Amérikidiki Uyghur baliliri Uyghur putbolchilirining boynigha médal asti

Muxbirimiz qutlan
2015-06-15
Share
uyghur-putbol-amerika-1.jpg Shimaliy amérika qit'esi boyiche Uyghur putbol longqisini talishish musabiqisining yépilish murasimidin körünüsh. 2015-Yili 14-iyun, amérika wirjiniye shtati.
RFA

Shimaliy amérika qit'esi boyiche Uyghur putbol longqisini talishish musabiqisi 6-ayning 13- we 14-künliri amérikining wirjiniye shtatida ötküzüldi.

Yekshenbe küni ötküzülgen axirqi hel qilghuch musabiqide wirjiniye Uyghur birliki komandisi toronto-kaliforniye birleshme komandisini 0 ge qarshi 2 netije bilen yéngip chémpiyonluqqa érishti.

Paytext washin'gton we wirjiniye shtati etrapida yashaydighan köp sandiki Uyghur jama'iti perzentlirini élip kélip musabiqe kördi hemde meydandiki topchilargha medet berdi.

Kök we sériq mayka kiygen ikki guruppa topchilar Uyghur balilirining qollirini yétiligen halda meydan'gha kirip kelgende, pütün etrap qizghin alqish sadalirigha chömdi.

Axirqi heq qilghuch musabiqige chüshken wirjiniye Uyghur birliki komandisi bilen toronto-kaliforniye birleshme komandisi 30 nechche sélsiye gradus issiqqa qarimay keskin élishti. Axirida wirjiniye komandisi 0 ge qarshi 2 top kirgüzüp chémpiyon boldi.

Amérika we kanadaning herqaysi jayliridin teshkillinip kelgen yash Uyghur ezimetliri dostluq, birlik we milliy roh ilikide musabiqini dawamlashturdi. Uyghur tili we Uyghur milliy muhiti ichide élip bérilghan musabiqe balilar we ösmürlerde untulghusiz tesiratlar qaldurdi. Musabiqe axirlashqanda Uyghur baliliri öz qoli bilen putbolchi ezimetlerning boynigha médal asti.

Musabiqe axirlashqanda wirjiniye Uyghur birliki komandisining hujumchisi arafat dilshat eng yaxshi putbolchi bolup bahalinip, “Altun ayagh” atiqini aldi.

Mezkur musabiqini teshkilligen wirjiniye Uyghur birliki komandisining trinéri jür'et zahir ependi musabiqe axirida radi'omiz ziyaritini qobul qildi. U bu nöwetlik musabiqide wirjiniye Uyghur birliki, boston yashliri, toronto Uyghur komandisi, kaliforniye yashliri qatarliq 4 komandining oynighanliqini tekitlidi. Bu nöwetlik musabiqining shimaliy amérikida yashighuchi Uyghur jama'iti, bolupmu Uyghur yashlirigha nisbeten intayin muhim ehmiyetke ige ikenlikini ilgiri sürdi.

Ziyaritimizni qobul qilghan putbol heweskari, doktor jür'et obul ependimu bu qétimliq musabiqining yash ösmürler we Uyghur balilirida ishench we milliy iptixarliq tuyghusi peyda qilghanliqini tilgha aldi.

Tepsilatini awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet