Türkiyediki Uyghur musapirlarning muhim qiyinchiliqlirini hel qilish qedimi bésildi

Uyghurlarning türkiyege köplep köchüp kélishi bilen, bolupmu 2014- 2015-yillirida malayshiya we tayland arqiliq köp sanda Uyghurning türkiyege köchüp kélishi netijiside, bu musapir Uyghurlarning qiyinchiliqlirimu köpiyishke bashlighan idi.

Bu Uyghurlar tagh, derya we déngizlarni éship pasportsiz türkiyege kelgen bolghachqa, bularning qiyinchiliqi téximu köp idi. Bir qanche yildin béri dunya Uyghur qurultiyi we türkiyediki Uyghur ammiwi teshkilatlirining tirishchanliqi netijiside bir qisim Uyghur musapirlarning türkiyede qanuniy turush ruxsiti, ishlesh ruxsiti we heqsiz dawalinish ishlirining hel qilin'ghanliqi bildürüldi.

1-Ayning 13-küni türkiye bash ministirliqidin bir hey'et Uyghur musapirlar turuwatqan qeyseridiki qoru jaygha bérip, ularning ehwalini közdin köchürgendin kéyin Uyghur meschitide yighin chaqirip, bu xosh xewerni yetküzdi. Bash ministirliqtin kelgen hey'etni kütüwalghan sherqiy türkistan medeniyet we hemkarliq jem'iyiti re'isi séyit tümtürk ependi bu heqte melumat berdi.

Séyit tümtürk ependi Uyghur musapirlarning hazirdin tartip saylash saylinish hoquqidin sirt bir türk puqrasi ige bolghan pütün heq we hoquqlargha ige bolghanliqini bayan qildi.

Uyghurlar olturaqlashqan qoru jaydiki Uyghur aqsaqalliridin dilshat islam ependi türkiye bash ministirliqtin kelgen kishining bu xosh xewerni yetküzgenlikini bayan qildi.

Dunya Uyghur qurultiyi mu'awin re'isi séyit tümtürk ependi burun Uyghur musapirlar késel bolup qalsa shexsi munasiwettin paydilinip heqsiz yaki erzan'gha dawalitishqa tirishqanliqini, emdi türkiye dölitining bir tutash halda bu qiyinchiliqni hel qilip bergenlikini tekitlidi.

2014-2015-Yilliri malayshiya we tayland arqiliq 7 ming etrapida Uyghur musapir pasportsiz türkiyege kelgendin kéyin, bu Uyghurlarning qanuniy turush ruxsiti, ishlesh ruxsiti élish we heqsiz dawalinishtin behrimen bolushini hel qilish üchün dunya Uyghur qurultiyi mu'awin re'isi séyit tümtürk ependi bashchiliqidiki hey'et türkiye bash ministiri binali yildirim, ijtima'iy parawanliq we emgek ministiri hem ichki ishlar ministirliri bilen uchrashqan idi.