Лагер шаһити гүлзирә: «қазақистан пуқралиқини елишта хәлқара таратқуларниң ярдими болди»

Мухбиримиз меһрибан
2020-03-12
Елхәт
Пикир
Share
Принт
Лагер шаһити гүлзирә авулқанқизиниң тәстиқланған қазақистан пуқралиқиға өтүш илтимаси.
Лагер шаһити гүлзирә авулқанқизиниң тәстиқланған қазақистан пуқралиқиға өтүш илтимаси.
Gülzire Awulqanqizi teminligen

Қазақистандики лагер шаһити гүлзирә авулқан қизиниң 11-март күни радийомизға билдүрүшичә, униң қазақистан һөкүмитигә сунған пуқралиқ илтимаси қобул болған. Қазақистан көчмәнләр идариси гүлзирәниң хитайдики лагерлириға мунасивәтлик учурлар һәққидә хәлқара таратқуларниң зияритини қобул қилмаслиқ вә башқа сиясий паалийәтләрдә болмаслиқ шәрти билән униңға пуқралиқ салаһийити бәргән.

Гүлзирә ханимниң билдүрүшичә, у буниң билән хитайға қайтурулуш әндишисидин қутулған. Әмма қазақистандики хитайға маһил күчләрниң униңға болған тәһдити йәнила мәвҗут икән.

Қазақистандики лагер шаһити гүлзирә авулқан қизи 2017-йили 7-айниң 19-күнидин 2018-йил 10-айниң 17-күнигичә ғулҗа шәһиридики мәлум лагерда 15 ай ятқан. 2018-Йили 10-айда лагердин қоюп берилгәндин кейин у йәнә ғулҗа шәһиридики мәлум лагер ичигә қурулған пәләй завутида икки ай мәҗбурий әмгәккә селинған. 2018-Йил 12-айниң ахири хитайниң ғулҗадики лагеридин қоюп берилип, 2019-йили киргәндә қазақистандики аилиси билән җәм болған.

Гүлзирә авулқан қизи өзиниң ғулҗадики лагерда бешидин көчүргән әһвалларни 2019-йили әтияздин башлап, иҗтимаий таратқуларда, әркин асия радийоси вә «америка авази» қатарлиқ хәлқара ахбарат васитилиридә үзлүксиз аңлитип кәлгән.

Гүлзирә авулқан қизиниң билдүрүшичә, униң қолида қазақистанда турушлуқ мәңгүлүк олтуруми бар болғини үчүн у 2018-йилиниң ахири лагердин қоюп берилгән һәмдә 2019-йилиниң бешида қазақистандики аилиси билән җәм болалиған. У қазақистанға келип узун өтмәйла, йәни 2019-йили 2-айниң 16-күни қазақистан пуқралиқиға өтүш илтимасини тапшурған.

Әмма у узун өтмәйла өзиниң қазақистан даирилири тәрипидин хитайға қайтурулидиғанлар тизимликидә исми барлиқини билгән. Буниң билән у өзини қазақистанда бихәтәр һес қилалмиған. Шу сәвәбтин у қазақистандики қазақ паалийәтчиси серикҗан биләшоғли қурған «ата юрт пидаийлири» тәшкилатиниң ярдими билән 2019-йилиниң ахиридин башлап, мунасивәтлик хәлқаралиқ кишилик һоқуқ органлиридин ярдәм сориған. У йәнә бу әһвалларни иҗтимаий алақә мунбәрлиригә йоллаш, әркин асия радийоси қатарлиқ хәлқара таратқуларда хәвәр қилиш йоли билән дуня җамаәтчиликидин ярдәм тәләп қилип кәлгән.

Гүлзирә ханим 2020-йили 2-айниң 26-күни қазақистан көчмәнләр идарисигә қайта барғинида өзиниң пуқралиқ илтимасиниң шәртлик қобул қилинғанлиқини билгән.

Гүлзирә ханим өзиниң қазақистан пуқралиқиға сунған илтимасиниң қобул болушида хәлқара таратқуларда өз әһвалини билдүргәнлики һәмдә қазақистандики кишилик һоқуқ тәшкилатлириниң ярдиминиң муһим рол ойниғанлиқини тәкитләп өтти.

Гүлзирә авулқан қизи 2019-йили 26-декабирда радийомиз зияритини қобул қилип, өзиниң хитайға қайтурулуш хәвпидә қалғанлиқини билдүргән вә хәлқара кишилик һоқуқ органлиридин ярдәм сориған иди.



Әйни чағда радийомиз гүлзирә авулқан қизиға охшаш қазақистанниң мәңгүлүк олтурумини алған кишиләрниң қазақистан пуқралиқиға өтүш илтимасиниң рәт қилинишиға қандақ ишларниң сәвәб болидиғанлиқини билиш үчүн вашингитондики қазақистан әлчиханисиға телефон қилған иди. Зияритимизни қобул қилған әлчихана хадими соалимизға җаваб берип, гүлзирә авулқан қизиниң әһвалини қазақистан көчмәнләр идарисидин соришимизни ейтқан иди.

Пикирләр (0)
Share
Толуқ бәт