Хотәндә бир уйғур компартийә әзасиниң қәбрисигә чеқилди дәп тутқун қилинған

Хотәндин кәлгән инкасларда ейтилишичә, хотән шәһиридики ласкүй йезисидики мәмәтимин исимлик, 32 яштики нерва кесилигә гириптар болуп қалған бир уйғур, кечидә кесили тутуп қелип мәһәллисидики мазарлиққа чиқип кетип, кәнтниң сабиқ секретари алимахун билән абдулла мәсутахунниң қәбрисиниң кичик түврүкини чеқивәткән. Буни көргән бәзи кишиләр сақчи идарисигә әрз қилған.

Вәқәни садир қилди дәп қаралған ласкүй кәнтлик мәмәтимин 70 күн бурун тутуп кетилгән болуп, һазир сақчи идарисиниң тутуп туруш орнида солақлиқ икән.

Мәмәтиминниң һаммиси ханнисахан билән сөһбәт елип берип бу вәқә тоғрисида мәлумат игилидуқ. Униң ейтишичә мәмәтиминниң дадиси бурунла түгәп кәткән болуп, бирла аниси бар икән. У, 2 қетим той қилған болсиму, нерва кесили түпәйли аҗришип кәткән. У кесили тутуп қалғанда пәқәтла һошини йоқитип қойидиған болуп, алдиға ким кәлсә уридикән.

Кечә қәбристанлиққа қечип чиққанда кесили тутуп қалған болуп, у йәрдә икки коммунистик партийә әзасиниң мазириға чеқилип қойған. Ханниса ханимниң ейтишичә, у, сақчилар әйиблигәндәк коммунистик партийәгә қарши қилған һәрикәт әмәс, кесили тутуп қалған болғачқа худини билмәй қилип салған икән. Мәмәтиминниң материяли аптоном районлуқ тәптиш идарисигә йолланған болуп, йәрлик һөкүмәт уларниң бир тәрәп қилишини күтүп турмақтикән.