"Xelq'ara Uyghur tetqiqati zhurnili"ning yéngi sani élan qilindi

Muxbirimiz erkin tarim
2016-08-19
Élxet
Pikir
Share
Print
"Xelq'ara Uyghur tetqiqati" zhurnilining 7 - sani
"Xelq'ara Uyghur tetqiqati" zhurnilining 7 - sani
RFA/Erkin Tarim


Türkiyede türk we Uyghur tilida chiqiwatqan "Xelq'ara Uyghur tetqiqati" zhurnilining 7 - sani oqurmenliri bilen yüz körüshti. Bu sanda hazirqi zaman Uyghur tili, qedimqi zaman Uyghur tili, Uyghur edebiyati, tarixi, folklori, örp - aditi bilen munasiwetlik 13 maqale hemde kitab bahalash we tonushturush bilen munasiwetlik 2 maqale yer alghan bolup, türkiye we dunyaning herqaysi jayliridiki Uyghurshunaslarning yéngi tetqiqat netijiliri otturigha qoyulghan.

2013 - Yilidin tartip izchil neshr qilinip kéliwatqan , "Xelq'ara Uyghur tetqiqati zhurnili"ning bu sanida qedimqi, yéqinqi we hazirqi zaman Uyghur tili we edebiyati, tarixi we folklori üstidiki tetqiqatlargha alahide orun bérilgen bolup, mezkur zhurnalning 7 - sani toghrisida téximu tepsiliy melumat igilesh üchün zhurnalning qanuniy igisi izmir ége uniwérsitéti oqutquchisi proféssor doktor alimjan inayet ependi, zhurnalning bash tehriri adem öger ependi we zhurnalda maqalisi élan qilin'ghan newshehir uniwérsitéti doktora oqughuchisi abduwéli hesen ependiler bilen téléfon söhbiti élip barduq.

Proféssor doktor alimjan inayet ependi mezkur zhurnalning 7 - sanida yer bérilgen maqaliler toghrisida melumat bérip mundaq dédi: "Zhurnalda türkiyede oquwatqan doktora oqughuchisi abduwahit hesenjanning "Hazirqi zaman Uyghur edebiyatidiki muhim yazghuchilardin zordin sabir" mawzuluq maqalisi, edebiyatshunas ablet berkining "Zunun qadirning Uyghur edebiyatidiki orni" namliq maqalisi, türkiye newshehir uniwérsitéti oqutquchisi doktor adem öger bilen kübra altin yildiz xanimning "Uyghurlarda shamanizmdin islamiyetkiche yaman ruhqa aylinishi" namliq maqalisi, enqere uniwérsitéti oqutquchisi proféssor doktor sa'adettin gömech ependining "Uyghur dastanliri we qutatqubilik heqqide" namliq maqalisi, izmir ége uniwérsitéti oqutquchisi proféssor doktor zeki qaymaz ependining "Qutatqubilik tetqiqatigha nezer" namliq maqalisi, proféssor doktor alimjan inayetning "Oghuz dastani toghrisida" namliq maqalisi, zulhayat ötkür xanimning "Uyghurlarda mazar adetliri" namliq maqalisi qatarliqlargha orun bérilgen.
xelqara-uyghur-tetqiqati-zhurnal-jurnal-7-san-2016-2.jpg
Proféssor doktor alimjan inayet ependi zhurnalning bu sanida élan qilin'ghan dangliq tarixchi zeki welidi toghan ependining "Oghuzxan" dastani toghrisida melumat berdi.

U, zhurnalning 7 - sanida bezi kitablarningmu tonutulqanliqini bayan qildi.

Bulardin bashqa yene, zhurnalda yazghuchi ablimit sadiqning ürümchi xelq neshriyati teripidin neshr qilin'ghan "Xitay xelq meselliri toplimi" namliq kitabi, doktor erkin emetning türkiye enqerede neshr qilin'ghan "Chaqchaqchi hisam qurban" namliq kitabi tonushturulghan.

Türkiyede neshr qiliniwatqan "Xelq'ara Uyghur tetqiqati zhurnili"ning bash tehriri türk newshehir uniwérsitéti oqutquchisi adem öger ependi zhurnalning 7 - sanining eng muhim alahidilikliridin birining in'gilizche, türkche we Uyghurche maqalilerge orun bergenliki ikenlikini bayan qildi.

Türkiye newshéhir uniwérsitéti edebiyat fakultitida doktora oquwatqan hesenjan ependi "Xelq'ara Uyghur tetqiqati zhurnili"gha yuqiri baha berdi.

"Xelq'ara Uyghur tetqiqati zhurnili" 3 yildin béri izchil halda neshr qiliniwatqan türk we Uyghur tilida élan qiliniwatqan tor zhurnili bolup, dunyadiki Uyghurshunaslar uningdin paydilanmaqta.

Toluq bet