Gollandiyede “Ana til we medeniyet kursi” tetilini bashlidi

2016‏-Yili 5‏-iyun gollandiyediki “Yawropa sherqiy türkistan ma'arip jem'iyiti” bu yil ramizanda élip bérilidighan pa'aliyetliri seweblik “Ana til we medeniyet kursi” da terbiyiliniwatqan ösmürlerni tetilge qoyup berdi.

Bu pa'aliyet mezkur jem'iyetning gollandiyening zeyst shehirige jaylashqan xizmet merkizide élip bérilghan.

Mezkur jem'iyetning ma'arip ishliri mes'ulining bildürüshiche, tetilge qoyup bérishtin ilgiri, bu oqughuchilardin yilliq imtihan élin'ghan we netijisi layaqetlik bolghanlar bügün teqdirlen'gen.

Mezkur pa'aliyet 5‏-iyun shu yer waqti sa'et 2 de qur'an kerim télawiti bilen bashlinip, kech 6 ge qeder dawam qilghan. Pa'aliyette mezkur layaqetlik oqughuchilarni teqdirleshtin bashqa, ramizan'gha munasiwetlik wez-neséhetler, ijtima'iy we siyasiy hayatqa alaqidar bes-munaziriler, birlikte ghizalinish we namaz oqushtek ehmiyetlik meshghuliyetler élip bérilghan. Pa'aliyet dawamida hemsöhbet bolghan Uyghurlar öz-ara, ulugh ramizanning peziletliridin köplep nesiwidar bolush ümidi bilen xoshlashti.

Yawropa sherqiy türkistan ma'arip jem'iyiti 2013‏-yilidin buyan qollinip kéliwatqan merkizi xizmet binasida her yil ramizanliq pa'aliyetlerge alahide ehmiyet bérip kelgen bolup, bu yilmu ramizan ichide élip bérilidighan pa'aliyetlerni muqimlashturghan.

Bu heqte melumat bergen jem'iyet mes'ulliridin birining éytishiche, ular bu yil ramizan éyidimu, namaz, iptar, sohur we dewet-tebligh programmiliri bilen gollandiyediki wetendashliri üchün xizmet sunushni pilanlighan.