Qazaqistan merkiziy asiya buyiche eng chong meschit yasimaqchi

Xewerde körsitilishiche, mezkur meschit üchün ikki milyon 250 ming dollar serp qilinishi mumkin. Meschitni qurushni türkiye shirkiti zimmisige alghan bolup, meblegh asasliqi kishilerning i'ane bérishi yoli bilen hel qilinidiken.

 Sherqiy qazaqistan oblastining walisining axbarat ishlirigha mes'ul emeldari merkiziy asiya rayonida bu meschit bilen tenglishidighan ikkinchi bir meschitning hazirche yoqluqini, meschitning omumiy yer meydanining töt ming géktar bolidighanliqini eskertken.

Melumatlargha qarighanda, bu meschit pütse, uning ichide biraqla üch mingdin artuq adem namaz oqiyalaydiken. Nöwette, merkiziy asiyadiki sabiq sowét ittipaqidin ayrilip, musteqil bolghan jumhuriyetlerde islam dinining qaytidin janliniwatqanliqi, uzun mezgil até'izm terbiyisi astida, öz diniy medeniyitidin ayrilip qalghan qazaqlar, qirghizlar we bashqa xelqler arisida islamiy étiqadning küchiyiwatqanliqi melum.

Qazaq metbu'atlirida qazaqistan hökümitining yéqinqi yillarda köp sandiki oqughuchilarni musulman döletlirige ewetip terbiyiligenliki, qazaqlar arisidin xéli köp sanda yash ewlad diniy ölimalar yétiship chiqip, xelqni diniy bilim hem exlaq - pezilet bilen terbiyilewatqanliqi xewer qilinmaqta.