«Шинҗаң гезити» кадирлар бөлүми: «тутулған 4 хадимимизниң 3 нәпири партийә әзаси иди»

Мухбиримиз шөһрәт һошур
2018-09-06
Елхәт
Пикир
Share
Принт
«Шинҗаң гезити» идариси уйғур бөлүминиң хадимлири.
«Шинҗаң гезити» идариси уйғур бөлүминиң хадимлири.
RFA/Shohret Hoshur

Ашкарилинишичә, «шинҗаң гезити» ниң уйғур бөлүмидин 4 нәпәр мудир вә баш муһәррирниң аталмиш «икки йүзлимичилик» җинайити хитай қанун органлири тәрипидин әмәс, бәлки уйғур аптоном районлуқ партком интизам тәкшүрүш комитетиниң тәкшүрүши вә қарари билән бекитилгән икән.

«Шинҗаң гезити» идарисиниң ишхана мудири лю җйәнроң, 4 нәпәр уйғур хадиминиң тутқун қилиниш делосини интизам тәкшүрүш тармақлири билидиғанлиқини ашкариланғандин кейин, биз уйғур аптоном районлуқ интизам тәкшүрүш комитетиға телефон қилдуқ. Телефонимизни қобул қилған хадим бу дело һәққидә телефон зиярити қобул қилалмайдиғанлиқини ейтти.

Биз тәкрар «шинҗаң гезити» ниң алақидар бөлүмлиригә телефон қилдуқ. Гезитханиниң кадирлар бөлүмидә ишләйдиған бир хадим тутқун илһам вәли, миркамил аблимит, мәмтимин обул вә җүрәт һаҗилардин 3 нәпириниң компартийә әзаси икәнликини ашкарилиди.

Мәлум болушичә, бу төт нәпәр хадимниң тутқун қилиниши 7-айниң 4-күни уйғур аптоном районлуқ интизам тәкшүрүш кометидин бу гезитханиға кәлгән бир хизмәт гурупписиниң тәкшүрүшидин кейин башланған. Тәкшүрүш гурупписи хизмәт башлап 3 һәптидин кейин баш муһәррир илһам вәли, униңдин бир һәптә кейин қалған 3 хадим тутқун қилинған икән.

Мәзкур тәкшүрүш гурупписиға актип һәмкарлашқан бир хадимниң баян қилишичә, гуруппа гәрчә гезитханида омумйүзлүк тәкшүрүш елип барған болсиму, әмма хитай вә қазақ бөлүмидин тутулғанлар болмиған.

Бу 4 хадим билән бир мәһәл бир идарә вә бир ишханида хизмәт ишлигән, нөвәттә вашингтонда яшаватқан сабиқ мухбир җүрәт низамидинниң баян қилишичә, мәзкур төт нәпәр хадим уйғур ахбарат саһәсидә көзгә көрүнгән шәхсләрдин икән. Җүрәт низамидин хизмәт орнидин айрилғини 4 йилдин ашқанлиқи, шуңа уларниң «икки йүзлимичи» санилишиға неминиң сәвәб болғанлиқини билмәйдиғанлиқини, әмма йеқинқи сиясий долқунларда хитай күткәндикидәк бир актипчанлиқини көрсәтмәй қалған болуши мумкинликини илгири сүрди.

У тутқун қилинған 4 нәпәр сабиқ хизмәтдишиниң миҗәзи кәскин, мәмури башқуруш тәҗрибисигә игә хадимлар икәнликини тилға елиш билән бирликтә улардин бәзилириниң һаятида тунҗи қетим аваричиликкә учриши әмәсликини баян қилди.

Униң дейишичә, мудир миркамил аблимит алий мәктәптә оқуватқан мәзгилидә намайишқа қатнашқанлиқи үчүн мәктәптин һәйдәлгән вә бир қатар җапалиқ җәрянлардин кейин иқтидарлиқ тәрҗиман вә ахбаратчи болуп йетишип чиққан икән.

Пикирләр (0)
Share
Толуқ бәт