2015-Yilliq türkiye döletlik magistir we doktorluq oqush mukapati iltimasi 2-ayda bashlinidu

Türkiye bash ministirliqigha qarashliq tashqi türkler we qérindash milletler bashqarmisining tor bétide bildürüshiche, türkiye oqush mukapati 2015-yilliq magistir we doktorluq oqush iltimasi féwral éyida bashlinip, iltimas waqti 30 kün dawamlishidiken.

2014-Yili türkiyede bakalawrliq, magistirliq we doktorluqta oqush üchün, 176 dölettin 82 ming oqughuchi iltimas qilghan bolup, buning ichidin telepke layiq bolghan 4 ming etrapida oqughuchi qobul qilin'ghan. 2015-Yili herqaysi döletlerdin türkiyede oqushqa iltimas qilidighanlarning sani téximu köp bölishi mumkin. Emma qobul qilinidighan oqughuchi sani 4000-4500 etrapida bolidighanliqi texmin qilinmaqta. Meyli qaysi dölettin qanche köp kishi iltimas qilishidin qet'iy nezer, herqaysi qit'elerdiki döletler boyiche bahalash élip baridighan bolghachqa, melum bir döletke muqim qilip ayrip bérilgen san yoq. Kimning oqush netijisi yaxshi we yüz turane imtihanda qayil qilarliq netije alalisa, bu oqushni shu qolgha keltüreleydu. Buningdin körüwélishqa boliduki, riqabet intayin küchlük, tallash adil bolidiken.

Türkiye bash ministirliqigha qarashliq tashqi türkler we qérindash milletler bashqarmisining tor betliride türkiye döletlik magistirliq we doktorluq oqush mukapati iltimasi heqqide diqqet qilishqa tégishlik muhim nuqtilar

2015-Yili magistirliq we doktorluq oqushi üchün türkiye döletlik oqush mukapatigha iltimas qilghuchi namzatlargha qoyulidighan shertler élan qilindi.
http://www.turkiyeburslari.gov.tr/ Da mundaq bayan qilindi:

2015-Yili türkiye magistirliq, doktorluq we tetqiqat oqush mukapati programmisigha iltimas qilghuchi namzatlargha qoyulidighan shertler töwendikiche:
1. Chet'ellik bolushi (türkiye jumhuriyiti puqraliri we herqandaq seweb tüpeylidin türkiye puqraliqidin chiqip ketkenler tizimlitalmaydu)؛
2. Türkiyede oqushigha tosalghuluq qilidighan ehwalning bolmasliqi؛
3. Magistirliq we doktorluqqa tizimlitish üchün toluq kursni püttürgen bolushi yaki tizimlitidighan yili oqush püttüridighan bolushi؛ tetqiqat üchün tizimlatmaqchi bolghanlar doktorluqtin layaqetlik imtihanini bérip bolghan bolushi yaki doktorluqni püttürüp bolghan bolushi؛
4. Magistirliqqa tizimlatmaqchi bolghanlar: 1985-yil 1-ayning 1-künidin kéyin tughulghan bolushi؛
Doktorluqqa tizimlatmaqchi bolghanlar: 1980-yil 1-ayning 1-künidin kéyin tughulghan bolushi؛
Tetqiqat üchün tizimlatmaqchi bolghanlar: 1970-yil 1-ayning 1-künidin kéyin tughulghan bolushi؛
5. Uningdin burun türkiye jumhuriyitining herqandaq bir dölet orginidin aspirantliq, doktorluq yaki tetqiqat üchün oqush mukapati almighan bolushi؛
6. Türkiyediki uniwérsitétlarda aspirantliqqa teng derijidiki oqushta tizimliki bolmasliqi؛
7. Toluq kurs we yaki aspirantliqni türkiyede tügetkendin kéyin, téximu yuqiri örlep oqumaqchi bolghanlar “Oqughuchi tallash we orunlashturush merkizi-ÖSYM” teripidin élinidighan “Tetqiqatchi we aspirantliqqa kirish imtihani-(ALES)” din 45 tin yuqiri alghan bolushi yaki munasiwetlik uniwérsitét rehberliri belgiligen xelq'arada étirap qilinidighan GRE yaki GMAT qa oxshash bir imtihanning netijisi bolushi kérek.
Iltimas qilish üchün kéreklik matériyallar:

1. Zörür kéreklik matériyallar:
Pasport we siken nusxisi
Ikki sungluq resim we siken nusxisi
Alaqe téléfon nomuri we pochta adrési
Aliy mektep bakalawrliq diplomi we siken nusxisi
Aliy mektep bakalawrliq yaki magistirliq ders netijiliri we siken nusxiliri
Aliy mektep baklawurluq yaki magistirliq ders netijiliri in'glizche nusxiliri
2. Ixtiyariy, emma tallinishta hel qilghuch muhim ehmiyiti bolghan matériyallar:
Til kinishkiliri we siken nusxiliri: xenzuche sewiye sinash kinishkisi (HSK), in'glizche kinishkilar (CET-4, 6, TOEFL, IELTS)
Mukapatlar: oqush jeryanida alghan herxil mukapat kinishkiliri (oqush mukapati, tenterbiye, sen'et we keshpiyat qatarliq sahelerde érishken mukapatlar)
Türkche til kinishkisi: türkche kurs diplomliri yaki türkche sewiye sinash kinishkisi (TYS)
Ikki parche tewsiye xéti: aliy mektep oqutquchisi we özingiz oqumaqchi bolghan sahediki kesip igisining tewsiye xetliri

Türkiyede magistirliq we doktorluq oqushigha tordin iltimas qilghan Uyghur oqughuchilarning diqqet qilishigha tégishlik muhim nuqtilar

Türkiyede oqush mukapatigha iltimas qilghan Uyghur oqughuchi namzatlirining töwendiki bir qanche nuqtilargha ehmiyet bergende, tallashta ghelibe qilish pursiti téximu chong bölishi mumkin.
1) Türkiye oqush mukapati türini we türkiye oqush mukapati belgilimisini tepsiliy körüp oqup chiqing.
Türkiyede oqush iltimas tor béti http://www.trscholarships.org/ Türkche we in'glizche bolghachqa, iltimas jedwilini toghra we toluq toldurush üchün, bu ikki tildin birini yaxshi bilishingiz kérek. Eger in'glizche yaki türkche bilmisingiz, bu tillardin birini yaxshi bilidighan we aliy mektepni püttürgen biridin (magistirliq yaki uningdin yuqiri oqush tarixigha ige bolghan kishidin) yardem telep qilsingiz bolidu.
2) Iltimasta telep qilghan pütün matériyallarni renglik siken(sawmiyaw) qiliwélip, barmaq diskingizgha resim (JPEG) sheklide qachiliwéling.
http://www.trscholarships.org/ Toridiki iltimas qedem basquchlirini estayidil toldurung. Telep qilghan pütün matériyallarni torgha yüklep, pütün basquchlarni bésip bolghandin kéyin, bashtin axiri tepsiliy tekshürüp, kem yaki xataliqlarni tüzitip, emdi boldi dégende, andin eng axirqi testiqlashni tamamlisingiz bolidu.
3) Mektep tallashta, oqush ehwalingiz alahide yaxshi bolghan teqdirdimu, pütün mekteplerni istanbul, enqere we izmir qatarliq chong sheherlerdin tallimang.
Siz tallaydighan 12 mektepni tallighanda, istanbuldin 1 yaki 2 ni, enqeredin 1 yaki 2 ni we izmirdin 1 yaki 2 mektep tallap, qalghan 6 yaki 6 din köp mektepni choqum bu üch chong sheherdin bashqa sheherlerdin tallang. Ésingizde bolsunki, siz 12 arzugha 12 mektepni toluq toldurushingiz kérek.
4) Kesip tallashta: aspirantliq we doktorluq oqushi üchün, eng yaxshisi toluq kurusta oqughan kesipni yaki yéqinraq kesipni tallang.
Toluq kurusqa kesip tallighanda yaxshi oylinip özingiz eng yaxshi köridighan, özingizning qabiliyitini eng yaxshi jari qilduralaydighan kesipni we shuninggha yéqin kélidighan kesiplernila tallang. Mesilen: ijtima'iy pende oquymen dep, bir mekteptin edebiyat, bir mekteptin tarix, bir mekteptin iqtisad, bir mekteptin xelq'ara munasiwet, bir mekteptin xelq'ara soda we yene bir mekteptin iqtisad dégendek kesiplerning hemmisini talliwalmang. Tebi'iy pende oquymen dep, bir mekteptin fizika, bir mekteptin ximiye, bir mekteptin matématika, bir mekteptin kompyutér, bir mekteptin mashinisazliq we yene bir mekteptin bi'ologiye dégendek kesiplerning hemmisini talliwalmang. Matériyalingizni körüp sizni tallaydighan kishi sizni éniq bir nishani yoq, kesip ehli bolushqa layaqetsiz bir oqughuchi iken dep shalliwétish éhtimali yuqiri bolup, riqabette utturup qoyisiz. Shunga siz tallimaqchi bolghan 12 mekteptin özingiz eng yaxshi köridighan we özingizning qabiliyitini eng yaxshi jari qilduralaydighan kesipni we shuninggha yéqin kélidighan kesiplernila tallang.
5) Mektep tallashta, 12 mektep tertipini hergizmu dangliqliq derijisi bilen tizmang, belki sizge mas kélidighan tertipte bolsun.
Héchqandaq in'glizche netijingiz yuq we otturiche netijingiz 60 etrapida turup, ottura sherq téxnika uniwérsitéti, boghaz'ichi uniwérsitéti we istanbul téxnika uniwérsitéti dégendek in'gliz tilida oqutush élip baridighan mekteplerni talliwalmang. Siz bu xildiki mekteplerni tallimaqchi bolghanda, ékranda sizge agahlandurush bérilidu.
6) Kesip tallashta, toluq kurs we magistirliq oqushida qaysi kesipni oqughan bolsingiz, örlep oqushtimu shu kespini we yéqin kélidighan kesipni tallang.
Eger sizning burunqi kespingiz bilen örlep oqumaqchi bolghan kespingiz bir biri bilen peqetla munasiwiti bolmisa, tallinish pursitingiz yene töwen bolup qalidu. Tallashtin ghelibilik ötsingizmu, türkiyege oqushqa barghandin kéyin, mektepler sizdin kespi teyyarliq élishingizni telep qilip, toluq kurstiki kespi derslerdin 8 din 10 ghiche dersni bir yilda toluq ghelibilik püttürüshingizni telep qilidu. Eger kespi teyyarliqta bir pendin ötelmisingiz, sizge Uyghurken dep étibar bérishte yoq, eksiche, türkiye aliy ma'arip komitétining belgilimisige asasen, qilche rehim qilinmay mekteptin heydilisiz, oqush mukapati we mektepmu yoq bolidu. Türkiyedin qaytip kétishke mejbur bolisiz.
7) Kesip tallashta, in'glizche oqutush élip bérilidighan kesiplerni tallash üchün, eger sizning in'glizche TOEFL / IELTS we GRE qatarliq imtihanlardin omumi nomur we yekke türlerdiki nomuringiz mekteplerning siz tallimaqchi bolghan kesipke qoyghan ölchimige chüshse, andin in'glizche oqutush élip baridighan oxshash kesip üchün 2 yaki 3 mektepni tallisingiz bolidu. Qalghanlirini türkche oqutush élip baridighan kesip we mekteplerni tallisingiz tallinish pursitingiz yuqiri bolidu.
8) Jedwel toldurghanda yultuz belgisi(*) quyulghanlarning hemmisini toldurghandin sirt, belge qoyulmighanlarnimu choqum toldurung we telep qilin'ghan matériyallarningmu belge qoyulsun yaki qoyulmisun hemmini yollang, amal bar bosh yer qalmisun.
9) Qiziqimen depla kespingiz bilen qilche munasiwiti bolmighan kesipni talliwalmang, pewqul'adde qabiliyitingiz bolup, tallighuchini qayil qilalmisingiz tallinish éhtimalingiz töwen bolup qalidu.
10) Tordin ilitimas jediwélini toldurghanda, özingizning néme üchün türkiyede oqush arzuyingiz barliqini yazidighan qismigha alahide ehmiyet béring we yüz turane imtihandimu mushu qisimgha yazghan mezmunni chöridigen asasta bayan qiling.
11) Oqush mukapat türidin qanche türni tallash imkaningiz bolsa we oqush ehwalingiz mas kelsila hemmini tallang. Amma tallighan kesipler bir-birge munasiwetlik bolsun. Bolmisa bu oqughuchi néme oqushini bilmeydiken dep ilghinip ketmeng.
12) Ésingizde bolsunki, bu oqushqa qobul qilishta, türkiye terep iltimas qilghuchilarning oqush netijisining yuqiri bolushini telep qilish bilen birge, ghayilik, ang sewiyilik bolushighimu alahide ehmiyet bermekte, bolupmu oqughuchida tiriship oquydighan bir iradining bolushigha qaralmaqta.