aliyiti élip bardi.

12 - Ayning10 - küni dunyawi kishilik hoquq xatire küni munasiwiti bilen yene kanada Uyghur jem'iyiti kanadaning toronto we wankowér shehridimu ötküzdi. Bu kün munasiwiti bilen yene shwétsiye qatarliq ellerdiki xitay konsulxaniliri aldidimu naraziliq namayishliri élip bérildi.

Dunya Uyghur qurultiyining teshkillishi bilen shu küni yene gérmaniyining miyunxén shehiridiki xitay konsulxanisi aldida keng kölemlik namayish élip bérilghan. Qazaqistanning almuta shehiride bolsa yighin échilghan.

Uyghur kishilik hoquq qurulushi Uyghurlar heqqide doklat élan qildi

Amérika Uyghur birleshmisi qarimiqidiki Uyghur kishilik hoquq qurulushi, 12 - ayning 11 - küni,xelq'ara kishilik hoquq küni munasiwiti bilen, Uyghurlarning kishilik hoquq weziyiti heqqide bir doklat élan qildi.

Bu doklatning bir alahidiliki shuki, buningda xelq'ara yerlik milletlerning hoquqini qoghdash ehdinamisidiki belgilimiler asas qilin'ghan bolup, Uyghurlarning yerlik millet bolush süpiti bilen ehdinamini belgilen'gen tégishlik hoquqlardin behrimen bolushi lazimliqi körsitilgen.

Bu doklatta yene Uyghurlarning kishilik hoquqlirining éghir derijide depsende boluwatqanliqi misallar arqiliq otturigha qoyulghan.

Bishkekte mehmut qeshqiri tughulghanliqining 1000 yilliqi xatirilendi

Qirghizistanning paytexti bishkek shehiride, Uyghur ittipaq jem'iyitining teshkillishi bilen 11 - esirde ötken büyük Uyghur alimi mehmut qeshqirining tughulghanliqining 1000 yilliqini xatirilesh pa'aliyiti ötküzüldi.

"Ittipaq" jem'iyitining mezkur daghdughiliq pa'aliyitige Uyghur jama'et wekilliri, her qaysi milletlerning medeniyet merkezlirining wekilliri shuningdek alimlar ishtirak qilghan.

2008 - Yilining b d t teripidin mehmut qeshqeri yili qilip békitilishi munasiwiti bilen türkiye, ezerbeyjan, türkmenistan, qirghizistan we qazaqistan qatarliq ellerde türlük shekilde xatirilesh pa'aliyetliri ötküzülgen bolup, qazaqistan we qirghizistandiki pa'aliyetlerni asasliqi Uyghur jem'iyetliri teshkilligen.

Amérika, xitayda kishilik hoquq pa'aliyetchilirining qolgha élinishliridin chongqur endishe qilghan

11 - Dékabir küni amérika tashqi ishlar ministirliki bayanatchisi shon mikkormak bayanat élan qilip, dunya omumi kishilik hoquq ehdinamisi élan qilin'ghanliqining 60 yilliq xatire künidin burun, xitayda kishilik hoquq pa'aliyetchilirining tutqun qilin'ghanliqigha da'ir xewerlerdin chongqur endishe qiliwatqanliqini bildürdi.

Shon mikkormak bu heqtiki bayanatida mundaq deydu: " amérika charshenbe küni xatirilesh pa'aliyiti ötküzüshke teyyarlan'ghan xitay puqralirining tutqun'gha uchrash, soraq qilinish we ighwagerchilikke uchrishidin chongqur endishe tuymaqta. Bolupmu biz da'iriler teripidin tutup turuluwatqan öktichi pikirdiki yazghuchi lyu shawboning ehwalidin pewqul'adde ensirewatimiz."

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.