Dolqun eysa Uyghur ma'arip uyushmisini ziyaret qildi
2016.05.03

28-Aprél küni xelq'ara wakaletsiz milletler teshkilatining shiwétsiye parlaméntida échilghan yighinigha qatnishish üchün shiwétsiyege kelgen dunya Uyghur qurultiyining ijra'iye komitétining mudiri dolqun eysa 30-aprél küni shiwétsiyede pa'aliyet qiliwatqan Uyghur teshkilatliridin “Uyghur ma'arip uyushmisi” ni ziyaret qildi.
Dolqun eysani Uyghur ma'arip uyushmisining idare hey'et ezaliri, uyushma merkizide qizghin qarshi élip kütüwaldi.
Dolqun eysa söhbet jeryanida, Uyghur ma'arip uyushmisining xizmetlirige yéqindin diqqet qilip kéliwatqanliqini bildürdi we uyushmining qurulghan 10yildin buyan qiliwatqan xizmetlirige yuqiri baha berdi.
Uyghur ma'arip uyushmisining re'isi abdulla kökyar dolqun eysaning 30-mart amérikidiki “Kommunizm qurbanliri xatire fondi” teripidin bérilgen “Truman-régan erkinlik médali” gha érishkenlikini tebriklidi we Uyghur ma'arip uyushmisi teripidin sherqiy türkistanning bayriqi chüshürülüp bésilghan simwol xaraktérige ige sharpa bilen xatire buyumi hediye qildi.
Bu heqte ziyaritimizni qobul qilghan dolqun eysa ependi, bügünki Uyghur ma'arip uyushmisigha qilghan ziyariti heqqide öz tesiratini bayan qildi.
Uyghur ma'arip uyushmisining re'isi abdulla kökyar ziyaritimizni qobul qilip, dolqun eysa ependining “Truman-régan erkinlik médali” gha ériship, Uyghur xelqige shan -sherep keltürüsh bilen birge, Uyghur dawasining yuqiri pellige kötürülüshige pidakarliq körsetkenlikini shiwétsiyediki Uyghurlargha wakaliten tebrikligenlikini anglatti.
Pa'aliyetke qatnashqan idare hey'et ezaliridin abbas ependimmu bu heqte öz tesiratini bayan qildi.
U mundaq dédi: “Gerche bu mukapat dolqun eysagha shexsi bérilgen bolsimu, bu mukapatning Uyghur xelqige bolghan ehmiyiti chong. Uyghur xelqi dawa üchün pidakarliq körsitiwatqan pida'iylarni hergiz untup qalmaydu, her qachan keynide turup medet béridu.”