Oqutquchilargha qishliq tetilde nuqtiliq a'ililerni nazaret qilish wezipisi tapshuruldi

Xitay da'iriliri qeshqer shehirige qarashliq yéngisheher nahiyisi tewesidiki qishliq tetilge chiqqan Uyghur oqughuchilarni her jüme küni mektepke yighip, ularning bir heptidin buyan néme ishlarni qilghanliqi, ata-anisining qandaq ishqa salghanliqi, mehelle we a'ililerde diniy matériyal körgen, oqughan ishlarning bolghan-bolmighanliqi, ata-anilarning ulargha diniy jehette telim bergen-bermigenliki qatarliqlarni yéqindin sürüshte qilidiken. Ehwal bayqalsa, ular derhal mektep rehberlikige doklat qilip, munasiwetlik orunlargha bu ishlarni del waqtida yetküzidiken.

Biz yuqirida igiligen uchurgha asasen, yéngisheherdiki melum bir mektepning ismini ashkarilashni xalimighan bir neper oqutquchisini ziyaret qilduq. Uning inkas qilishiche, yéngisheherde 12-yanwar yüz bergen weqedin kéyin, qeshqer tewelikidiki mektep, idare-organlarda nöwetchilik tüzümi eslige kelgen bolup, mekteplerde kündüzliri ayal oqutquchilar, kéchiliri er oqutquchilar nöwetliship közetchilik qilidiken.