Sétilmay qalghan üzüm heqqide muraji'etname tarqatqan alimjan iz-déreksiz

Yéqinda qeshqerning beshkérem yézisida 10 ming mo baghdiki üzümlerning üzüm sodigerliri yoqluqi sewebidin bésilip qalghanliqi heqqide ündidarda bir muraji'etname élan qilin'ghan idi.

Muxbirimiz bu ehwal heqqidiki éniqlashliri dawamida, mezkur muraji'etnamini chiqarghan alimjan isimlik kishi heqqidimu melumat sürüshte qildi. Alaqidar menbeler alimjan heqqide héchqandaq uchur bérelmidi. Weziyettin xewerdar kishilerning uning mezkur muraji'etname seweblik tutulup ketkenlik éhtimalliqini perez qilishmaqta.

Mezkur muraji'etnamide qeshqer beshkéremde 10 ming mo baghdiki üzümning organik oghut bilen yétishtürülgenliki, perwish jeryanida héchqandaq ximiyiwi madda qollinilmighanliqi qatarliq alahidilikliri tonushturulush bilen birlikte, bu üzümlerning üzüm sodigerliri bolmasliqi sewebidin bésilip qalghanliqi yézilghan؛ shundaqla déhqanlarning qiyin weziyiti isharet qilin'ghandin kéyin Uyghur rayonining ichi-sirtidiki xéridarlar bu üzümlerni sétiwélishqa dewet qilin'ghan.

Muraji'etname özini déhqanlar wekili dep tonushturghan alimjan isimlik bir kishi teripidin tarqitilghan. Uyghur rayonida weziyet we mesililerni eynen inkas qilish yaki bayan qilish burundinla da'irilerning ditigha yaqmay kelgen, bezide endishisini qozghighan. Bu xil mesile inkas qilghanlar xitay dölet amanliq xadimlirining teqiplishige uchrighan idi. Shunga biz beshkéremdiki üzüm bazirining ehwalini éniqlash dawamida, alimjanning özining aqiwiti heqqidimu melumat sürüshte qilduq.

Mezkur muraji'etnamide, alimjanning qeshqer we ürümchige tewe bolghan ikki téléfon nomuri yézilghan. Her ikki nomurgha tekrar-tekrar urulghan téléfonlar jawabsiz qaldi.

Beshkérem méwe-chéwe baziridiki bir qisim tijaretchilermu, alimjan heqqide özlirining melumat yoqluqini bayan qildi.

Özini ashkarilashni xalimighan, beshkérem weziyitidin xewerdar kishiler, alimjanning köp éhtimalliqta tutqun qilin'ghanliq perizini otturigha qoyushti. Qeshqer beshkérem saqchixanisimu, üzüm heqqide muraji'etname chiqarghan alimjan heqqide melumat bérelmidi. Beshkérem saqchixana bashliqi eysajan téléfonimizni qobul qilmidi.

Gerche alaqidar menbeler alimjanning aqiwiti heqqide héchnéme dep bérelmigen bolsimu, beshkérem yézisining nöwettiki siyasiy weziyiti yeni köp sanda kishilerning yoqilang sewebler bilen terbiyelesh merkezlirige ekétilgenliki alimjanningmu tutqun qilin'ghanliqi heqqidiki perezning asassiz emeslikini delillimekte. Ahalilerdin biri özining we 3 qérindishining a'ilisidin 5 kishining؛ aldi- keyni ikki qoshnisidin bolsa 3 kishining solaqta ikenlikini ashkarilidi.

Xitay teshwiqat organliri aldinqi yili chiqarghan belgilimiside, jem'iyetning qarangghu tereplirini ashkarilimasliq, selbiy mesililerni jem'iyette tarqatmasliq heqqide ahalilerni mexsus agahlandurghan idi.