Сетилмай қалған үзүм һәққидә мураҗиәтнамә тарқатқан алимҗан из-дерәксиз

Мухбиримиз шөһрәт һошур
2017-12-05
Share
herbiy-saqchi-turme-terbiyelesh-ayal-bala.jpg Қучақтики балиси билән "йепиқ тәрбийәләш" орнидики ерини йоқлашқа кәлгән аял.
AP

Йеқинда қәшқәрниң бәшкерәм йезисида 10 миң мо бағдики үзүмләрниң үзүм содигәрлири йоқлуқи сәвәбидин бесилип қалғанлиқи һәққидә үндидарда бир мураҗиәтнамә елан қилинған иди.

Мухбиримиз бу әһвал һәққидики ениқлашлири давамида, мәзкур мураҗиәтнамини чиқарған алимҗан исимлик киши һәққидиму мәлумат сүрүштә қилди. Алақидар мәнбәләр алимҗан һәққидә һечқандақ учур берәлмиди. Вәзийәттин хәвәрдар кишиләрниң униң мәзкур мураҗиәтнамә сәвәблик тутулуп кәткәнлик еһтималлиқини пәрәз қилишмақта.

Мәзкур мураҗиәтнамидә қәшқәр бәшкерәмдә 10 миң мо бағдики үзүмниң органик оғут билән йетиштүрүлгәнлики, пәрвиш җәрянида һечқандақ химийиви мадда қоллинилмиғанлиқи қатарлиқ алаһидиликлири тонуштурулуш билән бирликтә, бу үзүмләрниң үзүм содигәрлири болмаслиқи сәвәбидин бесилип қалғанлиқи йезилған; шундақла деһқанларниң қийин вәзийити ишарәт қилинғандин кейин уйғур райониниң ичи-сиртидики херидарлар бу үзүмләрни сетивелишқа дәвәт қилинған.

Мураҗиәтнамә өзини деһқанлар вәкили дәп тонуштурған алимҗан исимлик бир киши тәрипидин тарқитилған. Уйғур районида вәзийәт вә мәсилиләрни әйнән инкас қилиш яки баян қилиш бурундинла даириләрниң дитиға яқмай кәлгән, бәзидә әндишисини қозғиған. Бу хил мәсилә инкас қилғанлар хитай дөләт аманлиқ хадимлириниң тәқиплишигә учриған иди. Шуңа биз бәшкерәмдики үзүм базириниң әһвалини ениқлаш давамида, алимҗанниң өзиниң ақивити һәққидиму мәлумат сүрүштә қилдуқ.

Мәзкур мураҗиәтнамидә, алимҗанниң қәшқәр вә үрүмчигә тәвә болған икки телефон номури йезилған. Һәр икки номурға тәкрар-тәкрар урулған телефонлар җавабсиз қалди.

Бәшкерәм мевә-чевә базиридики бир қисим тиҗарәтчиләрму, алимҗан һәққидә өзлириниң мәлумат йоқлуқини баян қилди.

Өзини ашкарилашни халимиған, бәшкерәм вәзийитидин хәвәрдар кишиләр, алимҗанниң көп еһтималлиқта тутқун қилинғанлиқ пәризини оттуриға қоюшти. Қәшқәр бәшкерәм сақчиханисиму, үзүм һәққидә мураҗиәтнамә чиқарған алимҗан һәққидә мәлумат берәлмиди. Бәшкерәм сақчихана башлиқи әйсаҗан телефонимизни қобул қилмиди.

Гәрчә алақидар мәнбәләр алимҗанниң ақивити һәққидә һечнемә дәп берәлмигән болсиму, бәшкерәм йезисиниң нөвәттики сиясий вәзийити йәни көп санда кишиләрниң йоқилаң сәвәбләр билән тәрбийәләш мәркәзлиригә әкетилгәнлики алимҗанниңму тутқун қилинғанлиқи һәққидики пәрәзниң асассиз әмәсликини дәлиллимәктә. Аһалиләрдин бири өзиниң вә 3 қериндишиниң аилисидин 5 кишиниң; алди- кәйни икки қошнисидин болса 3 кишиниң солақта икәнликини ашкарилиди.

Хитай тәшвиқат органлири алдинқи йили чиқарған бәлгилимисидә, җәмийәтниң қараңғу тәрәплирини ашкарилимаслиқ, сәлбий мәсилиләрни җәмийәттә тарқатмаслиқ һәққидә аһалиләрни мәхсус агаһландурған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт