Гуваһчилар: қәшқәрдә уйғур үзүм содигәрлири солақта, хитай содигәрләр базарда

Мухбиримиз шөһрәт һошур
2017.12.04
Share on WhatsApp
Share on WhatsApp
turpan-kocha-uzum-305.jpg Турпан яшлар кочиси үзүм бариңи. 2005-Йили 10-феврал.
wikipedia.org

Қәшқәр бәшкерәмдә 32 миң мо бағдики үзүмниң зиян-зәхмәткә учриғанлиқи һәққидә әһвал ениқлашлиримиз давамида, йепиқ тәрбийәләш мәркәзлири үзүм базиридики уйғур тиҗарәтчиләрни пурсәттин мәһрум қалдурған болса, қәшқәрдики хитай тиҗарәтчиләргә пурсәт яритип бәргәнлики ашкариланди.

Мухбиримизниң телефонини қобул қилған бирнәччә хитай тиҗарәтчи өзлириниң иш-оқитиниң яхши икәнликини тилға елиш билән бирликтә, муқимлиқ тәдбирлири сәвәблик кочиларда адәм азлап кәткәнлики вә 19 ‏-қурултай сиясий һавасиниң үзүм базириға тәсир көрсәткәнликини йошурмиди.

Вәзийәттин хәвәрдар кишиләрниң баян қилишичә, бу йил уйғур районида давам қилған қаттиқ зәрбә долқунида уйғур содигәрләрниң муһим һуҗум нишанлиридин бири болуши, райондики бир қисим хитай тиҗарәтчилириниң ишини оң қилған. Қәшқәрдә бир қисим хитай қурулуш ишчилири, ишини ташлап базарда сода-сетиқ ишлириға арилашқан; бурун яймичилиқ қиливатқан хитай көчмәнлири бағларни һөддигә елип үзүм содигиригә айланған. Өзини ашкарилашни халимиған бир гуваһчиниң бу баянлири қәшқәргә қарита елип барған телефон зиярәтлиримиз давамида дәлилләнди. Өзиниң бәш йилдин буян қәшқәрдә яшаватқанлиқини илгири сүргән бир хитай көчмән өзиниң нөвәттә қәшқәрдә үзүм содиси билән шуғуллиниватқанлиқини баян қилди.

Йәнә бир нәпәр хитай тиҗарәтчи, өзиниң мәхсус үзүм вә анар содиси қиливатқанлиқини баян қилди. Өзиниң бәшкерәмдә мәхсус үзүм амбири барлиқини баян қилған бир хитай тиҗарәтчи, бу йил иш-оқитиниң пәвқуладдә яхши болғанлиқини тилға елип, өзиниң бир тоннидин төвән миқдарда үзүм алидиған херидарға қиззиқмайдиғанлиқини ейтти.

Қәшқәр шәһәр ичидә бу йил йеңидин дукан ачқанлиқини баян қилған йәнә бир хитай тиҗарәтчи, бу йил үзүмниң баһасиниң әрзан болушиниң сәвәби үстидә тохтитилип, қәшқәрдә кочиларда адәм азлап кәткәнлики, үзүм базирида истималчиларниңла әмәс, тиҗарәтчиләрниң йоқ дейәрлик азайғанлиқи қатарлиқ сәвәбләрни тилға алди. Хитай тиҗарәтчиләрниң йәнә баян қилишичә, 19 ‏-қурултай сәвәблик, қәшқәрдә уйғурлар иликидики сода-сетиқ ишлири бәзи җайларда еғир дәриҗидә ақсиған, бәзи җайларда пүтүнләй тохтиған. Буларниң баянлиридин йәнә мәлум болушичә, бу йил 19 ‏-қурултай мәзгилидә, аһалиләрниң мәхсус қурултай роһини өгинишкә йиғивелиниши, үзүмләрниң вақтида шехидин үзүлмәсликигә сәвәб болған. Үзүмниң шахта узун туруп қелиши, үзүмниң үшишигә сәвәб болған. Йәнә бәзи гуваһчиларниң баян қилишичә, бу йилқи йепиқ тәрбийә мәркәзлири сәвәблик үзүм бағлири асасән пәрвишсиз қалған вә мевиси кесәлгә муптила болған.

Үзүм содисиниң аз сандики кишиләрниң, йәни хитай көчмәнлириниң қолиға қелиши, үзүм гәрчә кесәлликкә учриған, кочиларда херидар азлап кәткән болсиму, бурундинла райондики етибар сиясәтлиридин бәһримән болуп келиватқан хитай көчмәнлиригә, җүмлидин хитай тиҗарәтчилириниң иш-оқитигә оңушсизлиқ елип кәлмигән, әксичә содида илгириләш пурсити яритип бәргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт