Uyghur putbolchiliqining istiqbalimu erkinlikke mohtaj

Yawropa sherqiy türkistan ma'arip jem'iyiti teripidin ötküzülgen Uyghur yashlirining 2-qétimliq putbol musabiqiside chémpiyon bolghan komandini teqdirlesh murasimida putbol heweskarliri. 2015-Yili 15-mart, gollandiye.

Gollandiyede hayatini yashawatqan Uyghur yashliridin putbol saheside belgilik asasi bolghan we ilgiri ana wetinining her qaysi sheherliride hem xitayning dölet derijilik kespiy komandilirida top tepken yaki oqutquchiliq, térnirliq qilghan kespiy putbolchilarning ortaq qarishiche؛ Uyghur putbolchiliqining istiqbalimu erkinlikke mohtaj iken.

Gollandiyede turushluq Uyghur putbolchilar bilen ötküzgen söhbet dawamida, Uyghurlar xitaylardin beden sapasi jehettin yuqiri we talantliq bolsimu, xitaylarning milliy yeklishige we chetke qiqishqa uchrawatqanliqi؛ ochaq béshida dangqan bar dégendek؛ Uyghurlarning putbol sahesidiki iqtidarlirining melum basquchtila türlük bahaniler bilen basturuluwatqanliqi؛ xitaylarning Uyghur putbolchiliqini bésip, töwen sewiyede tunjuqturushi we Uyghurlar ichidiki kespiy térnirlarning xelq'ara sewiyede terbiyelinishigimu yol qoymaydighanliqi melum bolmaqta. Uyghur ata-anilarningmu perzentliridiki bu tughma talantining mehkumluq astida xarlinip qiliwatqanliqigha qarap, balilirining kelgüsini bashqa sahelerge yönlendürüshke mejbur bolushtek Uyghur putbolchilirining istiqbaligha munasiwetlik ehwallar emeliy misallar bilen delillenmekte.

95‏-Yilidin bashlap putbol sahesige kirip, ürümchi sheher komandisi, shinjang komandisi we bashqa kichik kolublarda terbiyilinip, türlük musabiqilerde top tepken ablet shemshi ependi özining bu heqtiki qarishini öz béshidin kechürgenliri asasida bayan qilishiche؛ iqtidarliq Uyghur putbolchilar shunche köp bolsimu, xitaylarning milliy yeklishi seweblik ottura sewiyige barmayla shalliwétilidiken.

Kichikidin bashlap talantini jari qildurup, xitayning kespiy kolublirigha tallan'ghan we türlük musabiqilerge qatnashqan ilshat islam ependining bildürüshiche: xitaylar Uyghur putbolchilirining yuqiri sewiyede terbiyilinishige tosqunluq qilipla qalmay, belki Uyghurlarning musteqil komandilirining meydan'gha kélishigimu yol qoymaydiken.

Ürümchi sheherlik tejribe ottura mekteptin bashlap, pidagikoka institoti we shinjang uniwérsitéti perzentler mektipining tenterbiye oqotquchisi, putbol komanda yétekchiliki bilen shughullan'ghan ötkür yünüs ependining qarishiche: Uyghur balilirining bashlan'ghuch sewiyisi xelq'aradiki bashqa balilarning bashlan'ghuch sewiyesidin köp üstün iken.