Rabiye qadir xanim Uyghur mesilisi ders qilip ötülüwatqan mektepni ziyaret qildi

Dunya Uyghur qurultiyi re'isi rabiye qadir xanim norwégiyede élip bériwatqan ziyariti jeryanida, norwégiyening bérgin shehiridiki Uyghur mesilisini ders qilip ötüwatqan tash mektep namidiki bashlan'ghuch mektepni ziyaret qildi.

11-Ayning 18-küni etigen dunya Uyghur qurultiyi re'isi rabiye qadir xanim bilen mu'awin re'isi ömer qanat ependi mektepke kelginide, köp sanda oqughuchi mektepning aldida Uyghur tilida “Xush kélipsiler” dep kütüwalghan.

Dunya Uyghur qurultiyi re'isi rabiye qadir xanimning radiyomizgha bergen bu heqtiki melumatigha asaslan'ghanda, rabiye qadir xanim bundin 12 yil ilgiri bu mektepni ziyaret qilghinida, oqughuchilargha Uyghur mesilisini anglatqan, u waqitta léksiyesini anglighan oqughuchilar hazir uniwérsitétlarni püttürüp jem'iyetke chiqqan, bu qétim bu oqughuchilarmu kélip özliri püttürgen mektepte rabiye qadir xanimni kütüwélish pa'aliyitige qatnashqan.

Mektepning tamlirigha rabiye qadir xanimning resimliri ésilghan bolup, oqughuchilar bes-bes bilen so'al sorighan. 12-14 Yashtiki balilarning so'alliridin tesirlen'gen rabiye qadir xanim köz yéshini tütiwalalmay yighlap ketken.

Yawropadiki nopuzluq kishilik hoquq teshkilatliridin biri bolghan rafto kishilik hoquqi weqpi 1986-yili qurulghan bolup, 30 yildin béri dunyada zulum astida yashawatqan milletlerning mesililirini dunyagha anglatqandin sirt, norwégiyediki nuqtiliq mekteplerde mezlum milletlerning mesililirini ders qilip ötüshni emelge ashurghan.

Rabiye qadir xanimning éytishiche, bergin shehiride 12-yil burun we bu qétim ziyaret qilghan tash mektep namidiki mektepte Uyghur mesilisi ders qilip ötülidiken. Mezkur mektep hazirghiche köp sanda Uyghur mesilisini bilidighan oqughuchi yétishtürgen.

Yuqiridiki ulinishtin programmining tepsilatini anglighaysiler.