Loqmanjan abdulla: “Sefaköydiki kursimizni ana til mektipi qilip qurup chiqish arzuyimiz bar!”

“Hira til terbiyelesh merkizi” de oquwatqan oqughuchilarning matématika derslik kitabi. 2018-Yili 25-aprél, istanbul.

Istanbuldiki Uyghurlar eng köp jaylashqan yerlerning biri bolghan sefaköyde balilarning qushqachtek Uyghurche chuwurlashliri bilen janlinip turidighan bir mektep bar, bu “Hira til terbiyelesh merkizi” dur. Bu merkezde hazir heptide besh kün oquydighan pütün künlük we yérim künlük ana til sinip oqughuchiliri 80 din ashqan. Muxbirimiz 2018-yili 25-apiril mektepni ziyaret qildi.

“Hira til terbiyelesh merkizi” ning mudiri loqmanjan abdulla ana til sinipining échilghan waqti we sewebi heqqide melumat berdi. Uning éytishiche, mezkur terbiyelesh merkizidiki ana til sinipi 2016-yili martta tunji qarar oqughuchi qobul qilghan bolup, hazirghiche üch qarar oqughuchi oqush püttürgen.

Loqmanjan abdullarning tonushturushiche, her qarar oqughuchilar bir yilliq qobul qilin'ghan bolup, a. Ayup tüzgen élipbe we ana til dersliki ishlitilgen. Bir yilliq oqughuchilargha bu ikki kitabning mezmuni az kélip qalghini üchün merkez 3-qisim ana til dersliki tüzüp chiqqan we apréldin bashlap oqutushqa bashlighan.

Bu merkezning ana til sinipida matématika, ana til we türkche dersler tesis qilin'ghan. Oqughuchilar ikkige bölün'gen bolup, bir qismi ana til ögen'gech mekteptiki türkche we matématika derslirini tekrar qilidiken. Yene bir qismi türkiyediki dölet mekteplirige kirish üchün hazirlan'ghach ana til öginishni dawam qilghan. Merkezdiki oqutquchilar türkchini yéterlik derijide bilmeydighan balilar bolghini üchün Uyghur tilida matématika dersliki tüzüp neshr qildurghan.

Biz merkezning ana til oqutquchisi béliqiz xanimni ziyaret qilduq. Béliqiz xanim oqughuchilarning öginishte nahayiti qizghin boluwatqanliqini, merkezning balilarni righbetlendürüsh üchün türlük pa'aliyetlerni uyushturup bériwatqanliqini sözlep berdi. Béliqiz xanim bir oqughuchining qizitmisi örlep qalghan halettimu ata-anisining tosushlirigha unimay mektepke kelgenlikini éytip bizni tesirlendürdi.

Muxbirimiz aghriq halette mektepke kelgen sümeyye élini élipbe kitabini oqup béqishqa teklip qildi.

“Hira til terbiyelesh merkizi” 2015-yili 14-dékabir sefaköyde qurulghan bolup, deslep erebche, türkche we in'glizche oqutush bilen shughullan'ghan. 2016-Yili martta ana til sinipi tesis qilin'ghan. Hazir merkezde 7 oqutquchi bolup 450 kwadrat métirdin chongraq oqutush binasida 150 etrapida oqughuchi oqumaqta iken. Loqmanjan abdulla ana til sinipini ana til bashlan'ghuch mektipi qilip qurup chiqishni arzu qilidiken. U sefaköydiki Uyghurlargha ma'arip arqiliq yardem bérishni, balilarning türkiyede muweppeqiyetlik kishilerdin bolushigha hesse qoshush üchün türkiyediki ziyaliylar, ölimalar we jama'et erbabliri birlikte tirishchanliq körsitishni arzu qilidiken.