Oslodiki Uyghur ana tili mektipide 3D liq oqutush programmisi yolgha qoyulghan

Muxbirimiz méhriban
2018-12-11
Élxet
Pikir
Share
Print
Norwégiye paytexti oslodiki Uyghur ana tili mektipide sinaq teriqiside yolgha qoyulghan 3d liq oqutush programmisidin bir körünüsh. 2018-Yili 9-dékabir.
Norwégiye paytexti oslodiki Uyghur ana tili mektipide sinaq teriqiside yolgha qoyulghan 3d liq oqutush programmisidin bir körünüsh. 2018-Yili 9-dékabir.
RFA/Méhriban

Igilishimizche, norwégiye Uyghur komitétining teshebbusi we norwégiyediki Uyghur kespiy xadimlarning küch chiqirishi bilen norwégiye paytexti oslodiki Uyghur ana tili mektipide 3D liq oqutush programmisi yolgha qoyulghan. Bu heqte radiyomizgha uchur bergen norwégiyediki munasiwetlik kishilerning bildürüshiche, balilar Uyghurche herp we sözlerning menisini kompyutér we qol téléfonlirigha chüshürülgen ep arqiliq mewhum ré'alliq tuyghusining yardimide obrazliq öginish imkaniyitige ige bolalaydiken.

Norwégiye Uyghur komitétining re'isi bextiyar ömer ependi ziyaritimizni qobul qilip, ötken yekshenbe, yeni 9-dékabir küni paytext oslodiki Uyghur ana tili mektipide 3D liq oqutush programmisining sinaq teriqiside yolgha qoyulghanliqini bildürdi. Uning bildürüshiche, paytext oslodiki Uyghur ana tili mektipide 3D liq oqutush programmisini yolgha qoyush bu yilning béshida norwégiye Uyghur komitéti teripidin qarar qilin'ghan iken.

Melum bolushiche, norwégiye Uyghur komitéti 2018-yilining béshida uqturush chiqirip, norwégiyediki Uyghurlar üchün 2018-yilning "Ana til yili" qilip békitilgenlikini élan qilghan. Ular yene 2018-yili ichide paytext oslo shehiridiki ilgiriki Uyghur ana til sinipini mektep qilip kéngeytip qurush, Uyghurlar nisbeten köp topliship olturaqlashqan 6 sheherde Uyghur ana til sinipliri échishni qarar qilghan. 2018-Yili 12-aygha kelgende oslodiki ana til mektipining oqughuchilar sani 120 ge yetken. Bu qétim yéngidin sinaq teriqiside yolgha qoyulghan 3D liq oqutush layihesimu deslepki qedemde mektepning töwen yilliq sinipidiki 40 tin artuq oqughuchi üchün sinaq teriqiside yolgha qoyulghan.

Norwégiye Uyghur komitétining katipi adiljan ependi mezkur programmini layiheleshke mes'ul bolghan bolup, u ziyaritimizni qobul qilip bu xil oqutush programmisining alahidilikliri heqqide melumat berdi.

Adiljan ependi mezkur programmining hazirche kompyutér programmisi sheklide layihelen'genlikini bildürdi. U balilarning kompyutér we qol téléfonlirigha chüshürülgen ep ulinishi arqiliq 3D liq filimlerni körüshte ishlitilidighan közeynekning yardimide ögenmekchi bolghan herp we Uyghurche sözlerning mesisini mewhum ré'alliq tuyghusi ichide ögineleydighanliqini, shunga bu programmining mekteptiki oqutquchi we oqughuchilarning yaqturushigha érishkenlikini bildürdi.

Biz yene 2018-yili 9-dékabir, yeni ötken yekshenbe küni oslodiki Uyghur ana tili mektipide tunji qétimliq 3D programmisi qollinilghan derske qatnashqan oqughuchilardin ularning mezkur programmini qollan'ghandin kéyinki tesiratini soriduq. Oqughuchilardin esmide ziyaritimizni qobul qilip, özining "Éyiq" tiki "É" herpi, "Ayropilan" diki "A" herpi, "Dinozawr" diki "D" herpi qatarliqlarni ögen'ginide midirlap turghan éyiq, dinozawr we ayropilanlarni körgenlikini hayajan ichide bayan qildi.

Kompyutér mutexessisi adiljan ependi yene mezkur programmini teyyarlashqa yérim yildin artuq waqit ketkenlikini bildürdi. U mezkur programmining deslepki qedemde oslodiki Uyghur ana tili mektipide qollinilghanliqini, oqutquchilarning qizghin alqishigha érishkenlikini, norwégiye Uyghur komitétining bundin kéyinki pilanida iqtisadiy shara'it yar bergen ehwalda mezkur programmini dawamliq béyitip ishlepchiqirish pilani barliqini bildürdi.

Ziyaritimiz axirida adiljan abduréhim ependi yene dunyaning herqaysi jayliridiki Uyghur ana til mektepliri we ata-anilarning norwégiye Uyghur komitéti arqiliq özliri bilen alaqileshse bolidighanliqini, bu programmini sétiwalmaqchi bolghanlargha uni ishlitishtiki téxnikiliq usullar we mezkur programmini körüsh üchün lazim bolidighan közeynek qatarliq eslihelerni qandaq sétiwélish heqqidiki uchurlar bilen teminlinidighanliqini bildürdi.

Toluq bet