“Altun böshük” téximu köp méhirlik qollarning tewritishige mohtaj

• Muxbirimiz gülchéhre
  2015-02-13

Chet'ellerge chiqip yerleshken Uyghurlar üchün élip éytqanda, yat medeniyet we yat til muhitida tughulup ösüwatqan ewladlirini qandaq qilghanda öz ana tili we medeniyiti bilen terbiyilesh yeni Uyghur kimlikini yoqatmasliq, emma Uyghurlarning bu arzusigha ularning tarqaq bolushidek makan we zaman riqabet yaratmaqta. Xushallinarliqi shuki, chet'ellerge kélip yerlishiwatqan Uyghurlarning milletke bolghan söygü we mes'uliyiti bilen bir yerge kélip xalis pidakarliq körsitishide, köpligen döletlerde Uyghur baliliri üchün her xil shekildiki Uyghur til mektep we kursliri meydan'gha kelmekte. Ularning oqutush usul wasitilirimu rengdarlashmaqta, gérmaniyening myunxén shehiride yashawatqan, bir qanche Uyghur ziyaliylar özlirining bar qabiliyetlirini ishqa sélip “Altun böshük” namidiki balilar programmisini torlarda tarqitish arqiliq dunyaning her qaysi jayliridiki téximu köp Uyghur balilirini Uyghur ana tili we medeniyiti bilen uchrishish pursitige érishtürmekte.

Yéqinda youtube Qatarliq tor betlerde “Altun böshük” namliq sehipilik Uyghur sin programmisi qoyulup “Balilar ning chüchük ana tilida sözlewatqan körünüshliri, ularning xasliqqa ige menilik pa'aliyetliri, programmining xéli yuqiri sewiyide ishlinishi Uyghurlar we körürmenlerning diqqitini chekti hem söyündürdi. Bolupmu bu programmining chet'ellerde türlük shara'it cheklimiliri tüpeyli perzentlirige Uyghur ana tilini ögitish imkaniyiti bolmaywatqan ata-anilarni söyündürgenliki melum.

“Altun böshük” programmisining ikkinchi qismi tarqitilghandin kéyin, programmidiki Uyghur balilirini teshkillep balilarning Uyghur tilida sözlesh, tepekkur qilish we yézish iqtidarini üstürüshning métod, taktikiliri üstide etrapliq oyliship, intayin qiziqarliq filim qilip ishlep tor betlerge qoyghan, sehne arqisidiki qehrimanlar bilen sizlerni tonushturushni toghra taptuq.

Gérmaniyening myunxén shehiri yawropadiki Uyghurlarning asasliq pa'aliyet merkizi. Bundaq bolushidiki seweb myunxén bashqa dölet we sheherlerge qarighanda hijrettiki Uyghur jama'iti bir qeder toplashqan sheher hésablinidu. Biz aldi bilen mezkur filimning rézhissori rida ependi bilen alaqileshtuq.

Memet rida ependining tonushturushi bilen, biz programmining tehrirlikini öz üstige alghan, balilarni Uyghur kimliki bilen terbiyileshte xalis küch qoshuwatqan ma'aripchi abduweli tursun ependi bilen tonushtuq.

Abduweli ependilerning bir yerge kélip Uyghur perzentlirini Uyghur kimliki bilen terbiyilesh üchün bash qoshushigha seweb bolghan we yéqinqi yillarda myunxéndiki talantliq Uyghurlardin karwan sen'et ömikining “Teklimakanda kömülgen riwayetler” namida medeniyet pa'aliyetlirini dawamlashturup kéliwatqan qazaqistanliq Uyghur nurnisa xanim, özining yéqinqi yillardin buyan Uyghur medeniyitini tonushturush we Uyghur balilirini ana tili we medeniyiti boyiche terbiyileshke xalis küch chiqirishigha türtke bolghan amillarni we buningdin kéyinki pilanlirini tonushturup ötti.

Myunxéndiki Uyghur jama'iti ichide uzun yillardin buyan yashap aktip pa'aliyet élip bériwatqan Uyghurlardin ablimit tursun ependi bolsa, nurnisa xanim, xalise xanim, rida ependi we abduweli ependilerning Uyghur balilirining ana tili we öz medeniyitini öginish ünümini yenimu yuqiri körüsh üchün bash qaturup, sen'et programmiliri we medeniyet pa'aliyetlirinimu birlikte uyushturup kéliwatqanliqidin myunxéndiki Uyghur jama'itining özige oxshashla intayin memnun ikenlikini éytip, ularning ejrige teshekkür bildürdi.