Даириләр қәшқәр университетидики 4 профессорниң җазаланғанлиқини ахбараттин йошурмақта

Мухбиримиз шөһрәт һошур
2018-09-10
Елхәт
Пикир
Share
Принт
Қәшқәр университетиниң мудири профессор әркин өмәр.
Қәшқәр университетиниң мудири профессор әркин өмәр.
Social Media

Хитай даирилири қәшқәр университетиниң 4 нәпәр профессори вә мудирлиридин болған әркин өмәр, қурбан осман, гүлнар обул вә мухтәр абдоғопур қатарлиқ 4 кишиниң вәзиписидин елип ташланғанлиқини қәшқәр университетиниң тор бетидә хәвәр қилған болсиму, әмма уларниң «икки йүзлимичилик» билән җазаланғанлиқини тилға алмиған. Мухбиримиз бүгүн «икки йүзлимичилик» билән әйиблинип җазаланғанлиқи алдинқи күни дәлилләнгән бу төт нәпәр профессорниң нәдә тутуп турулуватқанлиқи һәққидә қәшқәр вилайитидики һәр дәриҗилик һөкүмәт органлиридин мәлумат игилиди. Йәрлик даириләр бу әһвалниң «дөләт мәхпийәтлики» икәнликини тилға елип, мәлумат беришни рәт қилди.

Қәшқәр университетниң тор бетидә 2-сентәбир күни елан қилинған мәктәп рәһбәрлик қатлимида өзгириш болғанлиқи һәққидики хәвәрдә мәзкур төт нәпәр уйғур профессорниң вәзиписидин елип ташқанлиқи уқтурулған болсиму, әмма уларниң«икки йүзлимичилик» билән әйибләнгәнлики тилға елинмиған.

Һалбуки, бизниң алдинқи җүмә күнидики әһвал ениқлишимиз давамида қәшқәр университети мәктәп мәмурийитиниң бир хадими мәзкур 4 уйғурниң «икки йүзлимичилик» хаталиқи өткүзгәнлики вә шу сәвәбтин вәзиписидин елип ташланғанлиқини ашкарилиған иди. Университет торидики мәзкур хәвәрдин мәлум болушичә2-сентәбир күни уйғур аптоном районлуқ партком интизам тәкшүрүш комитети, тәшкилат бөлүми, маарип назарити қатарлиқ орунларниң рәһбәрлиридин тәшкилләнгән бир гуруппа мәзкур университетта башқарма дәриҗиликтин юқири кадирлар йиғини чақирип, юқириқи 4 уйғур профессорни вәзиписидин елип ташлаш қарариниң әтраплиқ тәкшүрүш вә чоңқур ойлиништин кейин берилгәнликини баян қилған.

Биз мәзкур төт профессорниң ишханисидики хадимлардин мәлумат елиш үчүн қәшқәр университетиға қайта телефон қилдуқ. Өзини университет қоманданлиқ мәркизиниң хадими дәп тонуштурған бир киши гүлнар обул қатарлиқ профессорларниң ишхана номурлирини дәп берәлмәйдиғанлиқини, бу учурни интизам тәкшүрүш қатарлиқ алақидар органлардин соришимиз керәкликини ейтти.

Университет тор бетидики мәзкур хәвәрдә төт нәпәр уйғур профессорни вәзиписидин қалдуруш қарарниң чоң вәзийәтни көздә тутуп, ши җинпиңниң әбәдий әминлик чақириқиға аваз қошуп вә университет хизмәтлиридики нәтиҗини бекитиштә «бөлгүнчиликкә қарши туруш» ни асаси өлчәм қилип берилгәнлики баян қилинған. Йәни хәвәрдә уларниң сиясий мәйданида мәсилә чиққанлиқи ишарәтләнгән болсиму, әмма конкрет немә хаталиқ өткүзгәнлики тилға елинмиған. Уларға башқа хизмәт берилгән яки мәктәптин һәйдәлгәнлики үстидиму тохталмиған. Өткән һәптә радийомизға учур йәткүзгән вәзийәттин хәвәрдар бир киши мәзкур төт профессорниң тутқун қилинғанлиқи вә нәдә тутуп турулуватқанлиқидин аилә-тавабиатлириниң хәвәрсизликини мәлум қилған иди.

Қәшқәр вилайәтлик партком тәшвиқат бөлүми бу төт профессорниң нәдә тутуп турулуватқанлиқидин хәвири йоқлуқини ейтти. Хитай торбәтлиридә өчүрүлмәй қалған бәзи хәвәрләрдә профессор гүлнар обулниң университет парткоминиң даимий һәйәт әзаси вә бирликсәп бөлүм башлиқи икәнлики баян қилинған. Шуңа биз униң нөвәттики әһвали һәққидә вилайәтлик партком бирликсәп бөлүмидинму мәлумат соридуқ. Телефонимизни қобул қилған хадимму бу тема һәққидә гәп қилиштин өзини қачурди.

Вәзийәттин хәвәрдар киши бу төт профессор үстидики тәкшүрүшниң партком интизам тәкшүрүш комитети тәрипидин елип берилғанлиқи вә «икки йүзлимичилик» қалпиқи кийдүрүлгәндин кейин уларниң қанун орунлириға тапшуруп берилгәнликини мәлум қилған иди. Биз шуңа қәшқәр вилайәтлик партком интизам тәкшүрүш бөлүминиң дело мәлум қилиш бөлүмигиму телефон қилдуқ. Бу хадимму бу һәқтә мәлумат беришни рәт қилди. Қәшқәр шәһәрлик сиясий-қануни комитетиниң бир хадими гүлнар обул қатарлиқ бу 4 профессорниң нәдә тутуп турулуватқанлиқиниң «дөләт мәхпийәтлики» икәнлики вә бу һәқтә мәлумат беришкә болмайдиғанлиқини ейтти.

Телефон зиярәтлиримиз давамида қәшқәрдики мәлум бир идарә хадими профессор гүлнар обулниң икки йилниң алдида хитай өлкилиридики бир журналда уйғурларниң мәдәнийәт тарихи вә диний әсәбийлик мәсилиси һәққидә пикир баян қилғанлиқи, әйни вақитта алқишланған у пикирләрниң әмдиликтә «һөкүмәтниң сияситигә астиртин қарши туруш» дәп қаралғанлиқи вә мушу сәвәбтин «икки йүзлимичилик» билән әйибләнгәнликини илгири сүрди. Әмма у мәзкур мақалиниң ениқ мәнбәсини көрситип берәлмиди.

Пикирләр (0)
Share
Толуқ бәт