Bélgiyediki boks mahiri faruq yawropa chémpiyonluq musabiqisige hazirlanmaqta

Igilishimizche, bélgiyediki Uyghur boks mahiri faruq qurbanof hazir, yawropa boyiche 5-ayning 14-küni ötküzülidighan boks chémpiyonluq kemirini talishidighan musabiqige teyyarliq qiliwatqan bolup, faruqning hazirqi teyyarliq meshiqliri toghrisida toxtalghan térnérliri ziyaritimizni qobul qilip, uning bu qétimliq musabiqide ispaniyening chémpiyoni bolghan ispaniyelik mahir bilen uchrishidighanliqini, musabiqe teyyarliqining her jehettin puxta ikenlikini bildürdi.

Faruq qurbanof 1991-yili 10-ayning 24-küni qirghizistan paytexti bishkekte Uyghur a'iliside dunya kelgen. Yawropagha 2002-yili köchmen bolup kelgen. U bélgiyege 2006-yili köchmen bolup yerleshkendin kéyin, 14yashtin bashlap boksurluq meshiqini bashlighan.

Faruq qurbanof bélgiyediki kespi boks kulubliridin “ Essalam ” dégen külüpta terbiyilen'gen. 2015-Yili 9-ayning 18-küni bélgiyede ötküzülgen boks musabiqiside 60kilogramliqlar ara élip bérilghan musabiqide 11 mahirni yéngip bélgiye chémpiyoni kemirini taqighan.

Uning térnérliri, faruqning bu qétimliq musabiqide yaxshi netije alidighanliqigha ümid bilen qaraydighanliqini bayan qildi.

Faruq gerche ana tilida rawan sözliyelmisimu, özini qisqiche tonushturup ötti. U, özining hés qilghanliri heqqide toxtilip, boks musabiqiliride qolgha keltürgen netijilirining Uyghur xelqige mensup ikenlikini, her bir meydan musabiqide ay yultuzluq kök bayraqning Uyghur qollighuchiliri teripidin meydanda lepilditilishi özi üchün rohi jehettin medet bolghanliqini bayan qildi.

U, dunyaning her qaysi jaylirida yashawatqan Uyghurlardin 14-may ötküzülidighan musabiqide chémpiyon bolushi üchün salih du'ada bolushni telep qildi.

Bélgiyediki “Uyghur jem'iyiti”ning sabiq re'isi abdulmutellip imirof ziyaritimizni qobul qilip, faruqning bélgiyediki Uyghurlar üchünla emes, pütün dunyadiki Uyghurlar üchünmu shan-sherep keltürüwatqanliqini, bélgiyediki Uyghurlarning uninggha meniwi jehettin her da'im ilham bérip kéliwatqanliqini anglatti.