Doxtur jür'et obul: “Shahimerdanning ölümige toktin zeximlinish seweb bolghan bolushi mumkin”

38 Yashliq shahimerdan lagérdin chiqipla ürümchide tuyuqsiz jan üzgen. Shahimerdanning muhajirettiki uruq-tughqanliri uning ölümige doxturxanida “Méngisige su chüshüsh” diyagnozi qoyulghanliqini uqqan. Shundin kéyin ular “Méngige su chüshüsh” ning sewebi heqqide tébbiy sahediki mutexessislerdin melumat sorighan. Mutexessisler shahimerdanning tokluq eswablar bilen qéyin-qistaqqa uchrighanliq éhtimalliqini bayan qilghan. Bu heqte ziyaritimizni qobul qilghan ürümchi ösme késellikler doxturxanisining sabiq tashqi késeller doxturi, hazir amérikada yashawatqan jür'et obul ependimu “Méngige su chüshüsh” ning seweblirini chüshendürüp, shahimerdanning ölümige tokluq eswabtin zeximlinishning seweb bolghan bolushi mumkinlikini bildürdi.

Lagérdin chiqip jan üzgen shahimerdan perhatning muhajirettiki taghisi haji qutluq qadirining bayan qilishiche, shahimerdan bir tére-bir ustixan halitide a'ilisige qayturulghan we a'iliside méngisi aghrip qattiq qiynalghandin kéyin doxturxanigha apirilghan. Doxturxanida uninggha “Méngisige su chüshüsh” diyagnozi qoyulghan. Shahimerdan dawalash ünüm bermey doxturxanida jan üzgendin kéyin, uning a'ilisi saqchilar teripidin nazaret astigha élin'ghan. Merhumning nezirni peqet uruq-tughqanliri bilenla ötküzüsh we ölüm sewebini “Rak késili” dep chüshendürüsh heqqide körsetme bérilgen.

Bu agahlandurushtin gumanlan'ghan doktor haji qutluq qadiri yaponiyediki alaqidar mutexessislerdin “Méngige su chüshüsh” ning sewebi heqqide melumat sorighan. Mutexessisler uninggha shahimerdanning tokluq eswablar bilen qéyin-qistaqqa uchrighanliq éhtimalliqini bayan qilghan.

Nöwette amérikada yashawatqan tashqi késeller doxturi we tébbiy gén ilmi tetqiqatchisi, doktor jür'et obul ependi bügün u heqte ziyaritimizni qobul qilip, “Méngige su chüshüsh” ning sewebi, jeryani we aqiwetliri heqqide qisqiche melumat berdi. Shahimerdanning beden sapasi we nöwettiki lagér weziyitini közde tutqan halda xulase chiqarghan jür'et obul ependi shahimerdanning ölümige tokluq eswabtin zeximlinishning seweb bolghanliqini asasliq éhtimalliq dep qaraydighanliqini otturigha qoydi. U yene amérikadiki méhrigül tursun qatarliq lagér shahitlirining guwahliq bayanatlirinimu nezerde tutqan halda xitayning lagérdikilerge qarita yéngiche qiyin-qistaq eswablirini sinaq qiliwatqanliq éhtimalliqinimu tekitlidi.

Doktor haji qutluq qadiri xitay terepning shahimerdanni qoyup bergen chaghda uning salametlik sewebidin qoyup bérilgenlikini tilgha alghan bolsimu, emma késellik ehwalini éniq bilip turup a'ilisige bildürmigenlikini we shu arqiliq shahimerdanning qiyin-qistaqta namelum tokluq eswablarning zerbisidin méngisige su chüshüp ölgenlikini yoshurghanliqini ilgiri sürdi.