Ilida bir hepte dawamlashqan yamghur arilash qar déhqanlarni ghemge saldi

Xitayning hökümet taratqulirida tengritéghining shimaliy rayonlirida soghuq éqimning tesiride yamghur arilash qar apiti körülgechke rayonda qatnash toxtap déhqan-charwichilarning apetke uchrighanliqi xewer qilin'ghandin kéyin, ili rayonidiki yéza-kentlerge téléfon qilip ehwal igiliduq. Ili déhqanlirining bildürüshiche, ilida bir hepte dawamlashqan yamghur arilash qar we hökümetning apetke qarita jiddiy tedbir qollanmasliqi déhqanlarni ghemge salghan.

10-Noyabirdin bashlap Uyghur diyarining shimalidiki altay, chöchek, ili we sanji, qarimay qatarliq jaylarda sibiriye soghuq éqimining tesiride qar-yamghurluq hawa rayi hadisisi körüldi. Bir hepte dawamlashqan yamghur arilash qar we shiwirghanliq qar apitide adem ölüsh hadisisi körülmigen bolsimu, emma iqtisadiy jehettin ziyan éghir bolghanliqi melum.

Xitayning hökümet taratquliri 17-noyabir küni Uyghur aptonom rayonluq hökümet ishxanisining melumatidin neqil élip bergen xewiride, 7 kündin buyanqi qar-yamghurluq hawa kilimatida 10 minggha yéqin ahale apetke uchrap, qatnash tügünliridiki yoluchilardin 100 din artuq adem yötkep orunlashturulghanliqini, 900 ge yéqin turalghu öy oxshimighan derijide zeximige uchrap, biwasite iqtisadiy ziyanning 25 milyon somgha yetkenlikini xewer qildi.

Xitayning xelq torining jaylardiki apetning ehwali heqqidiki xewiride, altay wilayitining köktoqay nahiyisi, chöchekning toli, dörbiljin nahiyiliri, ilining telki taghliri, ghulja nahiyisi we qarimay shehiri qatarliq jaylarda bir heptidin buyan yamghur arilash qar, shiwirghanliq qar apiti yüz bérip, altayning köktoqay nahiyisi, telke taghliri qatarliq qismen jaylarda qarning qélinliqi 1 métirgha yetkenliki we nöldin töwen 19, 20 gradosluq töwen témpératura seweblik, qar tazilash, yollarni rawanlashturush tesliship bezi yol bölekliride qatnash toxtighanliqi xewer qilindi.

Xitayning hökümet taratqulirida Uyghur rayon da'irilirining apettin qutquzush tedbirlirini éliwatqanliqi xewer qilin'ghan bolsimu, emma ili rayonidin radiyomiz ziyaritini qobul qilghan Uyghurlar, hökümet taratqulirida asasen uzun yolluq qatnash yol tügünliridiki rayonlarning qar apitige uchrash we qutquzush tedbirliri heqqidiki xewerler bérilip, oxshash apetke uchrawatqan yéza-kent, qishlaqlardiki déhqan-charwichilarning apetke uchrash ehwali heqqide hökümet da'iriliri hazirgha qeder tekshürüshni bashlimighanliqi üchün taratqulardimu bu heqtiki xewerlerning bérilmigenlikini bildürdi.

Ilida bir heptidin buyan dawamlishiwatqan yamghur arilash qar apiti heqqide toxtalghan bir xanim, 11-ay kirishi bilenla bashlan'ghan qar arilash yamghur we témpératurining tuyuqsiz töwenlishi seweblik déhqanlar arisida bu yil yaz peslide ili diyarida körülgen yamghur we kelkün apitidiki ziyanlarning qayta tekrarlinishidin ensireydighan yene bir qétimliq jiddiy keypiyatning barliqqa kelgenlikini bildürdi.

Bu xanim yene, yamghur arilash qar dawamlishiwatqili bir hepte bolghan bolsimu, radiyo, téléwiziye qatarliq hökümet taratqulirida déhqan-charwichilarning apetke uchrash ehwali heqqidiki xewerler hazirgha qeder bérilmigechke, özi we qolum-qoshnilirining apetning ziyini heqqidiki melumatlardin xewersiz ikenlikini bildürdi.

Ili déhqanliridin ziyaritimizni qobul qilghan bireylen, qar apitining déhqanlarni yene ghemge salghanliqini bildürüp, étizlardiki bughday, qonaq qatarliq hosullar yighiwélin'ghan bolsimu, emma uda bir hepte dawamlashqan yamghur arilash qar sewebidin nahiye, sheher bazarlirini qishliq köktat bilen teminlesh üchün parnik yasap köktatchiliq qiliwatqan we étizlirigha yésiwilek, sewze, qizilcha qatarliqlarni térighan déhqanlarning iqtisadiy ziyinining éghir bolghanliqini, emma yéza ‏-kentlerde hazirgha qeder déhqanlarning ziyini heqqide mexsus tekshürüsh élip bérilmighanliqini bildürdi.

Biz ili yéziliridiki qar apiti keltürgen ziyanning ehwalini hökümet da'iriliridin igilesh üchün, birqanche yéza-kentlerning ishxanilirigha téléfon qilghan bolsaqmu, emma téléfonimiz jawabsiz qaldi, yaki ulan'ghan téléfon üzüwétildi.