Gollandiyediki Uyghurlar doktor erkin sidiq qatarliq ziyaliylarni kütüwaldi

2016-Yili 28-awghust yekshenbe küni gollandiyediki Uyghurlar yawropa sherqiy türkistan ma'arip jem'iyitide jem bolup, qimmetlik léksiyelerdin behrimen boldi.

Yawropa sherqiy türkistan ma'arip jem'iyitining teklipige bina'en amérikidiki Uyghur ziyaliyliridin alem qatnishi idarisi mutexessisi doktor erkin sédiq ependi we tughluq abdurazaq ependiler gollandiyege kélip, mezkur jem'iyetning zalida jem bolghan Uyghurlar bilen uchrashti.

Mezkur jem'iyetning mes'ulliridin obulqasim abdul'eziz ependi méhmanlarni qarshi élish sözidin kiyin, aldi bilen erkin sédiq ependi “Alem we biz” dégen témida, andin tughluq abdurazaq ependi “Zor melumat ilmi” toghrisida léksiye berdi.

Shu yer waqti chüsh sa'et 2 yérimde bashlan'ghan bu pa'aliyet axsham sa'et 10 gha qeder bashtin-axiri qizghin bir keypiyatta dawam qildi. Pa'aliyet ehli bu ikki élim ehlini qedirlep, söhbetlirini gheniymet bildi. Léksiye bérish, ghizalinish, namaz oqush we qisqa aram élish jeryanidimu, ependilerdin so'allar sorap toxtimidi. Ependilermu toxtawsiz soralghan so'allargha jawab bérip harmidi.

Pa'aliyet ariliqida yene, erkin sédiq ependining yéqinda neshr qilin'ghan 4 parche kitabi, uning émzasi bilen sétiwilinishtek bir ehmiyetlik pa'aliyetmu élip bérilip, Uyghurlarning öz alimi we weten, xelqi üchün ter töküwatqan töhpikarlirini qollash rohi namayan boldi.

Bu qétimliq söhbet we didarlishishtin memnun bolghan Uyghurlar erkin sédiq we tughluq abdurazaq ependiler bilen xatire resimlerge chüshüp, ijtima'iy uchur wasitiliride ortaqlishish arqiliq, bu yerde érishken xushalliqlirini tentene qilishti.

Bu pa'aliyetke gollandiyediki ependi, xanimlardin bashqa, bélgiyedinmu telepchan yashlar kélip qatnashti. Bu künide jem bolghan Uyghurlar üchün yene bir ehmiyetlik kün boldi. Ependilerning shu künlük didarigha qanmighan we bu pursettin mehrum qalghan yene bir qisim Uyghurlar etisi 29-awghust kechqurun “Kawap soruni” uyushturup, ependiler bilen taki yérim kéchigiche mungdashti.

Ziyaritimizni qobul qilghan erkin sédiq we tughluq abdurazaq ependiler bu qétimliq gollandiyediki uchrishishlirining pewqul'adde yaxshi bolghanliqini bildürse, pa'aliyet ishtirakchiliri Uyghurlar bu xil pa'aliyetning yenimu köplep élip bérilishini telep qilidighanliqini bildürüshti.