Yawropada igilik tikligen Uyghurlar-tarim tiz tamaqxanisi

Ixtiyariy muxbirimiz ekrem
2013.07.17
tarim-tez-tamaqxanisi-restaurant.JPG Tarim tiz tamaqxanisi xojayini abdusalam ependi.
RFA/Ekrem

Chet'ellerde igilik tikligendin kéyin, Uyghur milliy herikiti we Uyghur milliy ma'aripigha, Uyghur medeniyiti hem ijtima'iy pa'aliyetlirige ashkara yaki yoshurun halda tégishlik yardemlerde bolup kéliwatqan saxawetlik baywechchiler az emes.

Tapqan pullirini yene musapirchiliq hayatta müshkilatlargha yoluqqanlarning béshini silashqa serp qilghan bezi kishilerning himmetlirining herqaysi ellerdiki Uyghurlar arisida hékaye qilinip kéliwatqinini pat-pat anglighili bolidu.

Gérmaniyining myunxén shehiridiki “Tarim tiz tamaqxanisi” bolsa, “Uyghur tiz tamaqxanisi” we “Yipek yoli tiz tamaqxanisi”din kéyin Uyghurlar teripidin échilghan yene bir tiz tamaq ashxanisi. “Tarim tiz tamaqxanisi” omumen türkche yémekliklerni asas qilghan bolup, ashxana xojayinining tili bilen éytqanda, bir a'ile kishilerning iqtisadi yükini kötürgendin sirt, tijariti yilséri algha bésip kéliwatqan bir ashxana.

“Tarim tiz tamaqxanisi”ni gérmaniyige kelginige 15 yildin ashqan abdusalam ependi achqan. Échilghinigha 4 yil bolghan bu ashxanining asasliq tamiqi yawropada omumlashqan türk dönerliri we tiz ta'amliri bolup, ta'amlarning temi, türi, bu yerning yerlik xelqliri gérmanlar we nopusi 3 milyondin ashidighan türkler hemde ereb, afghan qatarliq musulman milletlerge tonush bolghach, Uyghur ashxanilirigha oxshash yéngi ta'amlar üchün xéridar jelp qilish qiyinchiliqi bolmighan.

Gherb elliride tiz tamaqxanilarning tijariti réstoran we ashxanilargha oxshashla yürüshken. Nurghun kishiler waqit téjesh zörüriyiti bilen tiz tamaqxanilardin ozuqlinishni yaxshi köridu. Bolupmu, gérmaniyide chüsh mezgilidiki bir sa'etlik dem élishtin ünümlük paydilinishni közde tutqan köpinche kishiler, chüshlük ozuqluqini tiz tamaqxanilardin sétiwélishqa adetlen'gen bolup, türkche tiz ta'amlarmu “Jan'gha esqatidighan ta'amlar” qatarigha kirgen. Abdusalam ependining “Tarim tiz tamaqxanisi”mu shu sahege mensup.

Abdusalam ependining öz aldigha musteqil igilik tiklishi asan'gha toxtimighan. U ziyaritimizni qobul qilghanda, “Tarim tiz tamaqxanisi” ni échishtin ilgiriki 10 yildin artuq bir dewrde türk qérindashlarning qolida ishligenlikini, ma'ashi töwen bu xizmet bilen hallinish mumkinchiliki bolmisimu, lékin hazirqi türkche ta'amlarni teyyarlash hünerlirini ene shu japaliq yillarda özleshtürgenlikini, bir insan igilik tikleymen dése, choqum tégishlik bedel tölishi lazimliqini bayan qilip ötti.

Ashxana xojayini abdusalam ependi myunxén shehiridiki siyasiy pa'aliyetlerde aktip shexslerdin biri. U gérmaniyige kelgendin buyanqi hayatida bash shtabi myunxén shehiride bolghan yawropa sherqiy türkistan birliki teshkilatida uzun yil wezipe ötigen. U özining az-tola ronaq tapsa, chet'ellerdiki müshkülat ichide qalghan musapir qérindashlirigha we qolidin kelse wetendiki mezlum xelqige yardemde bolush arzuyi barliqini tilgha aldi. U yene myunxén shehiridiki yash-ösmürlerni terbiyilesh merkezlirige hemde Uyghur teshkilatlirigha yardemde bolushni bir mejburiyet dep qaraydighanliqini, tapqan pullirida milletning heqqi barliqini we pul tapqandin kéyin öz millitini, xelqini unutqan insanlarning her ikki dunyaliqining xeyrlik bolmaydighanliqini tekitlidi.

“Tarim tiz tamaqxanisi” ning xojayini abdusalam ependi sözide, ashxana xizmetlirini dep siyasiy pa'aliyetlerdin qol üzmigenlikini, Uyghur teshkilatliri éhtiyaj hés qilghanda derhal bérip yardemde bolup kéliwatqanliqini, myunxén shehiride ötküzülgen siyasiy hem medeniy pa'aliyetlerge aktip ishtirak qiliwatqanliqini eskertti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.