Norwégiyede Uyghur putbol komandilar ara dostluq musabiqisi élip bérildi

3- We 4-séntebir künliri norwégiyening shi'éin shehiride norwégiyediki Uyghur putbol komandilirining 3-qétimliq yilliq dostluq musabiqisi ötküzülgen.

Bu musabiqige norwégiyening töt chong shehiridiki Uyghur yashlardin teshkillen'gen töt komanda qatnashti.

Bu qétimliq musabiqini norwégiye Uyghur komitéti teshkilligen bolup, norwégiye Uyghur komitétining tenterbiye ishliri mes'uli mutellip ependining bildürüshiche, bu qétimliq musabiqe norwégiyening shi'éin shehirining sahibxaniliqida ötküzülgen.

Musabiqige her qaysi sheherdin kelgen komandilar aylanma sheklide qatnashqan bolup, hemme komandilar öz-ara uchrishish pursitige ige bolghan.

Mutellip ependining ilgiri sürüshiche, norwégiyediki her qaysi sheherlerdiki Uyghur komandilar yilda bir qétim bolsimu, dostluq putbol musabiqisi uyushturush arqiliq, komandilar ara peqetla musabiqidiki netijini nishan qilish emes, belki Uyghur yashlirining öz-ara tonushush, dostluq ornitish, eng muhimi Uyghur dawa sépini küchlendürüshke asas sélish meqsitide top oynap, putbol wasitisi bilen hemkarliq we ittipaqliqini kücheytishni meqset qilidiken.
Téléfon ziyaritimizni qobul qilghan norwégiye Uyghur komitétining tenterbiye ishliri mes'uli mutellip ependi komandilarning nishan-ghayiliri hemde shu künlük musabiqe ehwali heqqide melumat berdi.
Norwégiyediki ziyaliylardin qaraxan ependi bu qétimliq musabiqe heqqide özining hés qilghanlirini anglatti.

Bu qétimliq musabiqe norwégiyediki Uyghur jama'iti we Uyghur yashlarning yéqindin qollap quwwetlishige érishken bolup, norwégiyediki yashlardin ziyaritimizni qobul qilghan zulqerneyin öz tesiratini ipadilidi.

Putbol musabiqisige peqetla komanda ezalirila qatniship qalmay, belki ularning a'ile ezalirining neq meydan'gha bérip qatnishishi, ularning a'ile tawabi'atliri bolupmu, perzentlirinimu bir uchrishish pursiti bilen teminlidi.

Musabiqining Uyghur ana tilini keng qollinish arqiliq, öz-ara ehwalliship, qérindashliq méhir-muhebbitini chongqurlashturushqa türtke bolidighanliqini ilgiri sürgen sitiwan'gir komandisining komanda bashliqi ilyar ependimu bu heqte öz qarashlirini bayan qildi.