Uyghur yigiti nariman qurbanof dunya musabiqiside altun médalgha érishti

3-Martta qatar paytexti doxada tamamlan'ghan gimnastika boyiche dunya musabiqisining nöwettiki basquchida Uyghur millitining wekili nariman qurbanof altun médalgha érishti. U yaghach atta oyun körsitish türi boyiche maharitini namayan qilip, birinchi orunni igilidi.

Nariman qurbanofning bu utuqi toghriliq qazaqistanning “Qazaqaxbarat”, “Qaztag”, “Téngrinyus” qatarliq eng inawetlik axbarat wasitiliri xewer qilghan. Ularda éytilishiche, bu musabiqige qazaqistan komandisidin töt neper tenheriketchi qatnashqan. Nariman qurbanof ilgirimu bir nechche dunya musabiqilirige qatniship, qazaqistanning shenini qoghdighanidi.

Xewerlerdin yene melum bolushiche, buningdin bir nechche kün ilgiri gérmaniyening kotbas shehiride ötken dunya musabiqiside nariman qurbanof mis médalgha érishken.

Biz hazir ezerbeyjan paytexti bakuda ötidighan gimnastika boyiche dunya musabiqisining nöwettiki basquchigha teyyarliniwatqan xelq'ara tenheriket mahiri nariman qurbanof bilen alaqileshtuq.

U doxada ötken musabiqige 48 memlikettin 60 qa yéqin tenheriketchining qatnashqanliqini, uninggha qattiq teyyarlan'ghanliqini otturigha qoydi.

U mundaq dédi: “Yilning béshidin tartip bizning komanda almuta shehiride üch qétim chong yighilishta boldi. U yerde barliqi aldin-ala pilanlan'ghandek boldi. Féwralning ayighida gérmaniyege bérip, mis médal yéngiwaldim. U yerde tejribe toplap, chong ishench bilen doxadiki musabiqide birinchi orunni yéngiwaldim. Teyyarliq jeryanida héch qandaq bir éghirchiliq körmidim. Meshiqlinish üchünmu barliq shara'itlar yaritildi. Trénérlar, doxturlar we bashqilar da'im yénimizda boldi. Méni xushal qilghini shu. Méning bilen bille barghan milat karimi, ilyas ezizof we dimitriy potanin emdi téxi öz maharitini körsitishke bashlighan bolsimu, ular bir nechche qétim aldinqi qatarlarda boldi. Bolupmu ilyas ezizof altinchi orunni igilidi. Bumu yaxshi körsetküch”.

“Kéntawr” qabiliyetlik tenheriketchilerge yardem qilish jem'iyetlik fondining prézidénti, qazaqistanning xizmet körsetken trénéri, nariman qurbanofning ustazi mexmut iskenderof ependi mundaq dédi: “Men oylaymenki, köpligen gimnastika heweskarliri uni yaxshi bilidu. U peqet Uyghur yultuzila emes, u hem qazaqistanning meshhur tenheriketchisi we gimnastikichisi. U hem qazaqistanning pexri. Bir nechche yildin buyan u nechche qétim qazaqistanning bayriqini kötürüp chiqip, tejribilik gimnastikichi derijisige yetti. Hazir barliqimiz uning utuqidin xushal boluwatimiz. Bu yerde uning dadisi, gimnastika boyiche qazaqistanning xizmet körsetken trénér, qazaqistan komandisining trénér hüsenjan qurbanofning chong töhpisi bar. Hazir narimanni asasen shu meshiqlendürüwatidu. Doxada ötken musabiqige dunyaning eng küchlük tenheriketchiliri yighildi. Bu qétim nariman dunya chémpiyoni irlandiyelik ris mak lénaganndin we teywenlik sha'o yu yandin ozup chiqti. Bizning aldimizgha qoyghan emdiki eng birinchi nishanimiz-Uyghur perzendining 2024-yili bolidighan olimpik oyunigha qatniship, xelqimizni dunyagha tonushturushtur. Uning üchün nariman barliq dunya musabiqisi basquchliridin ötüp, dunya chémpiyoni dégen derijige yétishi we olimpik musabiqisige yollanma élishi kérek. Bu Uyghur xelqining her qandaq bir wekilining armini”.

Mexmut iskenderof nariman qurbanofqa ishinidighanliqini bildürüp, uninggha chong utuqlar tilidi.

Qazaqistan Uyghur yashliri ittipaqining ezasi bextinur sadiqowa xanim mundaq dédi: “Qérindishimiz nariman qurbanofning gérmaniyediki dunya musabiqiside mis médaligha, andin qatar memlikitide ötken dunya musabiqiside altun médalgha érishkini bizni, bolupmu qazaqistandiki Uyghur yashlirini qattiq xushal qildi. Nariman mushuning bilen bir nechche qétim dunya musabiqiliride chémpiyon ataldi. Bu her qandaq tenheriketchining qolidin kéliwermeydu. Rast, tenheriketning her xil türliri boyiche dunya musabiqilirige qatniship, yaxshi netijilerni körsitiwatqan Uyghur qiz-yigitliri arqa-arqidin chiqiwatidu. Ular, birinchidin, qazaqistan bayriqini égizge kötürüp lepildetse, ikkinchidin, özlirining Uyghur xelqining perzentliri ikenlikini dunyagha tonutuwatidu. Men nariman qurbanofning qanchilik tirishchan, qanchilik wetenperwer, yeni öz wetinining abruyi üchün küresh qiliwatqan perzend ékenlikige közüm yétiwatidu. Mushu yéqinqi künlerde u bakudiki dunya musabiqisige qatnishidiken. Men pütkül qazaqistan Uyghur yashliri namidin nariman'gha chin dilimdin chong utuqlar tileymen!”

Igilishimizche, nariman qurbanof 2018-yili kanadada ötken dunya gimnastika musabiqiside “Yaghach atta mollaq étish” heriket usuli bilen eng yuqiri derije körsitip, xelq'ara gimnastika fédératsiyesi uning bu heriket sheklige “Qurbanofche heriket” dep nam bergen.