Héyt küni qirghizistandiki mohtaj Uyghurlargha gösh tarqitildi

Qirghizistan Uyghurliri “Ittipaq” jem'iyiti uyushturghan qurbanliq tarqitish komitétining ezaliri artiq hajiyéf(soldin birinchi) ependining bashchiliqida héyt namizidin kéyin alla yolida saxawetlik ishlarni bashlidi. 2017-Yili 1-séntebir, qirghizistan.

Üch yildin buyan qirghizistandiki “Ittipaq” jem'iyiti chu wilayitining yéza-sheherliride mohtaj a'ililerge qurbanliqlarni tarqitip kelmekte.

1-Séntebir küni qirghizistandiki Uyghurlar dölette yashawatqan hemme musulman xelqler bilen birlikte ulugh qurban héyt namizi oqudi. Bayram ibadetliri memliketlik meschitlerde we bishkek shehirining merkiziy meydanida oquldi.

Qirghizistan Uyghurliri “Ittipaq” jem'iyiti uyushturghan qurbanliq tarqitish komitétining ezaliri artiq hajiyéf bashchiliqida héyt namizidin kéyin saxawetlik ishlarni bashlidi.

Üch yildin buyan “Ittipaq” jem'iyiti qirghizistan tewesidiki chu wilayitining Uyghurlar köp sanda yashawatqan yéza-sheherliride mohtaj a'ililerge qurbanliqlarni tarqitip kelmekte. Shundaqla 2016-yildin bashlap jenubiy wilayetliridimu qurbanliq qiliniwatidu. Her yili yardem körsitilgen a'ililerning sani köpiyiwatidu.

Qirghizistan'gha gérmaniye sherqiy türkistan uchur merkizidin abdujélil qaraqash ependi arqiliq 2015-yili 400 oshuq a'ililerge birinchi qétim qurbanliq ewetilgen idi.

Bu yili, gérmaniyening dyuséldorf shehiridiki türk qérindashlardin zhurnalist rejep atesh ependi qirghizistan'gha wekil bolup kélip, her qaysi milletlerdin 2000 gha yéqin mohtaj a'ililerge qurbanliq tarqitildi.

Ittipaq jem'iyitining aq-saqallar kéngishining re'isi mirzakim abdulow qurbanliq peqet Uyghurlargha emes, emma qirghiz, özbék, tatar we bashqa milletlerdiki miskin a'ililerge tarqitilghanliqini éytti.

Qurbanliq tarqitish komitéti bu üch yildin buyan saxawet ishlirini ilgiri sürüp kelmekte. Deslep yézilardiki yigit bashliri teripidin yétim-miskinlerning tizimliki teyyarlandi, pakiz qushxanilar tallandi. Deslep yézilardin, andin sheherlerdin yigit bashliri teklip qilinip halal göshler mehellilerge ewetildi.

Bu yili gérmaniyediki sherqiy türkistan uchur merkizi qirghizistan Uyghurliri “Ittipaq” jem'iyitining hemkarliqida héytning üch kün ichide chu wilayitide 200 din oshuq qoy qurban qilindi. Jenub tewesidiki osh, jalal-abad we özgen wilayetliride on bir buqa qurbanliqqa soyuldi. Shundaqla türkiyediki sherqiy türkistan “ Ma'arip” jem'iyiti teripidin 50 qoy qurbanliq qilindi. Bu yili qurbanliq gösh birinchi qétim issiq köl wilayitining qara-qol shehiridiki Uyghur jama'etchilikige ewetildi.

Qirghizistan Uyghurliri “Ittipaq” jem'iyitining re'isi artiq hajiyéf mushu saxawetlik ishlar qiliniwatqanliqi üchün yardem körsetken merkezler we shexslerge rehmitini bildürdi.

Qirghizistan Uyghurliri “Ittipaq” jem'iyitining muhim bir chariliridin biri -qirghizistan we dunya boyiche Uyghurlarni tonushturush: Uyghur xelqining medeniyet bayliqliri, örp-adetlerning qimmitini körsitishtur. Elwette qirghizistan puqraliri Uyghur xelqige rehmitini bildürüp turmaqta.

Hazir qirghizistanda hökümet sanliq melumati boyiche 60 ming etrapida Uyghur yashaydu. Uyghurlar özliri bolsa, emeliyette Uyghurlarning uningdin köp ikenlikini éytishmaqta. Uyghurlar özlirining tili, medeniyiti, örp-adetlirini yaxshi saqlap qalghan. Qirghizistan hökümiti dini étiqad erkinlikige yol qoyghanliqi üchün Uyghurlar dini pa'aliyetliri shuningdek milliy medeniyet pa'aliyetlirini dawamliq élip barmaqta.