Америкидики уйғур балилири уйғур путболчилириниң бойниға медал асти

Шималий америка қитәси бойичә уйғур путбол лоңқисини талишиш мусабиқиси 6-айниң 13- вә 14-күнлири америкиниң вирҗинийә штатида өткүзүлди.

Йәкшәнбә күни өткүзүлгән ахирқи һәл қилғуч мусабиқидә вирҗинийә уйғур бирлики командиси торонто-калифорнийә бирләшмә командисини 0 гә қарши 2 нәтиҗә билән йеңип чемпийонлуққа еришти.

Пайтәхт вашингтон вә вирҗинийә штати әтрапида яшайдиған көп сандики уйғур җамаити пәрзәнтлирини елип келип мусабиқә көрди һәмдә мәйдандики топчиларға мәдәт бәрди.

Көк вә сериқ майка кийгән икки гуруппа топчилар уйғур балилириниң қоллирини йетилигән һалда мәйданға кирип кәлгәндә, пүтүн әтрап қизғин алқиш садалириға чөмди.

Ахирқи һәқ қилғуч мусабиқигә чүшкән вирҗинийә уйғур бирлики командиси билән торонто-калифорнийә бирләшмә командиси 30 нәччә селсийә градус иссиққа қаримай кәскин елишти. Ахирида вирҗинийә командиси 0 гә қарши 2 топ киргүзүп чемпийон болди.

Америка вә канаданиң һәрқайси җайлиридин тәшкиллинип кәлгән яш уйғур әзимәтлири достлуқ, бирлик вә миллий роһ иликидә мусабиқини давамлаштурди. Уйғур тили вә уйғур миллий муһити ичидә елип берилған мусабиқә балилар вә өсмүрләрдә унтулғусиз тәсиратлар қалдурди. Мусабиқә ахирлашқанда уйғур балилири өз қоли билән путболчи әзимәтләрниң бойниға медал асти.

Мусабиқә ахирлашқанда вирҗинийә уйғур бирлики командисиниң һуҗумчиси арафат дилшат әң яхши путболчи болуп баһалинип, “алтун аяғ” атиқини алди.

Мәзкур мусабиқини тәшкиллигән вирҗинийә уйғур бирлики командисиниң тринери җүрәт заһир әпәнди мусабиқә ахирида радиомиз зияритини қобул қилди. У бу нөвәтлик мусабиқидә вирҗинийә уйғур бирлики, бостон яшлири, торонто уйғур командиси, калифорнийә яшлири қатарлиқ 4 командиниң ойниғанлиқини тәкитлиди. Бу нөвәтлик мусабиқиниң шималий америкида яшиғучи уйғур җамаити, болупму уйғур яшлириға нисбәтән интайин муһим әһмийәткә игә икәнликини илгири сүрди.

Зияритимизни қобул қилған путбол һәвәскари, доктор җүрәт обул әпәндиму бу қетимлиқ мусабиқиниң яш өсмүрләр вә уйғур балилирида ишәнч вә миллий иптихарлиқ туйғуси пәйда қилғанлиқини тилға алди.

Тәпсилатини аваз улиништин аңлиғайсиз.