Istanbulda “Ixlas Uyghur” namida réstoran échildi

Ixlas réstoranining ichki körünüshi. 2013-Yili öktebir, istanbul.

Uyghurlar dunyaning qeyirige barsun özining milliy ta'amlirini yéyishni yaxshi köridu, Uyghurlarning tamaq medeniyiti uzun tarixqa ige bolup, Uyghur tamaqliri mezzilik we ishtihaliq bolghanliqi üchün bir qétim yep körgen bashqa milletlermu asanla yaqturup qalidu.

Istanbulda arqa-arqidin Uyghur réstoranlar échilishqa bashlidi. Yéqinda istanbulning Uyghurlar eng köp olturaqlashqan zeytinburnu rayonida “Ixlas Uyghur” réstoran échildi.

2013-Yili 10-ayning 17-küni istanbulning zeytinburnu rayonidiki nuripasha mehellisining eysa yüsüp aliptékin kochida “Ixlas Uyghur réstorani” ning resmiy échilghanliqi élan qilindi we bu munasiwet bilen réstoran'gha ziyaretke kelgen kishilerge pütün bir kün kechkiche heqsiz tamaq bérildi.

Igilinishiche bu réstoranni istanbulning aqsaray rayonidiki “Türkistan Uyghur réstorani” ning xojayini ebeydulla ependi achqan bolup, bu réstoranda Uyghurlarning, lengmen, somen, manta, polu, kawap, chöchüre we suyuq'ash qatarliq tamaqliri tépilidiken.

Bu heqte ziyaritimizni qobul qilghan ebeydulla ependi “Ixlas” Uyghur réstoranni échishtiki meqsiti toghrisida toxtilip, ixlas Uyghur réstorani méhmanlargha ela mulazimet qilidighanliqini, ixlas bilen tamaq teyyarlaydighanliqini, shuning üchün réstoran'gha “Ixlas Uyghur” dep nam bergenlikini, xéridarlarni memnun qilishni birinchi orunda qoyidighanliqini, türk yaki bashqa milletlerge bir tereptin Uyghur ta'am medeniyetlirini tonushturush, yene bir tereptin iqtisadi kirim qilip igilik tiklesh ikenlikini, shuning üchün hazir istanbulning aqsaray we zeytinburnu qatarliq ikki orunda Uyghur réstoran achqanliqini, istanbulning laleli rayonida yene “Ixlas Uyghur” namida 3-réstoran échishni meqset qilip orun tutqanliqini yéqinda u yerdimu ishqa kirishidighanliqini bildürdi.

Yéqindin buyan istanbulgha köplep Uyghurlarning kélip olturaqlishishi bilen Uyghur dukan we shirketlermu arqa-arqidin échilishqa bashlidi.

Istanbulning bir qanche orunda Uyghurche réstoranlar bar bolup, topkapi türk dunyasi medeniyet baghchisida zinnet réstorani, findikzadide yüksel réstorani, aqsarayda, hayat réstorani, atush Uyghur réstorani, türkistan Uyghur réstorani, aqyol réstorani, qumkapida, méhman ottura asiya dastixini, dégen'ge oxshash réstoranlar bar. Zeytinburnuda bolsa, türkistan réstorani, zemzem réstorani, Uyghur ixlas réstorani dégen'ge oxshash réstoranlar bar.
Zeytinburnuda yene türkistan Uyghur nawayxanisi, teklimakan Uyghur qassapliqi dégen'ge oxshash dukanlar échilghan bolup, Uyghurlar xuddi Uyghur diyaridikige oxshash nawayxanidin Uyghurche nan sétiwalidu, Uyghur qassaptin gösh sétiwalidu, xalisa Uyghur réstoran'gha kirip Uyghurche tamaq yeydu. Zeytinburnuda yene Uyghurlar eng yaqturup istémal qilidighan yésiwilek, kerepshe we kökmash qatarliq köktatlarmu dukanlarda tépilidu.
Uyghur réstoranlarning köplep échilishining éhtiyaji we ehmiyiti toghrisida zeytinburnuda yashawatqan Uyghur ziyaliysi muminjanning pikir-qarashlirini alduq. Muminjan Uyghur réstoranlarning köplep échilishi, türklerge Uyghurlarni we Uyghur tamaq medeniyitini tonushturushta muhim ehmiyetke ige ikenlikini, bu arqiliq türklerning Uyghurlarni yaxshi bilishige türtke bolidighanliqini bildürdi.