Kanadadiki köyüwatqan sheher fort makmurray tesiratliri (1-qisim)

Ixtiyariy muxbirimiz gülshen abduqadir
2016-05-18
Share

5-Ayning 2-küni chüshtin kéyin kanadaning albérta ölkisige qarashliq 80 ming nopuzluq kichikkine sheher fort makmurray shehirige ot ketti. Kanada metbu'atlirining melumatliridin melum bolushiche ot fort makmurray shehiridiki atabaska deryasi sahilidiki tebi'iy ormanliqlardin bashlan'ghan iken.

Gerche ot apiti yüz berginige 3 heptidin artuq waqit bolghan bolsimu, emma sheher hazirghiche köymekte. Ot künning issip kétishi we déngiz okyanlardin urulghan shamal tesiridin kündin kün'ge ulghiyip, kichikkine xilwet bu sheher birnechche künning ichide xarabliqqa aylinip qalghan. Kanada hökümiti barliq tedbirlerni ishqa sélip otni öchürüshke tirishqan we melum derijide kontrol qilghan bolsimu, emma ot apiti keltürüp chiqarghan egeshme xeterler kanada hökümitining yenila béshini aghritidighan mesile bolup turmaqta iken.

Ot apiti sewebidin, fort makmurray shehiridiki nurghunlighan ahalilerning olturaq öyliri we mashiniliri köyüp kül bolup ketken. Méhmanxana, gaz sétish merkezliri we nurghunlighan sheher mu'essesiliri, su gaz turuba yolliri buzghunchiliqqa uchurghan bolup, 3 heptidin buyan köyüwatqan bu sheher heqqide xewer bergen chet'el we kanada metbu'atliri, bu ot apitini yer sharining doziqi dep teripligen. Kanada hökümiti bixeterlik sewebidin, 80 minggha yéqin sheher ahalisini, makmurray shehiridin 300 kilométir we 600 km yiraqliqtiki kalgari we edminton sheherlirige yötkeshke mejbur bolghan. Tuyuqsiz yüz bergen bu ot apiti sewebidin, öy makanlirini tashlap, deslepte kanada hökümiti orunlashturghan, waqitliq lagérgha andin, kalgari we edminton sheherlirige qéchishqa mejbur bolghan 80 ming kanada wetendishining ichide bir Uyghur a'ilisi yeni zöhre yasinjan a'ilisimu bar idi.

Zöhre xanim bizge, fort makmurray shehiride yüz bergen ot apiti we a'ilisining, öy waqi seremjanlirini tashlap qéchish jeryanidiki sergüzeshtlirini hékaye qilip sözlep berdi.

Xilwet sheher fort makmurray hazirghiche köymekte.Emma zöhre xanimning, ot apiti yüz bérip hazirghiche bolghan 3 hepte jeryanida kanadadiki insanliq qedir qimmiti, ademlerdiki öz ara köyünüsh méhri muhebbet shundaqla ademgerchilikke a'it alghan tesiratliri nurghun. Gerche u öz a'ilisi bilen birlikte téxiche fort makmurray shehiridiki öz öyige qaytalmighan bolsimu, emma kanadadiki nurghunlighan wetendashlargha oxshashla, kanadadin ibaret bu chong a'ilining illiqliqidin behrimen bolmaqta. Zöhre xanimning bu heqtiki tesiratlirini, kanadadiki köyüwatqan sheher fort makmurray tesiratlirining 2-qismidin anglighaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet