Uyghur milliy tébabiti xitaylarning qoligha ötüp kétemdu?

Ixtiyariy muxbirimiz arslan
2016-11-07
Share
hekim-eli-uyghur-tebabiti-1.jpg Istanbulning zeytinburnudiki hékim éli Uyghur tébabiti.
RFA/Arslan

Igilinishiche, yéqindin buyan Uyghur diyaridiki bir qanche chong Uyghur milliy tébabet dorigerlik shirketliri taqiwétilgen we ilgiri sehiye idarisi teripidin testiqlinip késellerge tarqitiliwatqan bir qanche türlük dorilarning yasilishi cheklimige uchrighan.

Biz bu heqte toluq melumatqa ige bolush üchün hazir istanbulning zeytinburnu rayonida Uyghur milliy tébabet dorixana achqan Uyghur téwiplar bilen söhbet élip barduq.

Zeytiburnudiki hekim eli Uyghur milliy tébabet késel körüsh shipaxanining doxturi hekim eli ependi aldi bilen Uyghur milliy tébabet dorigerlik shirketlirining taqilip kétiliwatqanliqi toghrisida toxtaldi.

Hekim eli ependi, özining ürümchide 80 kishi ishleydighan dora yasash shirkitining taqiwétilgenlikini, ilgiri sehiye nazariti teripidin mexsus nomur bérip testiqlan'ghan bir qanche xil dorilirining emdi bazargha sélinishigha cheklime qoyulghanliqini, hazir 36 türlük 2 milyon yüen qimmitidiki milliy tébabet dorilirining sétilishi cheklimige uchrap ambarda bésilip qalghanliqini bildürdi.

Hekim eli ependining bildürüshiche yene, xalmurat ghopur isimlik bir Uyghur tébabet alimining nechche yüz milyon yüen meblegh sélip achqan kelpindiki Uyghur milliy tébabet dorigerlik shérikitiningmu xitay da'iriliri teripidin taqiwétilgenlikini bildürdi.

Hekim eli ependining bildürüshiche, Uyghur milliy tébabet dorigerlik sahesi iqtisadiy igilik tikleshte muhim ehmiyetke ige bir sahe ikenlikini, buni tonup yetken xitaylar bu sahege köz tikip meblegh salghanliqini we Uyghurlardin milliy tébabet dorigerlik sahesini tartiwélishqa urunuwatqanliqini bildürdi, shuning üchün Uyghur milliy tébabet dorigerlik shirketler taqilishqa bashlighan, ilgiri sehiye idarisi teripidin testiqlan'ghan milliy tébabet dorilarning sétilishi cheklimige uchrighan.

Hekim eli ependi, Uyghur milliy tébabet dorigerlik shirketliri xitaylar bilen ortaq shérik bolup shirket achqan bolup, bir mezgil ötkendin kéyin xitaylar shérikchiliktin bash tartip ichkiri ölkilerge ketkenlikini, ularning eslide Uyghur milliy tébabet dorigerlik rétséplirini oghrilap qolgha chüshürgendin kéyin, Uyghur dorigerdin ortaqliqini bikar qilip ichkiride öz aldigha Uyghur milliy tébabitige alaqidar dora yasaydighan mexsus shirket qurghanliqini we mexpiy qolgha chüshürgen rétséplardin paydilinip Uyghur milliy tébabet dorilirini yasap bazargha salghanliqini bildürdi.

Biz yene Uyghurzade milliy tébabet dorigerlik dukinidiki xurshide xanim bilen Uyghur milliy tébabitining alahidiliki we ehmiyiti toghrisida söhbet élip barduq.

Xurshide xanim sözide Uyghur milliy tébabitining tarixi, ehmiyiti toghrisida pikir bayan qildi.

Xurshide xanim, Uyghur milliy tébabet shirketliri we dorilirining cheklimige uchrash sewebliri toghrisida toxtaldi.

Xurshide xanim, Uyghur milliy tébabet shirketliri we dorilirining xitaylarning qoligha ötüp kétish xewpige duch kelgenlikini, Uyghur tébabitini tetqiq qiliwatqan, dora yasawatqan Uyghur téwiplargha cheklime qoyup, xitayning bir qisim shirketliri ichkiri ölkiliride Uyghur tébabiti namida yasighan dorilarni Uyghur diyarigha keltürüp sétiwatqanliqini bildürdi.

Xurshide xanimning bildürüshiche, ilgiri Uyghur milliy tébabet dorigerlik shirketliri teripidin bazargha sélin'ghan 32 som qimmitidiki yürek boghum késellikliri milliy tébabet dorisini hazir xitaylar yasap ekélip bir qutisini 850 somdin sétiwatqanliqini bildürdi.

Xurshide xanim, Uyghur milliy tébabet dora yasash shirketliri xitaylar bilen ortaq shérik bolghandin kéyin xitaylar milliy tébabet rétsépini qolgha chüshürgenlikini, Uyghur milliy tébabet dorilirining bir qisim rétsépliri xitaylarning qolgha chüshüp ketkenlikini, xitayning ichkiri ölkiliridimu hazir Uyghur milliy tébabet dorilirini yasash zawutliri qurulup xitaylarghimu omumlishiwatqanliqini tekitlidi.

Xurshide xanim sözining axirida, Uyghur milliy tébabitini qoghdap qilish üchün dunyaning qeyerde bolsun, Uyghur tébbiy alimlarning yéngi ewladlargha milliy tébabetni ögitish kéreklikini tekitlidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet