Séyit tümtürk türkiye dölet re'isi rejep tayyip erdoghan'gha Uyghurlarning qiyinchiliqini anglatti

10-Ayning 1-küni türkiye parlaméntining xizmet bashlash murasimigha resmiy teklip boyiche ishtirak qilghan sherqiy türkistan medeniyet we hemkarliq jem'iyiti re'isi séyit tümtürk ependi we bashqurush hey'iti ezasi abdulqadir tümtürk ependi, échilish murasimi axirlashqandin kéyin türkiye dölet re'isi rejep tayyip erdoghan, parlamént bashliqi isma'il qehriman, bash ministir binali yildirim, bash ministir mu'awini numan qurtulmush, ichki ishlar ministiri sulayman soylu ependiler bilen ayrim-ayrim körüshüp, türkiyege kelgen musapir Uyghurlarning, shundaqla bir aydin béri istanbulda tutup buriliwatqan abdulqadir yapchan toghrisida melumat berdi, shundaqla bezi teleplirini otturigha qoydi.

Dunya Uyghur qurultiyi mu'awin re'isi séyit tümtürk ependi, pütün rehberler bilen parlaméntning zalida 5-6 minut körüshüp ehwal anglatqandin sirt yene bash ministir mu'awini, hökümet bayanatchisi numan qurtulmush özining parlamént binasidiki ishxanisida ularni qobul qildi. Numan qurtulmush ular bilen 20 minut uchriship, Uyghur larning hazirqi weziyiti, musapir Uyghurlar duchar boluwatqan qiyinchiliqlar, bolupmu abdulqadir yapchanning hazirqi ehwali toghrisida melumat berdi.

Bu uchrishishlarda séyit tümtürk ependi néme teleplerni otturigha qoydi? ular néme jawab berdi? bu heqte melumat igilesh üchün uchrishish axirida séyit tümtürk ependi bilen abdulqadir ependige mikrofonimizni uzattuq.

Biz séyit tümtürk bilen körüshken bezi dölet rehberliri bilen söhbet élip bérishni telep qilghan bolsaqmu ret qildi.

10-Ayning 1-küni türkiye parlaméntida yazliq tetildin kéyin xizmet bashlan'ghanliqi munasiwiti bilen murasim ötküzülgen bolup, murasimda parlamént re'isi isma'il qehriman, türkiye dölet re'isi rejep tayyip erdoghan, bash ministir binali yildirim söz qildi. Échilish murasimigha türkiye armiyisi bash shtabi bash qomandani aqar, herqaysi döletlerning türkiyede turushluq bash elchiliri, türkiyediki ammiwi teshkilat mes'ulliri ishtirak qilghan idi.

Türkiyede pa'aliyet élip bériwatqan Uyghur ammiwi teshkilatliri mes'ulliridin séyit tümtürk ependi bilen abdulqadirmu teklip boyiche mezkur murasimgha qatnashqan.